Boshoqli don ekinlari navlarini oqilona joylashtirishni ta’minlash, kuzgi ekin ekishni maqbul agrotexnik muddatlarda sifatli o‘tkazishda fermer xo‘jaliklarini har tomonlama qo‘llab-quvvatlash maqsadida:

1. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi va viloyatlar hokimliklarining g‘allakor xo‘jaliklar bilan don mahsulotlari korxonalari o‘rtasida tuzilgan kontraktatsiya shartnomalarini umumlashtirish asosida tayyorlangan:

2010-yil hosili uchun boshoqli don ekinlari ekiladigan maydonlar hamda navlar bo‘yicha ularning tezpishar va serhosil navlarini joylashtirish to‘g‘risidagi 1-ilovaga* muvofiq;

“O‘zdonmahsulot” aksiyadorlik kompaniyasi korxonalari tomonidan 2010-yilda yuqori sifatli boshoqli don ekinlari urug‘ligi tayyorlash hajmlari to‘g‘risidagi 2-ilovaga* muvofiq;

“O‘zdonmahsulot” aksiyadorlik kompaniyasi korxonalari tomonidan sug‘oriladigan yerlar uchun 2010-yil hosilidan yuqori sifatli boshoqli don ekinlari urug‘ligi yetkazib berish hajmlari to‘g‘risidagi 3-ilovaga* muvofiq;

boshoqli don ekinlari navlarini joylashtirish hamda sug‘oriladigan yerlarda Don va dukkakli don ekinlari ilmiy-tadqiqot instituti va uning filiallari, shuningdek Qashqadaryo boshoqli don ekinlari seleksiyasi va urug‘chilik ilmiy-tadqiqot instituti tomonidan 2010-yil hosilidan superelita urug‘ligini tayyorlash to‘g‘risidagi 4-ilovaga* muvofiq takliflari qabul qilinsin.

2. Qoraqalpog‘iston Respublikasi Vazirlar Kengashining Raisi, viloyatlar va tumanlar hokimlari, O‘zbekiston Respublikasi qishloq va suv xo‘jaligi vaziri, “O‘zdonmahsulot” aksiyadorlik kompaniyasi raisi zimmasiga:

bahorgi ekishga yetarli hajmda sifatli, kalibrlangan, dorilangan va sertifikatlangan boshoqli don ekinlari urug‘larini, shuningdek qishloq xo‘jalik ekin texnikasini tayyorlash;

sug‘oriladigan yerlarda asosan birinchi va ikkinchi reproduksiyali birinchi-ikkinchi klassdan past bo‘lmagan urug‘lar va lalmi yerlarda uchinchi reproduksiyadan past bo‘lmagan urug‘lar ekilishi;

don yetishtiruvchilar mazkur qaror bilan tasdiqlangan boshoqli don ekinlari navlarining joylashtirilishiga qat’iy amal qilishlari uchun shaxsiy javobgarlik yuklansin.

Tovarbop don, navlashtirilmagan, sifatsiz tayyorlangan va dorilanmagan urug‘larni ekish, respublika hududida ekish tavsiya qilinmagan navlarni joylashtirish hamda ularni ishlov berish qiyin bo‘lgan yerlarga ekish qat’iyan taqiqlansin.

3. O‘zbekiston Respublikasi Bosh vaziri (Sh.M. Mirziyoyev):

boshoqli don ekinlari navlarining tasdiqlangan tarzda joylashtirilishi va moddiy resurslarni yetkazib berish bo‘yicha shartnoma majburiyatlariga rioya qilinishi;

eng yaxshi fermer xo‘jaliklari tomonidan to‘plangan ijobiy tajribaning umumlashtirilishi va tatbiq etilishi, navning biologik xususiyatlariga muvofiq ravishda boshoqli don ekinlariga ishlov berish bo‘yicha agrotexnika tadbirlariga rioya etilishi;

boshoqli don ekinlari ekishni har bir hudud uchun maqbul bo‘lgan muddatlarda — sug‘oriladigan yerlarda 2009-yilning 25-oktabrigacha va lalmi yerlarda 15-noyabrgacha tugallanishini ta’minlash ustidan tizimli nazoratni tashkil etsin.

4. O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi xizmat ko‘rsatuvchi banklar bilan birgalikda 2010-yil hosili doniga xarid narxlari tasdiqlangunga qadar 2009-yil hosili doniga o‘rtacha shakllangan narxlar bo‘yicha texnologiya kartalariga muvofiq muddatlar va kutilayotgan xarajatlar (shu jumladan urug‘lik qiymati)ga binoan davlat ehtiyojlari uchun xarid qilinadigan boshoqli don ekinlari yetishtirishga kredit bersin.

6. O‘zbekiston Respublikasi Qishloq va suv xo‘jaligi vazirligi, O‘zbekiston qishloq xo‘jaligi ilmiy-ishlab chiqarish markazi Moliya vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari bilan birgalikda:

boshoqli donning yangi, istiqbolli, serhosil navlarini xarid qilish borasida fermer xo‘jaliklarini rag‘batlantirish bo‘yicha aniq chora-tadbirlarni nazarda tutgan holda, g‘allakor xo‘jaliklarni sifatli boshoqli don urug‘ligi bilan ta’minlash to‘g‘risidagi Nizomni bir oy muddatda belgilangan tartibda ishlab chiqsin va tasdiqlasin;

har yilning 1-avgustigacha mintaqalarning tuproq-iqlim sharoitlari hisobga olinishi va har bir g‘allakor fermer xo‘jaligiga yetkazilishini ta’minlagan holda, tumanlashtirilgan yuqori samarador boshoqli don seleksiyaviy navlarining asosiy xo‘jalik-biologik belgilari va xarakteristikalari bo‘yicha Ma’lumotnomani tayyorlasin va chop etsin;

har bir tumanlashtirilgan boshoqli don ekinlari seleksiyaviy navini yetishtirish xususiyatlari va asosiy xarakteristikalari haqida fermyerlar o‘rtasida joylarda seminarlar hamda keng tushuntirish ishlari tizimli asosda o‘tkazilishini ta’minlasin.

7. O‘zbekiston Respublikasi Moliya vazirligi, Qishloq va suv xo‘jaligi vazirligi, “O‘zagrosug‘urta” DASK sug‘urta qoplanishini 90 foizga qadar oshirish va sug‘urta tariflarini amaldagidan 50 foizga tushirish hisobidan yangi, yuqori samarador seleksiyaviy navlarning ekilishini rag‘batlantirishni kuchaytirish chora-tadbirlarini nazarda tutgan holda, boshoqli don ekinlari hosilini sug‘urtalash tartibini bir oy muddatda qayta ko‘rib chiqsin.

8. “O‘zdonmahsulot” aksiyadorlik kompaniyasi fermer xo‘jaliklarining boshoqli don ekinlari urug‘larini sotish shoxobchalaridan foydalanishlarini yaxshilash uchun, ularning respublika bo‘ylab joylashishini qayta ko‘rib chiqsin va mazkur shaxobchalar tarmog‘ini kengaytirish choralarini ko‘rsin.

9. “O‘zdonmahsulot” aksiyadorlik kompaniyasi 2009-yilning 20-sentabrigacha respublikaning elita-urug‘chilik xo‘jaliklari buyurtmanomalari bo‘yicha 2009-yilda kuzgi ekish uchun xorijiy ilmiy muassasalardan 240 tonna hajmida boshoqli don ekinlarining superelita urug‘lari keltirilishini ta’minlasin.

“O‘zdonmahsulot” aksiyadorlik kompaniyasi olib kelinayotgan 240 tonna boshoqli don ekinlarining superelita urug‘lari uchun istisno tariqasida bojxona to‘lovlaridan (bojxona rasmiylashtiruvi yig‘imlaridan tashqari) ozod qilinsin.

10. Mazkur Qarorning bajarilishini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.