Dunyoning eng qadimgi dinlaridan biri zardushtiylikning muqaddas kitobi “Avesto”ning jahon madaniyati va dinlar tarixida tutgan o‘rnini hisobga olgan holda hamda YUNESKO bosh konferensiyasining 1999-yil noyabr oyida Parijda o‘tgan 30-sessiyasining “Avesto” yaratilganining 2700 yilligini dunyo miqyosida keng nishonlash haqidagi qaroridan kelib chiqib Vazirlar Mahkamasi qaror qiladi:

1. O‘zbekiston Respublikasining taklifiga binoan YUNESKO bosh konferensiyasi 30-sessiyasining “Avesto” yaratilganining 2700 yilligini YUNESKO rahnamoligida 2001-yilda dunyo miqyosida keng nishonlash haqidagi qarori to‘la qo‘llab-quvvatlansin va asos uchun qabul qilinsin.

2. “Avesto” yaratilganining 2700 yilligini nishonlashga tayyorgarlik ko‘rish va uni o‘tkazish Respublika tashkiliy qo‘mitasining tarkibi 1-ilovaga muvofiq tasdiqlansin.

Respublika tashkiliy qo‘mitasi “Avesto” yaratilganining 2700 yilligini nishonlashga tayyorgarlik ko‘rish va uni o‘tkazish tadbirlari rejasini bir oy muddatda ishlab chiqsin va amalga oshirishga kirishsin.

3. O‘zbekiston Respublikasi Fanlar akademiyasi Xorazm Ma’mun akademiyasi, Madaniyat ishlari vazirligi, Tashqi ishlar vazirligi, Respublika “Ma’naviyat va ma’rifat” kengashi, YUNESKO ishlari bo‘yicha milliy komissiya, Din ishlari bo‘yicha qo‘mita, Xorazm viloyati hokimligi va Toshkent Islom universitetining jahon dinlarini qiyosiy o‘rganish YUNESKO kafedrasi bilan birgalikda 2001-yilning oktyabr oyida “Avesto” va uning insoniyat taraqqiyotidagi o‘rni” mavzuida xalqaro ilmiy konferensiya va tantanali bayram tadbirlarini o‘tkazsin.

4. Xorazm viloyati hokimligiga “Avesto” yaratilganining 2700 yilligi bayrami munosabati bilan Urganch shahrida bog‘ barpo etish va shaharni ko‘kalamzorlashtirish topshirilsin.

5. O‘zbekiston Respublikasi Fanlar akademiyasi:

“Avesto”ning xorijiy davlatlarda va fuqarolarda saqlanayotgan nusxalarini aniqlash hamda ularning katalogini tuzish chora-tadbirlarini belgilasin;

“Oltin meros” xalqaro jamg‘armasi, “Sharq” nashriyot-matbaa konserni bilan birgalikda “Avesto”ning to‘la matnini o‘zbek tilida nashrga tayyorlashni va chop etishni ta’minlasin.

6. O‘zbekiston Respublikasi Davlat matbuot qo‘mitasi O‘zbekiston Respublikasi Fanlar akademiyasi bilan birgalikda “Avesto” haqida tayyorlangan ilmiy va badiiy asarlarni chop etishni rejalashtirsin.

7. O‘zbekiston pochta va telekommunikatsiyalar agentligi “Avesto” yaratilganining 2700 yilligiga bag‘ishlab pochta markalari, xatjildlar chiqarsin va ularning savdosini tashkil etsin.

8. O‘zbekiston Teleradiokompaniyasi va boshqa ommaviy axborot vositalari “Avesto” yaratilganining 2700 yilligini nishonlashga tayyorgarlik ko‘rish va uni o‘tkazish bilan bog‘liq tadbirlarni teleko‘rsatuv va radio eshittirishlarda, gazeta va jurnallarda keng yoritsinlar.

O‘zbekiston Milliy axborot agentligi, “Jahon” axborot agentligi va O‘zbekiston Teleradio kompaniyasi “Avesto” yaratilganining 2700 yilligi munosabati bilan amalga oshirilayotgan ishlarni targ‘ib qilish, xorijiy axborot vositalarini zarur ma’lumotlar bilan ta’minlash chora-tadbirlarini ko‘rsinlar.

9. O‘zbekiston Respublikasi Moliya vazirligi “Avesto” yaratilganining 2700 yilligini nishonlash xarajatlari uchun belgilangan tartibda respublika budjeti, Xorazm viloyati budjeti hamda viloyat tashkilotlari va korxonalarining homiylik badallari hisobidan qoplanishini hisobga olgan holda 2-ilovaga* muvofiq mablag‘ ajratsin, shu jumladan 2000-yildagi qismini tasdiqlangan budjet doirasida, 2001-yildagi qismini shu yilning davlat budjetida rejalashtirsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H. Karomatov zimmasiga yuklansin.