“Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish to‘g‘risida”gi O‘zbekiston Respublikasi Qonuniga muvofiq (O‘zbekiston Respublikasi Oliy Majlisining Axborotnomasi, 2004-y., 9-son, 160-modda) O‘zbekiston Respublikasi Moliya vazirligi va O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish Departamenti qaror qiladilar:

1. O‘zbekiston Respublikasi Moliya vazirligi va Bosh prokuratura huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentining 2009-yil 13-oktabrdagi 103, 40-sonli qarori bilan tasdiqlangan “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bo‘yicha lotereyalar tashkil etish faoliyatini amalga oshiruvchi tashkilotlar uchun ichki nazorat qoidalari”ga (ro‘yxat raqami 2037, 2009-yil 5-noyabr) (O‘zbekiston Respublikasi qonun hujjatlari to‘plami, 2009-y., 45-son, 495-modda) ilovaga muvofiq o‘zgartirish va qo‘shimchalar kiritilsin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

1. 3-bandda:

quyidagi mazmundagi o‘ninchi xatboshi bilan to‘ldirilsin:

“operatsiyalarning anonimligini oshiruvchi yangi texnologiyalar yordamida qonunga xilof ish qilish, xususan, jinoiy faoliyatdan olingan daromadlarni legallashtirish va (yoki) terrorizmni moliyalashtirish uchun tashkilot xizmatlaridan foydalanish tahdidining oldini olishga alohida e’tibor qaratilishi maqsadida zarur bo‘lgan tadbirlar qo‘llash”;

o‘ninchi xatboshi o‘n birinchi xatboshi deb hisoblansin.

2. 5-band quyidagi mazmundagi gap bilan to‘ldirilsin:

“Bunda ichki nazorat tizimi tashkilotning ham O‘zbekiston Respublikasi hududida, ham uning tashqarisida joylashgan alohida bo‘linmalarining (sho‘ba bo‘linmalar, vakolatxonalar, filiallar, bo‘limlar va boshqalar — ular mavjud bo‘lsa) jinoiy faoliyatdan olingan daromadlarni legallashtirish va (yoki) terrorizmni moliyalashtirishga qarshi kurashish bo‘yicha faoliyatini ham nazarda tutishi lozim”.

3. Quyidagi mazmundagi 5-1 va 5-2-bandlar bilan to‘ldirilsin:

“5-1. Tashkilot:

jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish to‘g‘risidagi xalqaro talablarni bajarmaydigan yoki yetarli darajada bajarmaydigan davlatlarda joylashgan o‘zining chet eldagi alohida bo‘linmalari tomonidan ushbu sohadagi xalqaro standartlarga rioya qilinishiga e’tibor qaratishi;

o‘zining chet eldagi alohida bo‘linmalaridan ular joylashgan mamlakatlar qonun hujjatlarida tegishli choralar taqiqlanganligi mavjudligi sababli, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bo‘yicha tegishli choralarni tatbiq qilish imkoniyati bo‘lmagan taqdirda, bosh ofisga axborot berilishini talab qilishga majburdir. O‘z navbatida, tashkilot bu haqda Moliya vazirligi va Departamentga xabar berishi;

jinoiy faoliyatdan olingan daromadlarni legallashtirish va (yoki) terrorizmni moliyalashtirish maqsadida texnologik yutuqlardan foydalanilishining suiiste’mol qilinishini oldini olishga qaratilgan choralarni ko‘rishi shart.

5-2. Tashkilotlarning chet eldagi alohida bo‘linmalari jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish borasidagi chora-tadbirlarni amalga oshirishda ular joylashgan mamlakat talablariga rioya qilishlari lozim. Agar bunday talablar O‘zbekiston qonun hujjatlari talablaridan farq qilgan taqdirda, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasidagi yuqoriroq standartlar qo‘llaniladi”.

4. Quyidagi mazmundagi 6-1-band bilan to‘ldirilsin:

“6-1. Tashkilot bo‘linmalari xodimlarining mas’ul shaxs — tarkibiy bo‘linma boshlig‘i yoki uning xodimlari o‘rtasidagi o‘zaro munosabat tartibi tashkilotning ichki hujjatlari bilan belgilanadi”.

5. 10-bandda:

quyidagi mazmundagi to‘rtinchi xatboshi bilan to‘ldirilsin:

“jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashishning uslublari va zamonaviy usullarini o‘rganish”;

to‘rtinchi—yettinchi xatboshilari tegishincha beshinchi — sakkizinchi xatboshilari deb hisoblansin.

6. 11-bandda:

quyidagi mazmundagi beshinchi xatboshi bilan to‘ldirilsin:

“jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bo‘yicha ichki nazoratni amalga oshirish natijasida olingan tegishli ma’lumotlarni (materiallar, hujjatlar va boshqalar) yig‘ish, rasmiylashtirish, saqlashni o‘rnatilgan tartibda amalga oshiradi, ularning maxfiyligini ta’minlaydi”;

beshinchi xatboshi oltinchi xatboshi deb hisoblansin.

7. 13-bandda:

quyidagi mazmundagi to‘rtinchi xatboshi bilan to‘ldirilsin:

“mijozni lozim darajada tekshirish materiallariga qo‘shib qo‘yiladigan barcha g‘ayrioddiy yirik miqdordagi operatsiyalar bo‘yicha lozim darajada tekshirish natijalari va xulosalarini yozma ravishda qayd etishi”;

to‘rtinchi—oltinchi xatboshilari tegishincha beshinchi — yettinchi xatboshilari deb hisoblansin.

8. Quyidagi mazmundagi 14-1-band bilan to‘ldirilsin:

“14-1. Mijozni lozim darajada tekshirish bo‘yicha tashkilotlar tomonidan ko‘riladigan chora-tadbirlar quyidagilarni o‘z ichiga olishi shart:

mijozning va u tegishli hujjatlar asosida qaysi shaxslar nomidan ish ko‘rayotgan bo‘lsa, o‘sha shaxslarning shaxsini hamda vakolatlarini tekshirishni;

mijoz tomonidan amalga oshiriladigan pul mablag‘lari yoki boshqa mol-mulk bilan bog‘liq operatsiyalarni ularning bunday mijoz va uning faoliyati to‘g‘risidagi ma’lumotlarga muvofiqligini tekshirish maqsadida doimiy asosda o‘rganish o‘tkazishni”.

9. 19-band quyidagi tahrirda bayon etilsin:

“19. Mijoz — yuridik shaxsni identifikatsiyalashda tashkilot uning davlat ro‘yxatidan o‘tganligi to‘g‘risidagi tegishli hujjatlarni, rahbariyati haqidagi, shuningdek, ta’sis hujjatlarida ko‘rsatilgan ma’lumotlarni olishlari lozim.

Bunda, agar mijoz — yuridik shaxs nomidan qonun hujjatlariga muvofiq jismoniy shaxs ish ko‘rayotgan bo‘lsa, tashkilot bunday jismoniy shaxsni identifikatsiyalash bo‘yicha ham ma’lumotlarni olishi lozim.

Davlat hokimiyati va boshqaruv organlariga nisbatan mijozlarni lozim darajada tekshirish chora-tadbirlarining o‘tkazilishi talab qilinmaydi”.

10. 21-band quyidagi tahrirda bayon etilsin:

“21. Tashkilot quyidagi hollarda mijozga pul mablag‘lari yoki boshqa mol-mulk bilan bog‘liq operatsiyalarni amalga oshirishni rad etadi:

Mijoz — jismoniy shaxsning o‘zining doimiy yoki vaqtinchalik yashash joyi (pasport ma’lumotlariga muvofiq) bo‘yicha mavjud bo‘lmaganida;

shak-shubhasiz noto‘g‘ri bo‘lgan hujjatlar taqdim etilganda yoki qonun hujjatlariga muvofiq tashkilot tomonidan so‘raladigan hujjatlar taqdim etilmaganda”.

11. V bo‘lim quyidagi mazmundagi 28-1 — 28-6-bandlar bilan to‘ldirilsin:

“28-1. Tashkilot ichki nazoratni amalga oshirish uchun zarur bo‘lgan ma’lumot va hujjatlarni har bir operatsiya bo‘yicha, jumladan lozim darajada tekshirish natijalari bo‘yicha shubhali deb tan olinmagan operatsiyalar bo‘yicha mijozdan talab qilib oladi va yig‘adi.

28-2. Tashkilot faoliyatining o‘ziga xos xususiyatlari, faoliyatning asosiy yo‘nalishlarini hisobga olgan holda, hamda mazkur Qoidalar va ichki hujjatlar asosida ichki nazoratni amalga oshirish jarayonida olingan ma’lumotlar va hujjatlarni shakllantiradi.

28-3. Taqdim qilingan hujjatlar nusxalarining to‘g‘riligiga gumon yoki boshqa zarurat paydo bo‘lgan taqdirda, tashkilot tanishish uchun hujjatlarning asl nusxalari taqdim qilinishini talab qilish huquqiga ega.

28-4. Lozim darajada tekshirish jarayonida olingan barcha ma’lumotlar va hujjatlar tashkilotning mijozlarni identifikatsiyasini amalga oshiruvchi xodimlariga mijoz to‘g‘risidagi ma’lumotlarni tekshirish uchun ochiq bo‘lishi lozim.

28-5. Pul mablag‘lari yoki boshqa mol-mulk bilan bog‘liq operatsiyalar to‘g‘risidagi ma’lumotlar zarurat tug‘ilgan taqdirda operatsiya tafsilotlarini qayta tiklash mumkin bo‘lgan tarzda rasmiylashtirilishi lozim.

28-6. Mijozni lozim darajada tekshirish va identifikatsiyalash natijasida olingan ma’lumotlar har yili yangilanib borilishi lozim.”.