Oʻzbekiston Respublikasi Prezidentining “Geologiya-qidiruv ishlarini tashkil etish va olib borish tizimi samaradorligini yanada oshirish chora-tadbirlari toʻgʻrisida” 2010-yil 27-avgustdagi PQ-1396-son qarorining 6-bandiga muvofiq hamda foydali qazilmalar zaxiralarini hisoblab chiqish materiallarini davlat ekspertizasidan oʻtkazishning yagona tartibini belgilash maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Foydali qazilmalar zaxiralari boʻyicha davlat komissiyasi toʻgʻrisidagi Nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Oʻzbekiston Respublikasi Vazirlar Mahkamasi huzuridagi Foydali qazilmalar zaxiralari boʻyicha davlat komissiyasi (keyingi oʻrinlarda Davlat komissiyasi deb ataladi) geologiya materiallarini davlat ekspertizasidan oʻtkazuvchi va foydali qazilmalar zaxiralarini tasdiqlovchi maxsus organ hisoblanadi.

2. Davlat komissiyasi oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek ushbu Nizomga amal qiladi.

3. Davlat komissiyasining oʻz vakolatiga kiruvchi masalalar boʻyicha qarorlari yer osti boyliklarini geologiya jihatidan oʻrganish, kon-qazib olish korxonalarini loyihalashtirish, qurish va rekonstruksiya qilish, mineral xomashyoni qazib olish va qayta ishlash hamda chiqindilarni saqlash va koʻmib tashlash maqsadida yer osti inshootlarini qurish va ulardan foydalanishni amalga oshiruvchi barcha yuridik va jismoniy shaxslar uchun majburiy hisoblanadi.

4. Quyidagilar Davlat komissiyasining asosiy vazifalari hisoblanadi:

oqilona iqtisodiy va ekologik asosda konlar zaxiralarini eng toʻliq va kompleks qazib olish talablariga muvofiq boʻlgan yer osti boyliklaridagi foydali qazilmalar zaxiralarini ishonchli hisoblab chiqish uchun konditsiyalarni tasdiqlash;

respublika mineral-xomashyo bazasi rivojlanishini taʼminlovchi foydali qazilmalar barcha turlarining zaxiralarini tasdiqlash;

geologiya materiallarini davlat ekspertizasidan oʻtkazish;

foydali qazilmalar zaxiralarini tasniflash hamda hisoblab chiqish, ularni geologiya-iqtisodiy jihatdan baholash va ularning sanoatdagi ahamiyatini aniqlashning maqbul prinsiplarini belgilash sohasida yagona siyosatni oʻtkazish.

5. Davlat komissiyasi oʻziga yuklangan vazifalarga muvofiq quyidagi funksiyalarni bajaradi:

foydali qazilmalar zaxiralarini tasniflash va hisoblab chiqishni reglamentlovchi normativ-huquqiy hujjatlarni ishlab chiqish, bosqichlar boʻyicha geologiya-qidiruv ishlarini olib borish, shuningdek ishlarning sanoatdagi ahamiyatini (kondinsiyalarning dastlabki texnik-iqtisodiy asoslashlarini, shu jumladan neft va gaz kondensati qazib olishning cheklangan koeffitsiyentlarini; konditsiyalarning texnik-iqtisodiy asoslashlarini geologik-iqtisodiy jihatdan baholash jarayonida uslubiy rahbarlikni amalga oshiradi;

konditsiyalar loyihalarining texnik-iqtisodiy asoslashlari ekspertizasini tashkil qiladi va har bir kon boʻyicha foydali qazilmalar zaxiralarini hisoblab chiqish uchun ushbu konditsiyalar parametrlari (koʻrsatkichlari)ni tasdiqlaydi;

neft va gaz kondensati zaxiralarini qazib olish cheklangan koeffitsiyentlarining texnik-iqtisodiy asoslashlari ekspertizasini tashkil qiladi va qazib olinadigan zaxiralarni hisoblab chiqish uchun ularni tasdiqlaydi;

foydali qazilmalar zaxiralarini hisoblab chiqqan holda geologiya materiallari ekspertizasini tashkil qiladi va foydali qazilmalarning hisoblab chiqilgan zaxiralarini tasdiqlaydi, mazkur zaxiralarning oʻrganilganlik va ishonchlilik darajasining foydali qazilmalar konlari zaxiralarining amaldagi tasniflariga muvofiqligini, ularning sanoatdagi ahamiyatini hamda konlarning (yoki ular qismlarining) sanoat yoʻli bilan oʻzlashtirishga tayyorligini belgilaydi. Foydali qazilmalar zaxiralari konni geologik oʻrganishning barcha bosqichlarida ahamiyatini konditsiyalarning texnik-iqtisodiy asoslashlari va zaxiralarni hisoblab chiqish boʻyicha taqdim etilgan materiallar ularning miqdori, sifati va sanoatdagi ahamiyati boʻyicha xolisona baholash imkonini bergan taqdirda tasdiqlanishi mumkin;

texnik-iqtisodiy asoslar mavjud boʻlgan taqdirda yangi konditsiyalarni tasdiqlaydi va qoʻshimcha geologiya-qidiruv ishlari olib borilganda yoki konni (uning ayrim qismlari va uchastkalarini qazib olishda dastlabki konditsiyalarda qabul qilinganlarga nisbatan geologik, kon-texnikaviy, iqtisodiy va boshqa shartlar oʻzgargan taqdirda, ular asosida hisoblab chiqilgan foydali qazilmalar zaxiralarini qayta tasdiqlaydi;

sanoat uchun ahamiyatini yoʻqotgan yoxud keyingi geologiya-qidiruv ishlarida yoki konni qazib olishda tasdiqlanmagan foydali qazilmalar zaxiralarini yer qaʼridan foydalanuvchining hisobidan belgilangan tartibda chiqarish toʻgʻrisida qaror qabul qiladi;

chiqindilarni saqlash va koʻmib tashlash maqsadida qurilish va (yoki) yer osti inshootlaridan foydalanish uchun beriladigan yer qaʼri uchastkalari boʻyicha geologiya materiallari ekspertizasini tashkil qiladi, ushbu uchastkalardan sifat koʻrsatkichlarini belgilangan maqsadda foydalanish uchun yaroqliligini aniqlaydi;

geologiya materiallari ekspertizasini tashkil qiladi va yer qaʼridan foydalanish huquqiga litsenziya bergan organning, “Sanoatgeokontexnazorat” davlat inspeksiyasining, yer qaʼridan foydalanuvchining taqdimnomasi boʻyicha, shuningdek litsenziya berilgan vaqtda foydali qazilmalarning yangi turlari yoki qoʻshimcha komponentlar mavjudligi, shuningdek foydali qazilmalarning yangi xossalari yoki sifatlari toʻgʻrisidagi maʼlumotlar aniqlangan taqdirda xatlovdan oʻtkazish natijalari boʻyicha foydali qazilmalar zaxiralarini qayta tasdiqlaydi.

6. Davlat komissiyasi quyidagi huquqlarga ega:

geologiya-qidiruv ishlarini olib boruvchi va foydali qazilmalarni qazib oluvchi tashkilotlardan Davlat komissiyasiga taqdim etilgan konditsiyalarning texnik-iqtisodiy asoslashlarini, neft va gaz kondensatini, foydali qazilmalar zaxiralarini qazib olish koeffitsiyentlarini, foydali qazilmalar hisobini Davlat komissiyasining koʻrib chiqishi uchun konditsiyalar, foydali qazilmalar zaxiralarining holati va harakati toʻgʻrisidagi maʼlumotlar bilan birga hisobotlar loyihalarini taqdim etish yillik rejalarini jadvallarini tekshirish uchun zarur boʻlgan geologiya axborotlari hamda boshqa maʼlumotlarni soʻrash va belgilangan tartibda olish;

yigʻilishlar, seminarlar oʻtkazish, Davlat komissiyasi vakolatiga kiradigan masalalar boʻyicha xorijiy mamlakatlarning shunga oʻxshash organlari bilan ilmiy-texnik aloqalar oʻrnatish;

Oʻzbekiston Respublikasi Vazirlar Mahkamasiga yer qaʼri toʻgʻrisidagi qonun hujjatlarini takomillashtirish boʻyicha takliflar kiritish.

7. Davlat komissiyasi mineral xomashyo konditsiyalari, neft va gaz kondensati qazib olish koeffitsiyentlari, tasdiqlanayotgan zaxiralar miqdori va sifati, sanoat maqsadida oʻzlashtirish uchun konlarning (yoki ular qismlarining) tayyorligi baholari boʻyicha qabul qilingan qarorlarning asoslanganligi yuzasidan qonun hujjatlariga muvofiq javob beradi.

8. Davlat komissiyasi tarkibi Oʻzbekiston Respublikasi Prezidenti tomonidan tasdiqlanadi.

9. Davlat komissiyasining raisi:

Davlat komissiyasi faoliyatiga umumiy rahbarlikni amalga oshiradi va unga yuklangan vazifalarning bajarilishi uchun javob beradi;

Davlat komissiyasi raisi oʻrinbosarlarining va Davlat komissiyasi aʼzolarining, Davlat komissiyasi kotibiyati rahbari va aʼzolarining ushbu Nizomda nazarda tutilgan vazifalarga muvofiq huquq va majburiyatlarini belgilaydi;

Davlat komissiyasi kotibiyatining shaxsiy tarkibini tasdiqlaydi va kotibiyat faoliyatini nazorat qiladi;

Davlat komissiyasining ish rejalarini, Davlat komissiyasiga tushgan materiallarni koʻrib chiqish jadvallarini tasdiqlaydi;

Davlat komissiyasi majlislariga raislik qiladi.

Rais boʻlmagan taqdirda Davlat komissiyasi majlisi Davlat komissiyasi raisi oʻrinbosarlaridan biri tomonidan oʻtkaziladi.

10. Davlat komissiyasi tarkibiga manfaatdor vazirliklar va idoralarning, shuningdek respublika yetakchi kon qazib olish korxonalarining rahbarlari va rahbarlarining oʻrinbosarlari kiradi.

11. Oʻzbekiston Respublikasi Davlat geologiya va mineral resurslar qoʻmitasi huzurida faoliyat koʻrsatuvchi, uchta shtat birligidan iborat tarkibdagi kotibiyat (keyingi oʻrinlarda Davlat komissiyasi kotibiyati deb ataladi) Davlat komissiyasining ishchi organi hisoblanadi.

12. Kotibiyat Davlat komissiyasi tomonidan tasdiqlangan Nizomga muvofiq:

bajaruvchi tashkilotlar tomonidan taqdim etilgan konditsiyalarning texnik-iqtisodiy asoslashlari va foydali qazilmalar zaxiralarini hisoblab chiqish materiallarini, shuningdek boshqa geologik materiallarni koʻrib chiqish uchun Davlat komissiyasiga qabul qilib oladi;

koʻrib chiqilayotgan obyektlarning murakkabligiga koʻra ekspertizalarning zarur turlarini va ularni oʻtkazish uchun ekspertlarning shaxsiy tarkibini belgilaydi;

koʻrib chiqilayotgan masalalar boʻyicha ekspertlar tomonidan xulosalarning oʻz vaqtida taqdim etilishini, ularning toʻliqligi va xolisonaligini nazorat qiladi;

taqdim etilgan materiallarning bajaruvchi tashkilotlaridan mineral xomashyo uchun konditsiyalarning texnik-iqtisodiy asoslashlarini, neft va gaz kondensati qazib olish koeffitsiyentlarini, foydali qazilmalar zaxiralari hisobini, chiqindilarni saqlash va koʻmib tashlash maqsadida foydalanish uchun moʻljallanayotgan yer qaʼri uchastkalari boʻyicha geologik va boshqa maʼlumotlarning toʻliqligi bahosini tekshirish uchun zarur boʻlgan qoʻshimcha maʼlumotlarni soʻrab oladi;

geologiya-qidiruv ishlarini va foydali qazilmalarni qazib olish ishlarini olib borayotgan tashkilotlardan Davlat komissiyasi tomonidan koʻrib chiqish uchun konditsiyalar loyihalarini, zaxiralarni hisoblab chiqishga doir hisobotlarni va boshqa materiallarni taqdim etish jadvallarini soʻrab oladi, Davlat komissiyasi kotibiyati bilan kelishgan holda Davlat komissiyasi tomonidan taqdim etilgan materiallarni koʻrib chiqish jadvallarini tuzadi;

Davlat komissiyasi tomonidan konditsiyalarning texnik-iqtisodiy asoslashlarini, foydali qazilmalar zaxiralari hisobini koʻrib chiqish natijalarini umumlashtiradi va tahlil qiladi hamda kamchiliklarni bartaraf etish, geologik va boshqa axborotlarning toʻliqligi va sifatini oshirish, zaxiralarni hisoblashning va konlarni geologik-iqtisodiy baholashning ishonchliligini oshirish boʻyicha tavsiyalar ishlab chiqadi, foydali qazilmalar zaxiralarining hisobi bilan birga koʻrib chiqish yakunlari boʻyicha har yilgi umumlashtirishlarni tashkil qiladi, ular Davlat komissiyasi raisi bilan kelishgan holda nashr etiladi va manfaatdor tomonlarga yuboriladi;

Davlat geologiya va mineral resurslar qoʻmitasi tomonidan yuritiladigan Oʻzbekiston Respublikasi foydali qazilmalari zaxiralarining Davlat balansini tahlil qiladi hamda geologiya-qidiruv ishlari natijalari boʻyicha yangi maʼlumotlarni va konlardan foydalanilishini hisobga olgan holda unga tuzatishlar kiritish, shuningdek operativ hisoblar boʻyicha balansga qabul qilingan zaxiralarni davlat ekspertizasiga taqdim etish yuzasidan tavsiyalar beradi;

manfaatdor vazirliklar, idoralar va tashkilotlar ishtirokida konlar zaxiralari tasniflarini va foydali qazilmalarning prognoz resurslarini, foydali qazilmalarning har xil turlari konlariga nisbatan zaxiralar tasniflarini qoʻllanish boʻyicha yoʻriqnomalarni, mineral xomashyoga konditsiyalarning texnik-iqtisodiy asoslashlarini hamda Davlat komissiyasi vakolatiga kiradigan boshqa normativ hujjatlarning mazmuni, ularni rasmiylashtirish va Davlat komissiyasiga taqdim etish tartibi toʻgʻrisidagi yoʻriqnomalarni ishlab chiqadi;

mineral xomashyoga konditsiyalarning asoslanishini va hisobini, neft va gaz kondensati qazib olish koeffitsiyentlari, foydali qazilmalar zaxiralari hisobi masalalari boʻyicha metodik hujjatlarni ishlab chiqishda qatnashadi;

Davlat komissiyasi vakolatiga kiradigan masalalar boʻyicha materiallar va qarorlar loyihalari tayyorlanishini va koʻrib chiqish uchun Davlat komissiyasiga kiritilishini taʼminlaydi.

13. Davlat komissiyasi kotibiyati toʻgʻrisidagi Nizom Davlat komissiyasi qarori bilan tasdiqlanadi.

Davlat komissiyasi kotibiyati tarkibi Davlat komissiyasi qarori bilan tasdiqlanadi. Davlat komissiyasi kotibiyati aʼzolarini ishga qabul qilish va ishdan boʻshatish Davlat komissiyasi qarori asosida amalga oshiriladi.

14. Mineral xomashyoga loyihalar, foydali qazilmalar zaxiralarini hisoblab chiqish materiallari hamda Davlat komissiyasi koʻrib chiqishi uchun tushadigan boshqa geologik ekspertiza ham Davlat komissiyasi kotibiyati aʼzolari tomonidan, ham jalb etilgan ekspertlar tomonidan amalga oshiriladi.

Davlat komissiyasi eksperti toʻgʻrisidagi Nizom, ekspertlarning shaxsiy tarkibi Davlat komissiyasi tomonidan tasdiqlanadi.

15. Davlat komissiyasi kotibiyati tomonidan tayyorlangan komissiya qarorlari loyihalari zarur materiallar bilan birga Davlat komissiyasi raisiga yuboriladi, u komissiya majlisida ularni koʻrib chiqish muddatlarini tasdiqlaydi.

16. Davlat komissiyasining foydali qazilmalar zaxiralarini hisoblab chiqish uchun konditsiyalarni, neft va gaz kondensati qazib olish koeffitsiyentlarini hamda foydali qazilmalarning hisoblab chiqilgan zaxiralarini tasdiqlash toʻgʻrisidagi, shuningdek koʻrib chiqiladigan boshqa masalalar boʻyicha qarori komissiya majlisida, ekspertlar, manfaatdor vazirliklar, idoralar va materiallarni taqdim etgan tashkilotlar vakillari ishtirokida qabul qilinadi.

Davlat komissiyasi majlislari komissiya aʼzolari roʻyxatdagi tarkibining kamida uchdan ikki qismi qatnashgan taqdirda oʻtkaziladi. Kvorum boʻlmagan taqdirda Davlat komissiyasining majlisga kelgan aʼzolari tomonidan majlisni kechiktirish toʻgʻrisida qaror qabul qilinadi, majlisni oʻtkazishning yangi sanasi va vaqti toʻgʻrisida qoʻshimcha ravishda xabar qilinadi.

17. Davlat komissiyasi qarorlari komissiyaning majlisda qatnashayotgan aʼzolarining koʻpchilik ovozi bilan qabul qilinadi. Ovozlar teng boʻlib qolgan taqdirda Davlat komissiyasi raisining ovozi hal qiluvchi hisoblanadi. Davlat komissiyasining ayrim aʼzolari qabul qilingan qarorga rozi boʻlmagan taqdirda ular oʻzining alohida fikrini yozma ravishda bayon qilishi va uni Davlat komissiyasi majlisi protokoliga ilova qilishi mumkin. Yakuniy qaror qabul qilish uchun materiallar qoʻshimcha ekspertiza oʻtkazishga yuborilishi mumkin, shundan keyin ular Davlat komissiyasining kengaytirilgan majlisiga takroran koʻrib chiqish uchun kiritiladi.

18. Zarur hollarda foydali qazilmalar zaxiralari konditsiyalarini va hisobini tasdiqlash masalalari Davlat komissiyasining koʻchma majlislarida koʻrib chiqilishi mumkin.

19. Davlat komissiyasi majlislarida qabul qilingan qarorlar protokollar bilan rasmiylashtiriladi, ularning nusxalari ekspertiza materiallari bilan birga ikki hafta muddatda materiallarni taqdim etgan bajaruvchi tashkilotga yuboriladi.

20. Konditsiyalarning, foydali qazilmalarning hisoblab chiqilgan zaxiralari loyihalari yetarli darajada asoslanmagan, chiqindilarni saqlash va koʻmib tashlash maqsadida foydalanish uchun yer qaʼri uchastkalarining yaroqliligi toʻgʻrisidagi maʼlumotlar yetarli boʻlmagan taqdirda taqdim etilgan materiallar Davlat komissiyasi protokoli va ekspertlar xulosalari nusxalari bilan birga bajaruvchi tashkilotga qaytariladi.

Materiallar Davlat komissiyasi protokolida bayon qilingan Davlat komissiyasi mulohazalari va tavsiyalarga muvofiq puxtalashtirilgan taqdirda ular takroran koʻrib chiqish uchun Davlat komissiyasiga taqdim etilishi mumkin.

21. Foydali qazilmalarning razvedka qilingan zaxiralarini davlat hisobiga qoʻyishga, konni sanoat asosida oʻzlashtirish uchun kiritishga, yer qaʼri uchastkalaridan chiqindilarni saqlash va koʻmib tashlash maqsadida inshootlar qurish va ulardan foydalanishga faqat Davlat komissiyasining ijobiy xulosasi mavjud boʻlgan taqdirda yoʻl qoʻyiladi.

22. Davlat komissiyasi qarorlari yuzasidan qonun hujjatlarida belgilangan tartibda shikoyat qilinishi mumkin.

23. Davlat komissiyasiga taqdim etilgan materiallarni koʻrib chiqish muddati 3 oydan oshmasligi kerak.

24. Davlat komissiyasi majlislarida uning faoliyatiga taalluqli boʻlgan normativ-metodik hujjatlar loyihalari ham koʻrib chiqilishi mumkin.

25. Davlat komissiyasi kotibiyatining taʼminoti va geologik-qidiruv ishlari budjet mablagʻlari hisobiga oʻtkazilgan obyektlar boʻyicha jalb etilgan ekspertlar xizmatlari uchun toʻlovlar boʻyicha xarajatlarni moliyalashtirish belgilangan tartibda tasdiqlangan va roʻyxatdan oʻtkazilgan xarajatlar smetasiga muvofiq Davlat budjeti mablagʻlari hisobiga amalga oshiriladi. Koʻrsatib oʻtilgan pul mablagʻlari geologiya-qidiruv ishlarining har yilgi dasturlarida nazarda tutiladi, amalda moliyalashtirish esa Oʻzbekiston Respublikasi Davlat geologiya va mineral resurslar qoʻmitasi orqali amalga oshiriladi.

Geologik-qidiruv ishlari bajaruvchi tashkilot mablagʻlari hisobiga oʻtkazilgan obyektlar boʻyicha jalb etilgan ekspertlar xizmatlari uchun toʻlov ushbu tashkilotlar bilan tuzilgan shartnomalarga muvofiq amalga oshiriladi.

Davlat komissiyasiga taqdim etilgan konditsiyalar loyihalarini va foydali qazilmalar zaxiralarini hisoblab chiqish materiallarini koʻrib chiqish, shuningdek geologiya materiallarining davlat ekspertizasi tuzilgan shartnoma shartlariga muvofiq, shartnomaviy asosda amalga oshiriladi. Materiallarni taqdim etgan tashkilotlar, shuningdek jalb etiladigan ekspertlar bilan shartnomalar tuzish Oʻzbekiston Respublikasi Davlat geologiya va mineral resurslar qoʻmitasi raisi tomonidan amalga oshiriladi.

Ishlar va xizmatlarning koʻrsatib oʻtilgan turlariga narxlar Davlat geologiya va mineral resurslar qoʻmitasi taqdimnomasiga binoan, Oʻzbekiston Respublikasi Moliya vazirligi bilan kelishilgan Davlat komissiyasi qarori bilan tasdiqlanadi.

26. Davlat komissiyasi tegishli blankalardan foydalanadi. Davlat komissiyasi protokollari Oʻzbekiston Respublikasi Vazirlar Mahkamasi tomonidan muhrlanadi.