Mamlakatimiz poytaxti Toshkent shahrida joylashgan, xalqimiz maʼnaviy merosining uzviy bir qismi boʻlgan Hazrati Imom (Hastimom) meʼmoriy majmuasi yurtimiz va musulmon olamida katta obroʻ-eʼtibor qozongan tabarruk maskan hisoblanadi. Majmua tarkibidagi Qaffol Shoshiy maqbarasi, Baroqxon va Moʻyi muborak madrasalari, Tilla shayx va Namozgoh masjidlari kabi tarixiy obidalar xalqimiz tomonidan asrlar davomida asrab-avaylab kelinmoqda.

Bu qutlugʻ dargoh diyorimizda muqaddas islom dini va falsafasini, uning insonparvarlik gʻoyalarini keng yoyishda yirik ilmiy-maʼrifiy markaz boʻlib xizmat qilayotganini, ayniqsa, Oʻzbekiston musulmonlari idorasining kutubxonasida saqlanayotgan Qurʼoni karimning eng qadimiy va moʻtabar nusxalaridan biri boʻlgan mashhur Usmon Qurʼoni, shuningdek, ming-minglab noyob qoʻlyozmalar jahon jamoatchiligining eʼtiborini oʻziga tortib kelayotganini taʼkidlash lozim.

Hazrati Imom majmuasining tariximiz, maʼnaviy hayotimizdagi oʻrni va ahamiyatini inobatga olib hamda uning asl tarixiy qiyofasini tiklash, bu yerda keng koʻlamli qurilish-taʼmirlash va obodonlashtirish ishlarini amalga oshirish, majmuaning infratuzilmasini har tomonlama rivojlantirish maqsadida:

1. Oʻzbekiston Musulmonlari idorasi, Madaniyat va sport ishlari vazirligi, Fanlar akademiyasi, Respublika Maʼnaviyat targʻibot markazi hamda bu savobli ishga hissa qoʻshish va unda ishtirok etish istagini bildirgan jismoniy va yuridik shaxslarning tashabbusi bilan Toshkent shahar hokimligi qoshida Hazrati Imom (Hastimom) jamoatchilik jamgʻarmasi taʼsis etilgani maʼlumot uchun qabul qilinsin va keng jamoatchilikning mazkur jamgʻarmani qoʻllab-quvvatlash toʻgʻrisidagi takliflari maʼqullansin.

Jamgʻarmaning mamlakatimizdagi tashkilotlar, idoralar, korxonalar, tijorat banklari va boshqa muassasalardan iborat homiylar guruhi ilovaga muvofiq eʼtiborga olinsin.

2. Jamgʻarma Hazrati Imom majmuasida qurilish-taʼmirlash, qayta tiklash va obodonlashtirish ishlari olib boriladigan davrda buyurtmachi sifatida faoliyat yuritishi, uning asosiy vazifasi majmua hududida amalga oshiriladigan qurilish-taʼmirlash, qayta tiklash va obodonlashtirish ishlariga koʻmaklashish uchun zarur mablagʻlarni toʻplash va ularning maqsadli ravishda sarflanishini taʼminlashdan iborat ekani belgilab qoʻyilsin.

3. Jamgʻarma notijorat tashkilot boʻlib, unga notijorat tashkilotlar uchun qonunchilikda koʻzda tutilgan soliq imtiyozlari tatbiq etiladi.

4. Oʻzbekiston Respublikasi Adliya vazirligi 15 kun muddatda Hazrati Imom jamoatchilik jamgʻarmasining Nizomini oʻrnatilgan tartibda roʻyxatga olsin.

5. Oʻzbekiston Respublikasi Moliya vazirligi Vazirlar Mahkamasining zaxira jamgʻarmasidan Hazrati Imom jamoatchilik jamgʻarmasining faoliyatini qoʻllab-quvvatlash uchun 500 million soʻm miqdorida mablagʻ ajratsin.

6. Oʻzbekiston milliy teleradiokompaniyasi, Oʻzbekiston milliy axborot agentligi va boshqa ommaviy axborot vositalariga Hazrati Imom majmuasida amalga oshiriladigan qurilish-taʼmirlash, qayta tiklash, obodonlashtirish, uning infratuzilmasini rivojlantirish bilan bogʻliq ishlarni muntazam yoritib borish tavsiya etilsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.