Yangi uzilgan sabzavot, meva, poliz mahsulotlari, uzum yetishtirishni ko‘paytirish, tayyorlash, yetishtirilgan hosilni o‘z vaqtida, sifatli qayta ishlash va sotishni ta’minlash uchun shart-sharoitlar yaratish, shuningdek ularni eksport qilishni kengaytirish maqsadida Vazirlar Mahkamasi qaror qiladi:

1. O‘zbekiston Respublikasi Makroiqtisodiyot va statistika vazirligi tomonidan “O‘zmevasabzavotuzumsanoat-xolding” xolding kompaniyasi, O‘zbekiston Respublikasi Qishloq va suv xo‘jaligi vazirligi, hududiy “Mevasabzavot” birlashmalari, “O‘zbekbirlashuv” aksiyadorlik kompaniyasi, hududiy “Matlubotsavdo” aksiyadorlik kompaniyalari hamda Dehqon va fermer xo‘jaliklari uyushmasi bilan birgalikda ishlab chiqilgan 1999-yilda meva-sabzavot mahsulotlarining asosiy turlarini va uzum yetishtirish, ularni sanoat yo‘li bilan qayta ishlash, iste’mol qilish va eksport qilishning prognoz balansi 1, 1a, 1b, 1v, 1g, 1d-ilovalarga* muvofiq ma’lumot uchun qabul qilinsin.

O‘zbekiston Respublikasi Makroiqtisodiyot va statistika vazirligi, zaruriyat bo‘lganda, 1999-yilning birinchi yarim yilligi yakunlari bo‘yicha meva-sabzavot mahsulotlarining asosiy turlarini va uzum yetishtirish va ulardan foydalanishning tasdiqlangan prognoz ko‘rsatkichlariga tuzatish kiritish yuzasidan takliflar kiritsin.

2. Qoraqalpog‘iston Respublikasi Vazirlar Kengashi va viloyatlar hokimliklari:

meva-sabzavot mahsulotlari va uzum asosan “O‘zmevasazavotuzumsanoat-xolding” xolding kompaniyasi va hududiy “Mevasabzavot” birlashmalarining ixtisoslashtirilgan xo‘jaliklarida yetishtirilishini ta’minlasinlar, bunda prognoz balansiga muvofiq meva-sabzavot ekinlari va uzum yetishtirish uchun zarur yer maydonlari ajratilishiga alohida e’tibor bersinlar;

“O‘zmevasazavotuzumsanoat-xolding” xolding kompaniyasi bilan birgalikda qayta ishlovchi korxonalarni ish bilan to‘liqroq ta’minlash maqsadida meva-sabzavot mahsulotlari xarid qilish yuzasidan viloyatlararo shartnoma aloqalari rivojlantirilishini ta’minlasinlar.

3. O‘zbekiston Respublikasi Vazirlar Mahkamasining 1998-yil 6-avgustdagi 338-son qaroriga muvofiq yangi uzilgan meva-sabzavot mahsulotlarini markazlashtirilmagan tartibda eksport qilishning amaldagi tartibi 1999 kalendar yilga saqlab qolinsin.

4. Qoraqalpog‘iston Respublikasi Vazirlar Kengashi va viloyatlar hokimliklari meva-sabzavot mahsulotlari chetga chiqarilishi uchun zarur hujjatlar tezkorlik bilan rasmiylashtirilishiga ko‘maklashish maqsadida har bir tuman va shahar hokimligi huzurida banklar, bojxona xizmatlari, “O‘zdavstandart” markazining mintaqaviy organlari, karantin va epidemiologiya xizmatlarining mas’ul xodimlaridan iborat ishchi guruhlar tashkil etsinlar.

5. Qoraqalpog‘iston Respublikasi Vazirlar Kengashi va viloyatlar hokimliklari har oyda, keyingi oyning 1-kunida O‘zbekiston Respublikasi Makroiqtisodiyot va statistika vazirligiga meva-sabzavot mahsulotlari eksportga yuklab jo‘natilishi to‘g‘risidagi tezkor ma’lumotlarni 2-ilovaga* muvofiq shakl bo‘yicha taqdim etsinlar.

6. O‘zbekiston Respublikasi Ichki ishlar vazirligi (Z. Almatov) yangi uzilgan meva-sabzavot mahsulotlari va ularni qayta ishlash mahsulotlari ortilgan avtotransport vositalari respublika hududida to‘siqsiz harakat qilishini ta’minlasin.

7. “O‘zbekiston temir yo‘llari” davlat-aksiyadorlik kompaniyasi (N.E. Ermetov) va “O‘zbekiston havo yo‘llari” milliy aviakompaniyasi (A.G‘. Ro‘zmetov) yuklab jo‘natish hujjatlari Tartibga muvofiq belgilangan tartibda rasmiylashtirilishini hamda meva-sabzavot mahsulotlari jo‘natuvchisiga yuk tashishga taqdim etilgan kundan boshlab ikki kecha-kunduzdan ortiq bo‘lmagan muddatda transport vositalari ajratilishini ta’minlasinlar.

8. Mazkur qarorning bajarilishini nazorat qilish Bosh vazirning o‘rinbosari B.M. Olimjonov zimmasiga yuklansin.