Oʻzbekiston Respublikasi Oliy Majlisi Qonunchilik palatasining “Toshkent viloyatining Zangiota va Toshkent tumanlarini birlashtirish hamda Toshkent viloyatining Zangiota, Qibray tumanlari va Toshkent shahrining Hamza tumani hududlarini qisman oʻzgartirish toʻgʻrisida” 2010-yil 12-avgustdagi 137-II-sonli va Oʻzbekiston Respublikasi Oliy Majlisi Senatining “Toshkent viloyatining Zangiota va Toshkent tumanlarini birlashtirish hamda Toshkent viloyatining Zangiota, Qibray tumanlari va Toshkent shahrining Hamza tumani hududlarini qisman oʻzgartirish toʻgʻrisida” 2010-yil 29-avgustdagi 96-II-sonli qarorlari amalga oshirilishini taʼminlash maqsadida Vazirlar Mahkamasi qaror qiladi:

1. Toshkent viloyatining Zangiota va Toshkent tumanlarini birlashtirish hamda Toshkent viloyatining Zangiota, Qibray tumanlari va Toshkent shahrining Hamza tumani hududlarini qisman oʻzgartirish bilan bogʻliq tashkiliy masalalarni hal etish boʻyicha 1-ilovaga* muvofiq tarkibda Respublika komissiyasi tashkil etilsin.

2. Respublika komissiyasi (B.A.Xoʻjayev):

ikki oy muddatda Toshkent viloyatining Zangiota va Toshkent tumanlari birlashtirilishi, shuningdek Zangiota tumani hududining bir qismi Toshkent viloyatining Qibray tumaniga va Toshkent shahrining Hamza tumaniga berilishi bilan bogʻliq zarur tashkiliy-texnik tadbirlar kompleksi ishlab chiqilishini va amalga oshirilishini taʼminlasin;

ikki hafta muddatda — Toshkent viloyati hokimligi, Oʻzbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi, boshqa manfaatdor vazirliklar va idoralar bilan birgalikda Toshkent viloyati Zangiota tumani davlat boshqaruvi organlari hududiy boʻlinmalari xodimlarining cheklangan umumiy sonini, tuzilmasi va mehnatga haq toʻlash fondlarini aniqlashga doir tashkiliy masalalarni hal etsin;

bir oy muddatda — Oʻzbekiston Respublikasi Iqtisodiyot vazirligi va Moliya vazirligi, Toshkent viloyati va Toshkent shahri hokimliklari bilan birgalikda tegishli ravishda Toshkent viloyatining Zangiota va Qibray tumanlari hamda Toshkent shahrining Hamza tumani budjetining va ularni ijtimoiy-iqtisodiy rivojlantirishning prognoz parametrlarini belgilasin;

Toshkent viloyati va Toshkent shahri hokimliklari bilan birgalikda tashkiliy davrda iqtisodiyot tarmoqlarining aniq, barqaror va bir maromda ishlashini, shuningdek yuzaga keladigan ijtimoiy masalalarning oʻz vaqtida hal etilishini taʼminlasin;

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda Toshkent viloyatining Toshkent va Zangiota tumanlari birlashtirilishi munosabati bilan davlat va xoʻjalik boshqaruvi organlari hududiy boʻlinmalari tugatilishi va ular sonining qisqarishi natijasida boʻshab qolayotgan shaxslarni ishga joylashtirish chora-tadbirlarini koʻrsin, zaruriyat boʻlganda ularni qayta tayyorlash va malakasini oshirish tadbirlari amalga oshirilishini taʼminlasin.

3. Oʻzbekiston Respublikasi Davlat statistika qoʻmitasi Toshkent viloyati va Toshkent shahri hokimliklari bilan birgalikda Toshkent viloyatining Zangiota va Qibray tumanlari, Toshkent shahrining Hamza tumani maʼmuriy hududlari kengayishini hisobga olgan holda statistika koʻrsatkichlariga tegishli oʻzgartirishlar kiritsin.

4. Toshkent viloyati Zangiota tumani hokimligi apparati tuzilmasi boshqaruv xodimlarining cheklangan umumiy soni 18 nafardan iborat etib 2-ilovaga muvofiq tasdiqlansin.

5. Quyidagilar:

birlashtirilayotgan Zangiota va Toshkent tumanlari ichki ishlar organlari xodimlarining mavjud soni, ular Toshkent viloyati Zangiota tumani ichki ishlar organlarining tegishli boʻlinmalariga berilgan holda, Oʻzbekiston Respublikasi Ichki ishlar vazirligida;

birlashtirilayotgan Zangiota va Toshkent tumanlarida faoliyat koʻrsatayotgan fuqarolik holati dalolatnomalarini yozish organlari va davlat notarial idoralari ularga tartib raqami berilgan holda, shuningdek Zangiota va Toshkent tumanlari sud ijrochilari boʻlimlarining boʻshab qoladigan xodimlari soni Toshkent viloyatining boshqa tumanlari (shaharlari) sud ijrochilari boʻlimlariga berish huquqi bilan Oʻzbekiston Respublikasi Adliya vazirligida saqlab qolinsin.

6. Oʻzbekiston Respublikasi Bosh prokuraturasiga Oʻzbekiston Respublikasi Moliya vazirligi bilan birgalikda birlashtirilayotgan Zangiota va Toshkent tumanlarining prokuratura hududiy organlari, shu jumladan Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti boʻlimlari xodimlarining shtatdagi sonini Toshkent viloyatining Zangiota tumani boʻyicha tegishli boʻlinmalarga berish tavsiya etilsin.

7. Milliy xavfsizlik xizmatining Davlat chegaralarini himoya qiluvchi qoʻmitasi, Oʻzbekiston Respublikasi Davlat bojxona qoʻmitasi va Ichki ishlar vazirligi chegara tumani huzuridagi doimiy ishlaydigan shtab doirasida, Zangiota tumani hokimligi bilan oʻzaro hamkorlikda Oʻzbekiston Respublikasining Davlat chegarasini qoʻriqlashni va uning daxlsizligini taʼminlash ustidan nazorat qilishning yagona tizimini tashkil etishni takomillashtirishga, Qozogʻiston Respublikasi bilan chegara boʻylab davlat bojxona xizmati va ichki ishlar organlari boʻlinmalarining samarali faoliyat koʻrsatishiga doir zarur tadbirlarni amalga oshirsinlar.

8. Toshkent viloyati va Toshkent shahri hokimliklari ikki oy muddatda Oʻzbekiston Respublikasi Iqtisodiyot vazirligi hamda boshqa manfaatdor vazirliklar va idoralar bilan birgalikda Toshkent viloyatining Zangiota va Qibray tumanlarini hamda Toshkent shahrining Hamza tumanini yanada ijtimoiy-iqtisodiy rivojlantirish boʻyicha tadbirlar kompleksini ishlab chiqsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A.Xoʻjayev zimmasiga yuklansin.