Oʻzbekiston Respublikasi Prezidentining 2009-yil 7-sentabrdagi PQ-1183-son “2010-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qarorining (Oʻzbekiston Respublikasi Oliy Majlisi palatalarining Axborotnomasi, 2009-y., 9-son, 370-modda) 6-bandi ijrosini taʼminlash maqsadida Oʻzbekiston Respublikasi Qishloq va suv xoʻjaligi vazirligi va Moliya vazirligi qaror qiladi:

1. Don yetishtiruvchi xoʻjaliklarni sifatli boshoqli don urugʻligi bilan taʼminlash toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining “Urugʻchilik toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 9-son, 130-modda) va “Seleksiya yutuqlari toʻgʻrisida”gi (Oʻzbekiston Respublikasi Oliy Majlisining Axborotnomasi, 2002-y., 9-son, 156-modda) qonunlariga hamda Oʻzbekiston Respublikasi Prezidentining 2009-yil 7-sentabrdagi PQ-1183-son “2010-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qaroriga (Oʻzbekiston Respublikasi Oliy Majlisi palatalarining Axborotnomasi, 2009-y., 9-son, 370-modda) muvofiq don yetishtiruvchi xoʻjaliklarni sifatli boshoqli don urugʻligi bilan taʼminlash tartibini belgilaydi.

1. Mazkur Nizom talablari don yetishtiruvchi xoʻjaliklarni boshoqli don urugʻligining yangi, istiqbolli, yuqori sifatli va serhosil navlari bilan taʼminlashga tatbiq etiladi.

2. Don yetishtiruvchi xoʻjaliklarni boshoqli donning yangi, istiqbolli, yuqori sifatli va serhosil navlari bilan taʼminlash uchun Qoraqalpogʻiston Respublikasi va viloyatlarda kamida ikkita don yetishtiruvchi xoʻjaliklarni sugʻoriladigan yerlarida 1 gektardan hamda bitta don yetishtiruvchi xoʻjalikning sugʻorilmaydigan (lalmikor) yerlarida 5 gektardan kam boʻlmagan oʻlchamdagi maydonda ushbu xoʻjaliklar bilan kelishilgan holda koʻrgazmali maydonchalar (keyingi oʻrinlarda koʻrgazmali maydonchalar deb yuritiladi) tashkil etiladi.

Koʻrgazmali maydonchalarni tashkil etishga Qoraqalpogʻiston Respublikasi Qishloq va suv xoʻjaligi vazirligi, viloyatlar qishloq va suv xoʻjaligi boshqarmalari, Oʻzbekiston qishloq xoʻjaligi ilmiy-ishlab chiqarish markazi tizimidagi gʻallachilikka ixtisoslashgan ilmiy-tadqiqot institutlari va ularning hududiy filiallari hamda Qishloq xoʻjaligi ekinlari navlarini sinash davlat komissiyasi va uning hududiy boʻlinmalari javobgar hisoblanadilar.

3. Koʻrgazmali maydonchalar tashkil etiladigan don yetishtiruvchi xoʻjaliklar, ularning joylashgan hududi va ularda ekiladigan boshoqli don ekinlari navlarining roʻyxati Qoraqalpogʻiston Respublikasi Qishloq va suv xoʻjaligi vazirligi hamda viloyatlar qishloq va suv xoʻjaligi boshqarmalari tomonidan belgilanadi.

4. Koʻrgazmali maydonchalarda mahalliy va xorijiy ilmiy muassasalar tomonidan yaratilgan, Oʻzbekiston Respublikasi hududida ekishga tavsiya etilgan qishloq xoʻjalik ekinlari Davlat reyestriga (keyingi oʻrinlarda Davlat reyestri deb yuritiladi) kiritilgan, istiqbolli deb hisoblangan hamda Qishloq xoʻjaligi ekinlari navlarini sinash davlat komissiyasida kamida bir yil davomida sinovdan oʻtgan bugʻdoyning yumshoq va qattiq hamda arpaning yangi va serhosil navlari sinov maqsadida ekiladi.

5. Koʻrgazmali maydonchalarga ekiladigan boshoqli don ekinlari navlarining urugʻligi “Oʻzdonmahsulot” aksiyadorlik kompaniyasi tarkibiga kiruvchi don mahsulotlari korxonalari, Qishloq xoʻjaligi ekinlari navlarini sinash davlat komissiyasining hududiy boʻlinmalari, Oʻzbekiston qishloq xoʻjaligi ilmiy-ishlab chiqarish markazi tizimidagi gʻallachilikka ixtisoslashgan ilmiy-tadqiqot institutlari va ularning hududiy filiallari tomonidan bepul yetkazib beriladi.

6. Koʻrgazmali maydonchalarda yetishtirilgan hosil yigʻib olingach, boshoqli don ekinlari navlarining barcha qimmatli xoʻjalik koʻrsatkichlari aks ettirilgan maʼlumotlar 15-iyulgacha tuman qishloq va suv xoʻjaligi boʻlimlari tomonidan hududdagi barcha don yetishtiruvchi xoʻjaliklarga yetkaziladi.

7. Koʻrgazmali maydonchalarda yetishtirilgan hosil natijalaridan kelib chiqib, don yetishtiruvchi xoʻjaliklarning rahbarlari boshoqli don ekinlari navlari urugʻligini xarid qilish uchun:

urugʻlik zaxirasi shakllanmagan yangi boshoqli don ekinlari navlari urugʻligi uchun — 2 yil oldin;

ekib kelinayotgan, lekin urugʻlik zaxirasi yetishmaydigan boshoqli don ekinlari navlari urugʻligi uchun — 1 yil oldin;

urugʻlik zaxirasi yetarli boshoqli don ekinlari navlari urugʻligi uchun — joriy yilda tuman qishloq va suv xoʻjaligi boʻlimlariga yilning 20-iyuligacha buyurtma beradi.

8. Qoraqalpogʻiston Respublikasi Qishloq va suv xoʻjaligi vazirligi hamda viloyatlar qishloq va suv xoʻjaligi boshqarmalari Qishloq xoʻjaligi ekinlari navlarini sinash davlat komissiyasi bilan birgalikda koʻrgazmali maydonchalardagi boshoqli don ekinlari hosili yigʻishtirib olingach, har bir boshoqli don ekinlari navi urugʻligidan 6 kg dan namunalar olib, Oʻzbekiston Respublikasi Vazirlar Mahkamasi huzuridagi Davlat don inspeksiyasining markaziy laboratoriyasiga texnologik sifat koʻrsatgichlarini tahlil qilish uchun yuboradi. Bunda, boshoqli don ekinlari donining sifatini aniqlashda haqqoniylikni taʼminlash maqsadida boshoqli don ekinlari navlarining nomlari Qishloq xoʻjaligi ekinlari navlarini sinash davlat komissiyasi tomonidan kodlashtiriladi.

9. Koʻrgazmali maydonchalarda yetishtirilgan boshoqli don ekinlari navlarining sifat koʻrsatkichlari boʻyicha aniqlangan maʼlumotlar Oʻzbekiston qishloq xoʻjaligi ilmiy-ishlab chiqarish markazi hamda Qishloq xoʻjaligi ekinlari navlarini sinash davlat komissiyasi tomonidan umumlashtiriladi va har yili 1-avgustga qadar Oʻzbekiston Respublikasi Qishloq va suv xoʻjaligi vazirligiga taqdim qilinadi.

10. Oʻzbekiston Respublikasi Qishloq va suv xoʻjaligi vazirligi taqdim qilingan boshoqli don ekinlari navlarining sifat koʻrsatkichlari toʻgʻrisidagi maʼlumotlarga asoslanib Qishloq xoʻjaligi ekinlari navlarini sinash davlat komissiyasi, “Oʻzdonmahsulot” aksiyadorlik kompaniyasi va Oʻzbekiston Respublikasi Vazirlar Mahkamasi huzuridagi Davlat don inspeksiyasi bilan kelishgan holda boshoqli donning yangi, istiqbolli va serhosil navlarini xarid qilish borasida don yetishtiruvchi xoʻjaliklarni ragʻbatlantirish uchun har yili yumshoq va qattiq bugʻdoyning yangi, istiqbolli, qimmatbaho va kuchli navlari hamda arpaning istiqbolli va pivobop navlarining roʻyxatini tasdiqlaydi.

11. Davlat reyestriga kiritilgan boshoqli don ekinlari navlari urugʻligini tayyorlagan “Oʻzdonmahsulot” aksiyadorlik kompaniyasi tarkibiga kiruvchi don mahsulotlari korxonalari, Oʻzbekiston qishloq xoʻjaligi ilmiy-ishlab chiqarish markazi tizimidagi gʻallachilikka ixtisoslashgan ilmiy-tadqiqot institutlari va ularning hududiy filiallari don yetishtiruvchi xoʻjaliklarni ragʻbatlantirgan holda mazkur Nizomning 10-bandida koʻrsatilgan roʻyxatga kiritilgan yangi, istiqbolli va yuqori hosilli navlarning urugʻligi narxini ularga 5 foizga kamaytirib sotadi.

12. Don yetishtiruvchi xoʻjaliklarga 5 foizga kamaytirib sotilgan boshoqli don ekinlari urugʻligining haqiqiy narxi bilan sotish narxi oʻrtasidagi farq:

boshoqli don ekinlari urugʻligi “Oʻzdonmahsulot” aksiyadorlik kompaniyasi tarkibiga kiruvchi don mahsulotlari korxonalaridan xarid qilingan boʻlsa — Boshoqli don ekinlari urugʻini yetishtiruvchi xoʻjaliklarni, shuningdek ilmiy muassasalar — navlar originatorlarini, seleksiya va urugʻchilik sohasi olimlarini ragʻbatlantirish toʻgʻrisidagi nizomda (roʻyxat raqami 1993, 2009-yil 5-avgust) (Oʻzbekiston Respublikasi qonun hujjatlari toʻplami, 2009-y., 32-33-son, 366-modda) belgilangan urugʻlik sifatini yaxshilash tadbirlari uchun “Oʻzdonmahsulot” aksiyadorlik kompaniyasi tarkibiga kiruvchi don mahsulotlari korxonalari ixtiyorida qoldiriladigan mablagʻlar hisobidan;

boshoqli don ekinlari urugʻligi Oʻzbekiston qishloq xoʻjaligi ilmiy-ishlab chiqarish markazi tizimidagi gʻallachilikka ixtisoslashgan ilmiy-tadqiqot institutlari va ularning hududiy filiallaridan xarid qilingan boʻlsa — yuqorida qayd etilgan Nizomda belgilangan ilmiy muassasalar — navlar originatorlarini, seleksiya urugʻchilik sohasi olimlarini ragʻbatlantirish uchun Oʻzbekiston qishloq xoʻjaligi ilmiy-ishlab chiqarish markazining hisobvaragʻiga ilmiy muassasalarda boshoqli don ekinlarining yuqori hosilli, qurgʻoqchilikka chidamli va yuqori sifatli yangi istiqbolli navlarini yaratish xarajatlari uchun oʻtkaziladigan mablagʻlar hisobidan qoplanadi.

13. Mazkur Nizom talablarining buzilishida aybdor shaxslar qonun hujjatlarida belgilangan tartibda javobgarlikka tortiladilar.

14. Mazkur Nizom Oʻzbekiston Respublikasi Iqtisodiyot vazirligi, “Oʻzdonmahsulot” aksiyadorlik kompaniyasi, Oʻzbekiston qishloq xoʻjaligi ilmiy-ishlab chiqarish markazi va Vazirlar Mahkamasi huzuridagi Davlat don inspeksiyasi bilan kelishilgan.