“Kichik biznes va xususiy tadbirkorlik yili” Davlat dasturiga muvofiq hamda kichik korxonalar va tadbirkorlarni tashkil etish va ro‘yxatdan o‘tkazish tartibotlarini yanada soddalashtirish, kichik biznesni rivojlantirishga xorijiy investitsiyalarni keng jalb etish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Vazirlar Mahkamasining 2003-yil 20-avgustdagi 357-son qarori (O‘zbekiston Respublikasi QT, 2003-y., 8-son, 72-modda) bilan tasdiqlangan Tadbirkorlik subyektlarini davlat ro‘yxatidan o‘tkazish, hisobga qo‘yish va ruxsat beruvchi hujjatlarni rasmiylashtirish tartibi to‘g‘risidagi Nizomga ilovaga muvofiq o‘zgartirish va qo‘shimchalar kiritilsin.

2. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. 12-band “b” kichik bandining ikkinchi xatboshi quyidagi tahrirda bayon qilinsin:

“xorijiy muassis to‘g‘risida yuridik shaxs ro‘yxatdan o‘tkazilgan joydagi savdo reyestridan ko‘chirma yoki, agar O‘zbekiston Respublikasining xalqaro shartnomasida boshqacha qoida nazarda tutilmagan bo‘lsa, O‘zbekiston Respublikasining konsullik muassasasi tomonidan belgilangan tartibda legalizatsiya qilingan ushbu yuridik shaxs faoliyatini tasdiqlovchi boshqa hujjat, bular mavjud bo‘lmagan taqdirda esa — muassis ro‘yxatdan o‘tkazilgan davlat Tashqi ishlar vazirligida, mazkur mamlakatning O‘zbekiston Respublikasidagi konsullik muassasasida yoki diplomatik vakolatxonasida legalizatsiya qilinib, keyinchalik O‘zbekiston Respublikasi Tashqi ishlar vazirligining Konsullik boshqarmasida tasdiqlangan boshqa hujjat, agar O‘zbekiston Respublikasining xalqaro shartnomasida boshqacha tartib nazarda tutilmagan bo‘lsa. Xorijiy muassis to‘g‘risida savdo reyestridan ko‘chirmada yoki ushbu yuridik shaxsning faoliyatini tasdiqlovchi boshqa hujjatda xorijiy yuridik shaxsning, u joylashgan joyning nomi, xorijiy yuridik shaxs nomidan imzolash huquqiga ega bo‘lgan shaxsning ma’lumotlari mavjud bo‘lishi kerak. Ko‘rsatib o‘tilgan ko‘chirma berilgan paytidan boshlab bir yil mobaynida haqiqiy hisoblanadi. Jismoniy shaxs — O‘zbekiston Respublikasi norezidenti o‘z pasportining nusxasini taqdim etadi. Ushbu hujjatlar belgilangan tartibda notarial tasdiqlangan davlat tilidagi tarjimasi bilan taqdim etilishi kerak. Agar xorijiy muassisning korxona (tashkilot) ustav fondiga ulushi intellektual mulk bo‘lsa, u holda ariza beruvchi qonun hujjatlarida belgilangan tartibda baholovchi tashkilot tomonidan tayyorlangan baholash to‘g‘risidagi hisobotni taqdim etishi kerak”.

2. 72-bandda:

a) birinchi xatboshidagi “7 ish kunida” so‘zlari “1 oyda” so‘zlari bilan almashtirilsin;

b) to‘rtinchi xatboshidagi “matnining” so‘zidan keyin “vakolatli shaxs tomonidan imzolangan va” so‘zlari qo‘shilsin;

v) quyidagi mazmundagi to‘qqizinchi xatboshi qo‘shilsin:

“ulush (hissa) yoki aksiya boshqaga o‘tgan taqdirda — ushbu ulush (hissa) yoki aksiyaning boshqaga o‘tganligini tasdiqlovchi hujjat (shartnoma, xat va shu kabilar)”;

to‘qqizinchi — o‘n beshinchi xatboshilar tegishli ravishda o‘ninchi — o‘n oltinchi xatboshilar deb hisoblansin.

3. 74-bandning birinchi xatboshidagi “yoki yuridik shaxsni” so‘zlari chiqarib tashlansin.

4. Quyidagi mazmundagi 76¹-band qo‘shilsin:

“76¹. Yo‘qolgan yoki yaroqsiz holga kelgan davlat ro‘yxatidan o‘tkazilganlik to‘g‘risidagi guvohnoma o‘rniga tadbirkorlik subyekti arizasiga binoan uning dublikati berilishi mumkin.

Davlat ro‘yxatidan o‘tkazilganlik to‘g‘risidagi guvohnoma dublikatini berishda eng kam oylik ish haqining bir baravari miqdorida to‘lov undiriladi.

Bu holda tadbirkorlik subyekti davlat ro‘yxatidan o‘tkazilganlik to‘g‘risidagi yo‘qolgan guvohnomaning haqiqiy emasligi haqida ommaviy axborot vositalarida e’lon berishi, shuningdek ro‘yxatdan o‘tkazuvchi organga e’lon qilingan xabarni va dublikat berilganligi uchun belgilangan miqdorda to‘lov to‘langanligi to‘g‘risidagi bank to‘lov hujjatini taqdim etishi shart.

To‘lov summasi ro‘yxatdan o‘tkazuvchi organning alohida shaxsiy g‘azna hisob raqamiga o‘tkaziladi hamda ro‘yxatdan o‘tkazuvchi organning dublikatni tayyorlash va berish xarajatlarini qoplashga yo‘naltiriladi. Ko‘rsatib o‘tilgan mablag‘larning 31-dekabrdagi holatiga ko‘ra qoldiqlari:

O‘zbekiston Respublikasi Adliya vazirligining, Qoraqalpog‘iston Respublikasi Adliya vazirligi va viloyatlar adliya boshqarmalarining shaxsiy g‘azna hisob raqamlaridan — respublika budjeti daromadiga;

inspeksiyalarning shaxsiy g‘azna hisob raqamlaridan — tegishli mahalliy budjetlar daromadiga o‘tkaziladi.

Davlat ro‘yxatidan o‘tkazilganlik to‘g‘risidagi yaroqsiz holga kelgan guvohnoma ro‘yxatdan o‘tkazgan organga qaytariladi va yo‘q qilinadi.

Dublikatni berish muddati uch ish kunidan oshmasligi kerak”.