Xalqaro huquq normalariga muvofiq hamda respublika iqtisodiyoti tarmoqlari uchun kadrlar tayyorlash va qayta tayyorlash sohasidagi hamkorlikni yanada kengaytirish maqsadida:

1. Mustaqil Davlatlar Hamdoʻstligida qatnashuvchi davlatlarning Tabiiy va suyultirilgan gazdan motor yonilgʻisi sifatida foydalanish sohasida mutaxassislar tayyorlash, qayta tayyorlash va malakasini oshirish boʻyicha hamkorlik qilish toʻgʻrisida 2010-yil 21-may kuni Sankt-Peterburg shahrida imzolangan bitim tasdiqlansin.

2. “Oʻzbekneftgaz” Milliy xolding kompaniyasi hamda Oʻzbekiston Respublikasi Oliy va oʻrta maxsus taʼlim vazirligi mazkur Bitimning amalga oshirilishi uchun masʼul boʻlgan vakolatli organlar etib belgilansin.

3. Oʻzbekiston Respublikasi Tashqi ishlar vazirligi Oʻzbekiston Respublikasi tomonidan mazkur xalqaro shartnoma kuchga kirishi uchun zarur boʻlgan ichki davlat tartib-qoidalari bajarilgani hamda Bitimning amalga oshirilishi uchun masʼul boʻlgan vakolatli organlar toʻgʻrisida depozitariyga tegishli bildirishnoma yoʻllasin.

4. Oʻzbekiston Respublikasi Vazirlar Mahkamasi hamda Oʻzbekiston Respublikasi Oliy va oʻrta maxsus taʼlim vazirligi bilan “Oʻzbekneftgaz” Milliy xolding kompaniyasi rahbarlari ushbu xalqaro shartnoma kuchga kirgandan keyin belgilangan tartibda Oʻzbekiston Respublikasining majburiyatlari bajarilishi ustidan nazoratni taʼminlasinlar.

5. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.