Yangi 2010-2011 o‘quv yiliga o‘z vaqtida tayyorgarlik ko‘rish, umumta’lim maktablari, akademik litseylar va kasb-hunar kollejlari o‘quvchilarini maktab anjomlari, o‘quv-metodik qo‘llanmalar hamda maktab kiyimi va poyabzali bilan ta’minlash maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari O‘zbekiston Respublikasi Xalq ta’limi vazirligi, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi, O‘zbekiston matbuot va axborot agentligi, boshqa manfaatdor tuzilmalar bilan birgalikda shu yil 1-avgust — 10-sentabr kunlari barcha aholi punktlarida asosan mamlakatimizda ishlab chiqarilgan maktab tovarlarining keng turlarini (maktab-yozuv anjomlari, darsliklar, o‘quv-metodik qo‘llanmalar, o‘quvchilar formasi va hokazolarni) sotish bo‘yicha maxsus maktab bozorlari va yarmarkalarini o‘tkazsinlar.

Maxsus maktab bozorlari va yarmarkalarini yuqori darajada o‘tkazishni tashkil etish uchun shaxsiy mas’uliyat Qoraqalpog‘iston Respublikasi Vazirlar Kengashi Raisi, viloyatlar, shaharlar va tumanlar hokimlari zimmasiga yuklansin.

2. Maxsus maktab bozorlari va yarmarkalarini o‘tkazish ishlarini muvofiqlashtirish uchun 1-ilovaga* muvofiq tarkibda Ishchi guruh tuzilsin.

Ishchi guruh (Sh.M.Mirziyoyev) O‘zbekiston Respublikasi Xalq ta’limi vazirligi, O‘rta maxsus, kasb-hunar ta’limi markazi, boshqa vazirliklar, idoralar va xo‘jalik birlashmalari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

shu yil 28-iyulgacha bo‘lgan muddatda tumanlar va shaharlar bo‘yicha maxsus maktab bozorlari va yarmarkalari umumta’lim maktablari, akademik litseylar, kasb-hunar kollejlari o‘quvchilari va aholi uchun qulay joylashuvini tasdiqlasin, ularni yuqori saviyada va qulay vaqtda o‘tkazish uchun zarur shart-sharoitlar yaratsin;

bir hafta muddatda har bir mintaqa bo‘yicha umumta’lim maktablari, akademik litseylar, kasb-hunar kollejlari o‘quvchilarining maktab-yozuv anjomlari, maktab kiyimi va poyabzaliga bo‘lgan ehtiyojini aniqlasin, ularni ishlab chiqarishni tashkil etish, sotish va maktab bozorlari va yarmarkalari o‘tkaziladigan joylarga yetkazib berish yuzasidan kompleks tadbirlarni ishlab chiqsin;

maktab bozorlari va yarmarkalarida barcha zarur maktab-yozuv anjomlari, maktab kiyimi va poyabzali qulay narxlarda mavjud bo‘lishi yuzasidan ta’sirchan nazoratni ta’minlasin;

maktab bozorlari va yarmarkalari o‘tkaziladigan joylarda umumiy ovqatlanish, chanqovbosdi ichimliklar va muzqaymoq sotish shoxobchalari tashkil etsin.

3. O‘zbekiston Respublikasi Xalq ta’limi vazirligi O‘rta maxsus, kasb-hunar ta’limi markazi, “O‘zulgurjisavdoinvest” uyushmasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2010-yil 25-iyulgacha maxsus maktab bozorlari va yarmarkalarini o‘tkazish jadvalini ularning aniq muddatlari va joylarini, shuningdek ularning samarali tashkil etilishi uchun mas’ul shaxslarni ko‘rsatgan holda ishlab chiqsin va Vazirlar Mahkamasiga taqdim etsin.

Har 10 kunda Vazirlar Mahkamasiga maktab bozorlari va yarmarkalarini zarur miqdorda va turda maktab-yozuv anjomlari, maktab kiyimi va poyabzali bilan ta’minlash bo‘yicha bajarilgan ishlar, shuningdek maktab bozorlari va yarmarkalari ishi samarali tashkil etilishi to‘g‘risida tahliliy axborot taqdim etilsin.

4. “O‘zulgurjisavdoinvest” uyushmasi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda O‘zbekiston Respublikasi Xalq ta’limi vazirligi va O‘rta maxsus, kasb-hunar ta’limi markazi tomonidan taqdim etilgan buyurtmanomalar asosida joylarda tashkil etilgan maxsus maktab bozorlari va yarmarkalariga 2-ilovaga muvofiq ro‘yxat bo‘yicha maktab-yozuv anjomlari, maktab kiyimi va poyabzali muntazam yetkazib berilishini ta’minlasin.

5. O‘zbekiston Respublikasi Xalq ta’limi vazirligi, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi:

2010-yil 25-iyulgacha mavjud ehtiyojdan kelib chiqqan holda chakana savdoda erkin sotish uchun qo‘shimcha ravishda nashr etish talab qilinadigan darsliklar va o‘quv-metodik qo‘llanmalar ro‘yxati va miqdorini belgilasinlar hamda Ishchi guruh bilan kelishgan holda O‘zbekiston matbuot va axborot agentligiga taqdim etsinlar;

umumta’lim maktablari, akademik litseylar va kasb-hunar kollejlarida tashkil etiladigan maxsus maktab bozorlari va yarmarkalari faoliyatini amalga oshirish uchun zarur shart-sharoitlar yaratsinlar.

6. O‘zbekiston matbuot va axborot agentligi nashriyot-matbaa ijodiy uylari, “Sharq” kompaniyasi bilan birgalikda erkin sotish uchun nashr etiladigan darsliklar va o‘quv-metodik qo‘llanmalarning nashr etilishi va joylarga yetkazib berilishini ta’minlasin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston matbuot va axborot agentligi, “Sharq” kompaniyasi, “O‘zkitobsavdo” aksiyadorlik kompaniyasi bilan birgalikda 2010-2011 o‘quv yili uchun nashr etilgan darsliklar va o‘quv-metodik qo‘llanmalarning maxsus maktab bozorlari va yarmarkalari orqali sotilishini tashkil etsinlar.

7. “O‘zbekyengilsanoat” davlat-aksiyadorlik kompaniyasi, “O‘zbekcharmpoyabzali” uyushmasi O‘zbekiston Respublikasi Xalq ta’limi vazirligi, O‘rta maxsus, kasb-hunar ta’limi markazining buyurtmanomalariga binoan o‘quvchilar uchun yuqori sifatli maktab kiyimi va poyabzali ishlab chiqarilishini ta’minlasinlar hamda ularning maxsus maktab bozorlari va yarmarkalarini o‘tkazishda qatnashadigan savdo tashkilotlariga shartnoma asosida, belgilangan muddatlarda yetkazib berilishini ta’minlash chora-tadbirlarini ko‘rsinlar.

8. O‘zbekiston milliy teleradiokompaniyasi ommaviy axborot vositalari orqali joylarda maktab bozorlari va yarmarkalari faoliyati tashkil etilishi to‘g‘risida keng reklama-axborot ishlari olib borsin, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan ahdlashuv bo‘yicha maxsus videoroliklar tayyorlanishini ta’minlasin.

9. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M.Mirziyoyev zimmasiga yuklansin.

1. Yozuv daftari

2. Umumiy daftar

3. Kundalik daftar

4. Bloknot

5. Rasm daftari

6. Nota daftari

7. Kanselyariya daftari

8. Vatman qog‘oz

9. Sharikli ruchka

10. Rangli va oddiy qalamlar

11. Flomaster

12. Qalam ochgich

13. O‘chirgich

14. O‘quvchilar penali

15. Sanoq cho‘plari

16. Akvarel bo‘yoqlar

17. Plastilin

18. Elim

19. Tush

20. Sirkul

21. Lineyka, burchakli lineyka, transportir

22. Yozuv qog‘ozi

23. Rangli qog‘oz

24. Silliq qog‘oz

25. Oddiy va rangli bo‘r

26. Portfellar, ranetslar

27. Maktab kiyimi va poyabzali