Vazirlar Mahkamasining “Qizilqumnodirmetalloltin” konsernining Navoiy kon-metallurgiya kombinatini kadrlar bilan ta’minlash hamda mehnatkashlarning ijtimoiy shart-sharoitlarini yaxshilash chora-tadbirlari to‘g‘risida” 1994-yil 25-yanvardagi 33-son va “1994-yilda Olmaliq kon-metallurgiya kombinati ishini barqarorlashtirish chora-tadbirlari to‘g‘risida” 1994-yil 31-oktabrdagi 530-son qarorlariga muvofiq va “Qizilqumnodirmetalloltin” konserni hamda Olmaliq kon-metallurgiya kombinati korxonalarining yuqori malakali ishchi kadrlar hamda mutaxassislarga bo‘lgan ehtiyojlarini o‘z vaqtida va to‘liq ta’minlash maqsadida Vazirlar Mahkamasi qaror qiladi:

1. Ilova qilinayotgan “Qizilqumnodirmetalloltin” konserni hamda Olmaliq kon-metallurgiya kombinati korxonalarini 1995 — 2000-yillarda yuqori malakali mutaxassislar va ishchi kadrlar bilan .ta’minlash dasturi* tasdiqlansin.

Vazirliklar, idoralar, Navoiy va Toshkent viloyatlari hokimliklari, “Qizilqumnodirmetalloltin” konserni, Olmaliq kon-metallurgiya kombinati dasturda belgilangan topshiriqlarning bajarilishi yuzasidan zarur bo‘lgan chora-tadbirlarni ko‘rsinlar.

2. “O‘zistiqbolstat” davlat qo‘mitasi Oliy va o‘rta maxsus ta’lim vazirligi, oliy o‘quv yurtlari bo‘lgan boshqa vazirliklar va idoralar bilan birgalikda 1995/96 o‘quv yilidan boshlab respublika oliy o‘quv yurtlariga o‘quvchilar qabul qilish prognozlarida “Qizilqumnodirmetalloltin” konserni hamda Olmaliq kon-metallurgiya kombinati ehtiyojlarini hisobga olgan holda test asosida Navoiy va Toshkent viloyatlaridan yoshlarni o‘qishga maqsadli qabul qilish uchun kvotalarni nazarda tutsin.

3. Oliy va o‘rta maxsus ta’lim vazirligi, oliy o‘quv yurtlari bo‘lgan boshqa vazirliklar va idoralar 1995/96 o‘quv yilidan boshlab “Qizilqumnodirmetalloltin” konserni hamda Olmaliq kon-metallurgiya kombinati korxonalari uchun belgilangan kvotalar va tuzilgan shartnomalarga muvofiq mutaxassislar tayyorlashni amalga oshirsinlar

O‘rta maxsus ta’lim negizida mutaxassislarni tayyorlashning jadallashtirilgan shakllari kengaytirilsin.

4. Budjetdan mablag‘ bilan ta’minlanadigan xalq ta’limi, sog‘liqni saqlash, madaniyat va boshqa tashkilot hamda muassasalarni yuqori malakali xodimlar bilan butlash va mustahkamlash maqsadida 1995-yil 1-yanvardan boshlab Uchquduq, Zarafshon, Nurobod shaharlarida va Zafarobod shaharchasida muayyan davr ishlaganlik uchun har oylik taqdirlash puli joriy qilinsin va u uzluksiz ish stajiga ko‘ra lavozim maoshi (tarif stavkasi)ning ko‘yidagi miqdorlarida to‘lansin: 3 yilgacha — 1,25 koeffitsiyent (yilda 3 ta maosh); 3 yildan 5 yilgacha — 1,5 (yilda 6 ta maosh); 5 yildan ortiq — 1,75 (yilda 9 ta maosh).

O‘zbekiston Respublikasi Mehnat vazirligi, Moliya vazirligi bir oy muddatda ko‘rsatib o‘tilgan tashkilotlar xodimlariga muayyan davr ishlaganlik uchun har oyda taqdirlash puli to‘lash tartibi to‘g‘risidagi Nizomni ishlab chiqsinlar va tasdiqlasinlar.

5. O‘zbekiston Respublikasining Xalq ta’limi vazirligi:

1995/96 o‘quv yilidan boshlab har yili Navoiy va Toshkent viloyatlari hunar-texnika bilim yurtlarida “Qizilkumnodirmetalloltin” konserni va Olmaliq kon-metallurgiya kombinati buyurtmanomalariga muvofiq ishchi kadrlar tayyorlab berishni ta’minlasin;

Navoiy shahridagi 2-hunar bilim yurtini “Qizilqumnodirmetalloltin” konserni ehtiyojiga muvofiq malakali ishchi kadrlarni tayyorlashga qayta ixtisoslashtirsin. Navoiy kon-metallurgiya kombinati 2-hunar bilim yurti moddiy-texnika bazasini rivojlantirishda yordam bersin.

6. O‘zbekiston Respublikasi Ichki ishlar vazirligi “Qizilqumnodirmetalloltin” konserni va Olmaliq kon-metallurgiya kombinatiga MDH mamlakatlari, O‘zbekiston Respublikasining viloyatlari va Toshkent shahridan kontrakt bo‘yicha ishga kelayotgan xodimlar va ularning oila a’zolarini vaqtincha ro‘yxatdan o‘tkazishni nazarda tutsin.

7. Mazkur qarorning bajarilishini nazorat qilish Mashinasozlik, kimyo va metallurgiya, Ta’lim va fan bo‘limlariga yuklansin.