Respublika tarmoqlari, korxonalari va muassasalarini 2002/2003-yil kuz-qish davrida barqaror ishlashga o‘z vaqtida tayyorlashni ta’minlash maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, uyushmalar, korporatsiyalar, kompaniyalar, birlashmalar, korxonalar va tashkilotlar 2001/2002-yil kuz-qish davriga tayyorgarlik ko‘rish va ishlash bo‘yicha chora-tadbirlarni amalga oshirishda yo‘l qo‘yilgan kamchiliklar va nuqsonlarni tanqidiy o‘rganib chiqsinlar va ularni hisobga olgan holda:

bir hafta muddatda — iqtisodiyot tarmoqlarini 2002/2003-yil kuz-qish davriga tayyorlash masalalarini hal etish bo‘yicha hududiy komissiyalar tashkil etsinlar;

o‘n kun muddatda — shaharlar, tumanlar, korxonalar, uy-joylarni, ijtimoiy soha, savdo va umumiy ovqatlanish muassasalarini, transport, qurilish tashkilotlarini, chorvachilik binolarini, parrandachilik fabrikalarini, qozonxonalarni va muhandislik inshootlarini 2002/2003-yil kuz-qish davrida barqaror ishlashga tayyorlab qo‘yish yuzasidan tadbirlarni ishlab chiqsinlar va tasdiqlasinlar. Maktabgacha bolalar muassasalariga, maktablarga, akademik litseylarga, kasb-hunar kollejlariga, kasalxonalarga, poliklinikalarga, uy-joylarga issiqlik uzluksiz berib turilishiga alohida e’tibor bersinlar;

2002-yil 1-sentabrgacha — “O‘zbekenergo” davlat-aksiyadorlik kompaniyasi bilan birgalikda kuz-qish davrida energiya tizimi eng zo‘riqqan soatlarda elektr energiyasini iste’mol qilishni kamaytirish tadbirlarini ishlab chiqsinlar;

shu yil 1-sentabrgacha — yong‘inga qarshi idoralar bilan birgalikda uy-joylar, binolar va inshootlar ahvolini ularning texnik normalarga muvofiqligi yuzasidan tekshirib chiqsinlar;

shu yil 15-sentabrgacha — qozonxonalarni mukammal tuzatishni tugallasinlar hamda ularning kuz-qish davrida ishlashga tayyorligi to‘g‘risida tegishli dalolatnomalarni rasmiylashtirsinlar va dalolatnomalar nusxalarini hududiy komissiyalarga taqdim etsinlar.

shu yil 1-oktabrgacha — gaz yoqilg‘isini aholi uchun bo‘shatish maqsadida barcha korxonalar va tashkilotlarda ularning qozonxonalari kuz-qish davrida yoqilg‘ining zaxira turlari bilan uzluksiz ishlashini ta’minlash uchun suyuq va qattiq yoqilg‘ining zarur zaxiralarini yaratsinlar. Yoqilg‘i-energetika resurslari faqat ajratilgan limitlar doirasida sarflanishi ustidan qattiq nazorat qilinishini va 2003-yil mart oyigacha bo‘lgan davrda yonilg‘i mazuti yetkazib berishni taqsimlashning tasdiqlangan jadvali bajarilishini ta’minlasinlar;

O‘zbekiston Respublikasi Moliya vazirligi bilan birgalikda kuz-qish davriga tayyorgarlik ko‘rish bo‘yicha ayrim tadbirlarni bajarishga mablag‘larni 2002-yil IV choragi o‘rniga III choragida oldindan ajratish maqsadga muvofiqligi masalasini va imkoniyatini ishlab chiqsinlar.

2. “O‘zbekneftgaz” milliy xolding kompaniyasi, “O‘zbekenergo” davlat-aksiyadorlik kompaniyasi, “O‘zkommunxizmat” agentligi, O‘zbekiston Respublikasi Makroiqtisodiyot va statistika vazirligi, Qishloq va suv xo‘jaligi vazirligi, “O‘zdavneftgazinspeksiya”, “Sanoatkontexnazorat” agentligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

isitish mavsumi boshlangungacha respublika korxonalari va tashkilotlarining mavjud qozonxona asbob-uskunalarini, har bir qozonxonaning foydali ish koeffitsiyentini hisobga olgan holda, ularning tabiiy gazni qabul qilish bo‘yicha texnik talablarga muvofiqligi yuzasidan tekshirib chiqsinlar. Texnik talablarga javob bermaydigan qozonxonalar gaz tarmoqlaridan uzib qo‘yilsin;

2002/2003-yil kuz-qish davrida respublika aholisini tabiiy gaz bilan barqaror ta’minlash uchun shu yilning 1-sentabrigacha kuz-qish davrida limit doirasida uzib qo‘yilmaydigan korxonalar ro‘yxatini, shuningdek 2002/2003-yil kuz-qish davrida elektr stansiyalarini va O‘zbekiston Respublikasining boshqa sanoat korxonalarini yoqilg‘ining zaxira turlariga o‘tkazish jadvalini ishlab chiqsinlar va tasdiqlash uchun Vazirlar Mahkamasiga kiritsinlar.

3. “O‘zkommunxizmat” agentligi, “O‘zbekneftgaz” kompaniyasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2002/2003-yil kuz-qish davrida iste’molchilarga gaz belgilangan limitlar doirasida va 2002/2003-yil kuz-qish davrida elektr stansiyalari va O‘zbekiston Respublikasining boshqa sanoat korxonalarini yoqilg‘ining zaxira turlariga o‘tkazish jadvaliga muvofiq yetkazib berilishini ta’minlasinlar.

“O‘zbekneftgaz” milliy xolding kompaniyasi:

gaz taqsimlash stansiyalari tomonidan tabiiy gaz shartnomalarda belgilangan ko‘rsatkichlar doirasida yetkazib berilishini;

2002-yil aprel oyi 2003-yil mart oyi davrida yonilg‘i mazuti yetkazib berilishini taqsimlashning tasdiqlangan jadvali qat’iy bajarilishini ta’minlasin.

4. “O‘zbekenergo” davlat-aksiyadorlik kompaniyasi 2002-yil 1-noyabrgacha:

elektr stansiyalarida tasdiqlangan jadvallarga muvofiq suyuq va qattiq yoqilg‘i jamg‘arilishini;

elektr stansiyalari va elektrtarmoq obyektlarining zo‘riqish eng ko‘p davrda ishlaydigan asosiy texnologik asbob-uskunalari mukammal ta’mirlanishi tugallanishini ta’minlasin.

5. “O‘zbekiston temir yo‘llari” davlat-aksiyadorlik kompaniyasi:

neft, gaz kondensati, neft mahsulotlari, ko‘mir, tuz hamda xo‘jaliklarni 2002/2003-yil kuz-qish davrida ishlashga tayyorlab qo‘yish bilan bog‘liq boshqa xalq xo‘jaligi yuklari uzluksiz tashilishini ta’minlasin;

vazirliklar, idoralar, xo‘jalik birlashmalari, tashkilotlar, korxonalar bilan birgalikda vagonlar, ayniqsa sisternalarning normativdan ortiq turib qolishiga yo‘l qo‘ymaslik, ortish-tushirish, ayniqsa kechasi, dam olish va bayram kunlarida ortish-tushirish ishlarining bir maromda olib borilishini ta’minlash, kirish yo‘llarini ta’mirlash, yuklarning sovuq paytda yaxlab qolishining oldini olish yuzasidan aniq chora-tadbirlar ko‘rsinlar.

6. “O‘zkimyosanoat” davlat-aksiyadorlik kompaniyasi, “O‘zqurilishmateriallari” kompaniyasi, kon-metallurgiya sanoati korxonalari hamda energiyani ko‘p iste’mol qiluvchi boshqa korxonalar qish oylarida gaz, elektr va issiqlik energiyasi iste’mol qilishni kamaytirish maqsadida 2002-yil 1-sentabrgacha:

“O‘zbekenergo” davlat-aksiyadorlik kompaniyasi, “O‘zbekneftgaz” milliy xolding kompaniyasi bilan birgalikda o‘zlariga qarashli asbob-uskunalarning yuqori zo‘riqish davrida texnologiya jihatidan yo‘l qo‘yiladigan ish rejimlarini ishlab chiqsinlar;

asosiy asbob-uskunalarni ta’mirlash jadvalini ishlab chiqsinlar va uni “O‘zbekneftgaz” milliy xolding kompaniyasi, “O‘zbekenergo” davlat-aksiyadorlik kompaniyasi va “O‘zkommunxizmat” agentligi bilan kelishsinlar, bu ishlarni yilning qish oylarida amalga oshirsinlar.

7. “Sanoatkontexnazorat” agentligi va O‘zbekiston Respublikasi Sog‘liqni saqlash vazirligi iqtisodiyot tarmoqlarini 2002/2003-yil kuz-qish davriga tayyorlashning borishi ustidan belgilangan tartibda texnik va sanitariya nazoratini amalga oshirsinlar.

8. Surxondaryo viloyati hokimligi Xo‘jaikon tuz konidan texnik tuz respublikaning issiqlik bilan ta’minlovchi korxonalariga tuzilgan shartnomalarga muvofiq o‘z vaqtida yetkazib berilishi ustidan qat’iy nazorat o‘rnatsin.

9. “Ko‘mir” aksiyadorlik birlashmasi qattiq yoqilg‘i umumta’lim, davolash-profilaktika muassasalarining buyurtmanomalariga to‘liq muvofiq yuklab jo‘natilishini nazarda tutsin, bunda yetkazib berilayotgan ko‘mirning sifatiga alohida e’tiborni qaratsin.

10. “O‘zdavneftgazinspeksiya” va “O‘zdavenergonazorat” agentligi 2002/2003-yil kuz-qish davrida respublika iqtisodiyoti tarmoqlarida yoqilg‘i-energetika resurslaridan samarali foydalanilishi ustidan nazoratni kuchaytirsinlar.

11. Respublika iqtisodiyoti tarmoqlarini 2002/2003-yil kuz-qish davrida ishlashga tayyorlash bo‘yicha respublika komissiyasi tarkibi ilovaga muvofiq tasdiqlansin.

Respublika komissiyasi vazirliklar, idoralar, uyushmalar, korporatsiyalar, kompaniyalar va boshqa tashkilotlarning, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari rahbarlarining o‘zlariga qarashli obyektlarni 2002/2003-yil kuz-qish davriga tayyorlashning borishi to‘g‘risidagi hisobotlarini har oyda eshitib borsin.

Hududiy komissiyalar iqtisodiyot tarmoqlarini 2002/2003-yil kuz-qish davriga tayyorlashning borishini har oyning 15-kunigacha ko‘rib chiqsinlar va Vazirlar Mahkamasiga axborot taqdim etsinlar.

12. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari K.N. To‘laganov zimmasiga yuklansin.