Respublikaning yirik korxonalari va ishlab chiqarishlarida texnologik asbob-uskunalar va texnologiyalarning texnik auditini o‘tkazishni tashkil etish, korxonalarga zamonaviy va jahon darajasida muvaffaqiyatli sinab ko‘rilgan texnologiyalarni jadal joriy etish orqali respublikaning sanoat salohiyatini yanada mustahkamlash maqsadida Vazirlar Mahkamasi qaror qiladi:
1. O‘zbekiston Respublikasi Iqtisodiyot vazirligi, Moliya vazirligi, Davlat statistika qo‘mitasi va “O‘zstandart” agentligi tomonidan manfaatdor vazirliklar, idoralar va xo‘jalik boshqaruvi organlari bilan birgalikda ishlab chiqilgan 2011-yilda yirik korxonalar va ishlab chiqarishlarda texnik audit o‘tkazish bo‘yicha maxsus dastur ma’qullansin, Dastur quyidagilarni o‘z ichiga oladi:
Zamonaviy, jahon darajasida sinab ko‘rilgan asbob-uskunalar va texnologiyalar bilan almashtirilishi kerak bo‘lgan texnologik asbob-uskunalar va texnologiyalar ro‘yxatini aniqlash bo‘yicha texnik auditni o‘tkazish tartibi to‘g‘risidagi nizom 1-ilovaga* muvofiq;
* 1-ilova rus tilidagi matnda berilgan.
2011-yilda texnik audit o‘tkazilishi kerak bo‘lgan yirik korxonalar va ishlab chiqarishlar ro‘yxati 2-ilovaga* muvofiq.
* 2-ilova rus tilidagi matnda berilgan.
2. Iqtisodiyot tarmoqlarida faoliyatni amalga oshiradigan yirik korxonalar va ishlab chiqarishlarda 2011-yilda texnik audit o‘tkazish bo‘yicha tarmoq ishchi guruhlari 3 — 7-ilovalarga* muvofiq tarkibda tashkil qilinsin, quyidagilar ularning asosiy vazifalari etib belgilansin:
asosiy ishlab chiqarish fondlarining zamonaviy talablarga muvofiqligini xatlovdan o‘tkazish va uning asosida foydalanishdan bosqichma-bosqich chiqarilishi kerak bo‘lgan eskirgan va energiyani ko‘p talab qiladigan texnologik asbob-uskunalar, ma’naviy eskirgan texnologiyalarning aniq ro‘yxatini aniqlash;
ishlab chiqarishda foydalanadigan energiya resurslari, xomashyo, materiallar va butlovchi buyumlarning haqiqiy sarfini ularning texnikaviy va iqtisodiy samaradorligi bo‘yicha tahlil qilish;
foydalanadigan texnologik asbob-uskunalarning normativ-texnik hujjatlarini tarmoqni rivojlantirishning uzoq muddatli konsepsiyasini hisobga olgan holda zamonaviy raqobatbardosh mahsulotlar ishlab chiqarish imkoniyati bo‘yicha o‘rganish;
mavjud ishlab chiqarishlarni, shu jumladan zamonaviy va jahon darajasida sinab ko‘rilgan texnologiyalarni joriy etish hisobiga texnik va texnologik jihatdan yangilash hamda kengaytirish yuzasidan, ularni moliyalashtirish manbalarini belgilagan holda takliflar tayyorlash hamda 2011-yil 1-oktabrgacha O‘zbekiston Respublikasi Iqtisodiyot vazirligiga kiritish.
Tarmoq ishchi guruhlariga ekspertiza o‘tkazish va eng maqbul qarorlar ishlab chiqish uchun korxonalar va xo‘jalik birlashmalari mablag‘lari hisobiga ixtisoslashtirilgan loyiha institutlari, injiniring va konsalting kompaniyalari, asbob-uskunalar, texnologiyalar, jihozlar va vositalar ishlab chiqaruvchi zavodlarning mutaxassislari va ekspertlarini jalb etishga ruxsat berilsin.
3. O‘zbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi tarmoq ishchi guruhlari, tashabbuskor korxonalar, O‘zbekiston Respublikasi Tiklanish va taraqqiyot jamg‘armasi hamda tijorat banklari bilan birgalikda 2011-yil 1-dekabrgacha bo‘lgan muddatda texnik audit o‘tkazish natijalari asosida:
O‘zbekiston Respublikasining 2012-yilgi Investitsiya dasturi va “2011 — 2015-yillarda O‘zbekiston Respublikasi sanoatini rivojlantirishning ustuvor yo‘nalishlari to‘g‘risida”gi dasturga kiritish uchun xomashyo bazasini hisobga olgan holda ishlab chiqarishlarni modernizatsiya qilish, texnik va texnologik jihatdan yangilash bo‘yicha qo‘shimcha investitsiya loyihalari ro‘yxati;
qonun hujjatlariga muvofiq qarorlar qabul qilish uchun qayta ixtisoslashtirilishi va tugatilishi kerak bo‘lgan korxonalar va ishlab chiqarishlar ro‘yxati yuzasidan Vazirlar Mahkamasiga takliflar kiritsin.
4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosarlari zimmasiga yuklansin.