1. O‘zbekiston yoshlarining “Kamolot” jamg‘armasini tashkil etish O‘zbekiston Yoshlar Ittifoqi, Oliy va o‘rta maxsus ta’lim, Xalq ta’limi vazirliklari, Respublika davlat jismoniy tarbiya va sport qo‘mitasi, O‘zbekiston “Biznes-fondi” boshqaruvi, O‘zbekiston xotin-qizlar qo‘mitasi, Respublika kasaba uyushmalari federatsiyasi Kengashi, Respublika “Ma’naviyat va ma’rifat” jamoatchilik markazi, “Sog‘lom avlod uchun” xalqaro xayriya jamg‘armasi, Respublika “Mahalla” xayriya jamg‘armasi va boshqa ta’sischilarning takliflari qabul qilinsin.

2. O‘zbekiston yoshlarining “Kamolot” jamg‘armasi yosh avlodning har tomonlama kamol topishi, chuqur bilim, kasb egallashi, o‘zlarida yuksak ma’naviyat, vatanparvarlik, mehnatsevarlik fazilatlarini hosil qilishi, ularning istiqlol ishining izchil davomchilari bo‘lib etishishlarida ko‘p qirrali yordam ko‘rsatishni o‘zining dasturiy vazifasi qilib belgilanganligi ma’qullansin.

3. Jamg‘arma o‘zini o‘zi mustaqil boshqaruvchi, mablag‘ bilan ta’minlovchi va mustaqil faoliyat yurituvchi nohukumat jamoat birlashmasi sifatida yuridik shaxs huquqiga ega ekanligi inobatga olinsin.

4. Jamg‘arma O‘zbekistonda kelajagi buyuk davlat barpo etish, demokratiyani rivojlantirish, yoshlar qalbida milliy ma’naviyatimiz, madaniy merosimiz va umuminsoniy qadriyatlar zaminida sog‘lom ruh hamda dunyoqarashni shakllantirishdek xayrli ishni maqsad qilib qo‘yganligi e’tirof etilsin.

Jamg‘arma quyidagilarni o‘z faoliyatining asosiy yo‘nalishi etib belgilagani e’tiborga olinsin:

— yoshlarni ijtimoiy jihatdan muhofaza etish ishlarida qatnashish, ularning bilim olish, mehnat qilish, siyosiy va bosh konstitutsiyaviy huquqlarini to‘la amalga oshira olishlari uchun zarur shart-sharoit yaratish;

— yoshlarning tarbiyasiga taalluqli keng qamrovli ishlarni amalga oshirishda davlat idoralari, muassasalar, mehnat jamoalari, ilmiy, ijodiy uyushmalar, jamoat tashkilotlari, homiylar, jamoat arboblari faoliyatini muvofiqlashtirish;

— yoshlarda umuminsoniy qadriyatlar, milliy axloq, odob, demokratik yo‘nalishlarni takomillashtirish asosida barkamol ma’naviy xislatlar, yurtga muhabbat, Vatanga sadoqat, millatlararo do‘stlik rishtalarini mustahkamlash uchun zarur muhit va shart-sharoitning yaratilishiga ko‘maklashish;

— yoshlarga zamonaviy bilim, texnologiyalarni egallash, bozor iqtisodiyoti qonuniyatlari va amaliyotini o‘zlashtirish, yangicha fikrlash omillarini hosil qilishda yordam ko‘rsatish, iste’dodli yoshlarni qo‘llab-quvvatlash.

5. Jamg‘armani qo‘llab-quvvatlash, uning faoliyatida ishtirok etish respublika jamoatchiligining, davlat idoralari, muassasalar va tashkilotlar rahbarlari, fuqarolar, jamoat arboblari, yoshlar murabbiylari, yurt oqsoqollarining vatanparvarlik burchi ekanligi ta’kidlansin.

6. Jamg‘arma barcha yuridik va jismoniy shaxslar, jumladan xorijiy fuqarolar, tashkilotlar, firmalar va uyushmalar uchun ochiq ekanligi e’tirof etilsin.

7. Qoraqalpog‘iston Respublikasi, barcha viloyatlar, Toshkent shahrida jamg‘armaning bo‘limlarini tashkil etish maqsadga muvofiq deb topilsin.

8. Jamg‘armani davlat tomonidan qo‘llab-quvvatlash maqsadida uning Ustav doirasidagi faoliyati bo‘yicha soliqlardan 5 yil muddatga ozod qilinsin.

9. O‘zbekiston Respublikasi Vazirlar Mahkamasi “Kamolot” jamg‘armasining faoliyati uchun zarur shart-sharoitlar yaratish yuzasidan tegishli qaror qabul qilsin.