O‘zbekiston Respublikasi Oliy Majlisi Qonunchilik palatasining “Andijon viloyatining Asaka shahri va Asaka tumani hududlarini birlashtirish hamda Asaka shahrini tuman bo‘ysunuvidagi shaharlar turkumiga kiritish to‘g‘risida” 2010-yil 19-noyabrdagi 200-II sonli va O‘zbekiston Respublikasi Oliy Majlisi Senatining “Andijon viloyatining Asaka shahri va Asaka tumani hududlarini birlashtirish hamda Asaka shahrini tuman bo‘ysunuvidagi shaharlar turkumiga kiritish to‘g‘risida”gi 2010-yil 4-dekabrdagi 135-II-sonli qarorlarining amalga oshirilishini ta’minlash maqsadida Vazirlar Mahkamasi qaror qiladi:

1. Andijon viloyatining Asaka shahri va Asaka tumani hududlarini birlashtirish hamda Asaka shahrini tuman bo‘ysunuvidagi shaharlar turkumiga kiritish bilan bog‘liq tashkiliy masalalarni hal etish bo‘yicha Respublika komissiyasi 1-ilovaga* muvofiq tarkibda tashkil etilsin.

2. Respublika komissiyasi (U.U.Rozuqulov):

ikki oy muddatda Andijon viloyatining Asaka shahri va Asaka tumani hududlarini birlashtirish hamda Asaka shahrini tuman bo‘ysunuvidagi shaharlar turkumiga kiritish bilan bog‘liq zarur tashkiliy-texnik tadbirlar kompleksini ishlab chiqish va amalga oshirishni ta’minlasin;

ikki hafta muddatda Andijon viloyati hokimligi, O‘zbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi, boshqa manfaatdor vazirliklar va idoralar bilan birgalikda Asaka tumani davlat boshqaruvi organlari hududiy bo‘linmalari xodimlarining cheklangan umumiy sonini, tuzilmasi va mehnatga haq to‘lash fondlarini aniqlashga doir tashkiliy masalalarni hal etsin;

bir oy muddatda O‘zbekiston Respublikasi Iqtisodiyot vazirligi va Moliya vazirligi, Andijon viloyati hokimligi bilan birgalikda Asaka tumani budjetining va ijtimoiy — iqtisodiy rivojlantirishning prognoz parametrlarini belgilasin;

Andijon viloyati hokimligi bilan birgalikda tashkiliy davrda iqtisodiyot tarmoqlarining aniq, barqaror va bir maromda ishlashini, shuningdek yuzaga keladigan ijtimoiy masalalarning o‘z vaqtida hal etilishini ta’minlasin.

3. Andijon viloyati Asaka tumani hokimligi xodimlarining cheklangan umumiy soni 21 nafardan iborat boshqaruv apparati tuzilmasi 2-ilovaga muvofiq tasdiqlansin.

4. Andijon viloyati hokimligi:

O‘zbekiston Respublikasi Mehnat va aholini ijtimoiy muhofaza qilish vazirligi bilan birgalikda Andijon viloyati Asaka shahrini tuman bo‘ysunuvidagi shaharlar turkumiga kiritilishi munosabati bilan davlat va xo‘jalik boshqaruvi organlari hududiy bo‘linmalari tugatilishi va ular sonining qisqarishi natijasida bo‘shab qolayotgan shaxslarni ishga joylashtirish chora-tadbirlarini ko‘rsin, zaruriyat bo‘lganda ularni qayta tayyorlash va malakasini oshirish tadbirlari amalga oshirilishini ta’minlasinlar;

ikki oy muddatda O‘zbekiston Respublikasi Iqtisodiyot vazirligi hamda boshqa manfaatdor vazirliklar va idoralar bilan birgalikda Asaka tumanini yanada ijtimoiy-iqtisodiy rivojlantirish bo‘yicha tadbirlar kompleksini ishlab chiqsinlar.

5. O‘zbekiston Respublikasi Davlat statistika qo‘mitasi Andijon viloyati Asaka tumanining ma’muriy hududi kengayishi munosabati bilan statistika ko‘rsatkichlariga tegishli o‘zgartirishlar kiritsin.

6. O‘zbekiston Respublikasi “Yergeodezkadastr” davlat qo‘mitasi Andijon viloyati Asaka tumanining ma’muriy hududi kengayishi munosabati bilan yer hisobotlariga tegishli o‘zgartirishlar kiritsin.

7. Andijon viloyatining Asaka shahri va Asaka tumani hududlarining birlashtirilishi hamda Asaka shahrining tuman bo‘ysunuvidagi shaharlar turkumiga kiritilishi munosabati bilan:

Asaka shahar va Asaka tumani ichki ishlar bo‘limlari xodimlarining shtatdagi soni, Asaka tumani ichki ishlar bo‘limiga berilgan holda, O‘zbekiston Respublikasi Ichki ishlar vazirligida;

Asaka shahar va Asaka tumanida faoliyat ko‘rsatayotgan fuqarolik holati dalolatnomalarini yozish organlari va davlat notarial idoralari ularga tartib raqami berilgan holda hamda sud ijrochilari Asaka shahar va Asaka tuman bo‘limlari xodimlarining shtatdagi soni, sud ijrochilari Asaka tuman bo‘limiga berilgan holda O‘zbekiston Respublikasi Adliya vazirligida saqlab qolinsin.

8. O‘zbekiston Respublikasi Bosh prokuraturasiga O‘zbekiston Respublikasi Moliya vazirligi bilan birgalikda Asaka shahar va Asaka tumani prokuraturasi, shu jumladan Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti bo‘limlari xodimlarining shtatdagi sonini Andijon viloyati Asaka tumanining tegishli bo‘linmalarga berish tavsiya etilsin.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari U.U. Rozukulov zimmasiga yuklansin.