Ishlab chiqarishdagi baxtsiz hodisalarni va xodimlar salomatligining boshqa xil zararlanishini tekshirish va hisobga olish tartibini takomillashtirish, uni qonun hujjatlariga muvofiqlashtirish maqsadida Vazirlar Mahkamasi qaror qiladi:

1. Vazirlar Mahkamasining 1997-yil 6-iyundagi 286-son qarori (Oʻzbekiston Respublikasi QT, 1997-y., 6-son, 21-modda) bilan tasdiqlangan Ishlab chiqarishdagi baxtsiz hodisalarni va xodimlar salomatligining boshqa xil zararlanishini tekshirish va hisobga olish toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. I boʻlimda:

a) 1-banddagi izoh quyidagi tahrirda bayon qilinsin:

“Izoh. Oʻquvchilar va talabalar bilan oʻquv-tarbiya jarayonida yuz bergan baxtsiz hodisalar Mehnat va aholini ijtimoiy muhofaza qilish vazirligi bilan kelishilgan holda Xalq taʼlimi vazirligi, Oliy va oʻrta maxsus taʼlim vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan belgilangan tartibda tekshiriladi va hisobga olinadi”;

b) 2-band quyidagi tahrirda bayon qilinsin:

“2. Korxona hududida va uning tashqarisida mehnat vazifalarini bajarayotganda (shuningdek xizmat safarlarida) yuz bergan jarohatlanish, zaharlanish, issiqlik taʼsiri, portlash, falokatlar, imoratlar, inshootlar va konstruksiyalar buzilishi, kuyish, muzlash, qizish, elektr toki va yashin urishi, hayvonlar, hasharotlar va sudralib yuruvchilar tomonidan, terroristik harakatlar natijasida shikastlanishlar, shuningdek tabiiy ofatlar (zilzilalar, oʻpirilishlar, suv toshqinlari, toʻfonlar va boshqalar) tufayli salomatlikning boshqa xil shikastlanishlari;

oʻz funksional vazifalarini bajarish yuzasidan, shuningdek avariyalarning, odamlar halok boʻlishining oldini olish va korxonaning mulkini saqlash maqsadida, ish beruvchi topshiriq bermagan boʻlsa ham, korxona manfaatlarini koʻzlab qandaydir xatti-harakatlarni amalga oshirayotgandagi;

xodim xizmat safarida boʻlgan yoki oʻz funksional vazifalarini bajarish vaqtida — yoʻl-transport hodisasidagi, temir yoʻl, havo yoʻllaridagi, dengiz va daryo transportidagi, elektr transportidagi hodisa natijasidagi;

ish beruvchi tomonidan buyruq bilan maxsus ajratilgan uydan ishga va/yoki ishdan uyga xodimlarni tashish uchun moʻljallangan transportda, shuningdek ushbu maqsadlar uchun shartnoma (buyurtma)ga muvofiq oʻzga tashkilot transportida ishga ketayotgan yoki ishdan qaytayotgandagi;

ish vaqtida shaxsiy transportda, uni xizmatga oid safarlar uchun ishlatishga ruxsat berilganlik haqida ish beruvchining yozma buyrugʻi mavjud boʻlgandagi;

ish beruvchining topshirigʻini bajarish uchun transportda yoki piyoda harakatlanayotganda, shuningdek mehnat faoliyati xizmat koʻrsatish obyektlari orasida yurish bilan bogʻliq xodimlar bilan ish vaqtida transportda yoki piyoda ketayotgandagi;

tadbirlarning oʻtkazilishi yoki ishlar bajarilishi joyidan qatʼi nazar, shanbalik (yakshanbalik), fuqaro mudofaasi boʻyicha oʻquv mashgʻulotlari, koʻngilli yongʻin muhofazasi musobaqalari oʻtkazilayotgandagi, qishloq xoʻjaligi ishlariga jalb etilgandagi, ish beruvchining yozma farmoyishi boʻyicha korxona tomonidan otaliq yordami koʻrsatilayotgandagi;

ichki ishlar organlarining maʼlumotlari asosida — ish vaqtida mehnat vazifalarini bajarayotganda boshqa shaxs tomonidan tan jarohati yetkazilgandagi;

smenali dam olishda boʻlgan xodim bilan transport vositasidagi vaxta shaharchasi hududidagi yoki ijaraga olingan xonadagi (kuzatib boruvchi, refrijerator brigadasi xodimi, smenali haydovchi, dengiz va daryo kemalari xodimlari, shuningdek, vaxta-ekspeditsiya usulida ishlayotganlar va boshqalar) baxtsiz hodisalar tekshiriladi va hisobga olinadi”;

v) 6-banddagi “kasaba uyushmalarining mehnat texnik nazoratchisi (Oʻzbekiston Kasaba uyushmalari Federatsiyasi Kengashiga aʼzo tashkilotlarda)” soʻzlari chiqarib tashlansin;

g) 7-band ikkinchi xatboshining ikkinchi jumlasiga “vakillik organi” soʻzlaridan keyin “shuningdek jabrlanuvchi yoki boshqa manfaatdor shaxs” soʻzlari qoʻshilsin;

2. II boʻlimda:

a) 1-bandning toʻrtinchi xatboshi quyidagi tahrirda bayon qilinsin:

“darhol hodisa toʻgʻrisida ish beruvchiga va kasaba uyushmasiga yoki korxona xodimlarining boshqa vakillik organiga xabar qilish”;

b) 4-bandning toʻrtinchi xatboshidagi “korporatsiya, uyushma, konsern” soʻzlari “xoʻjalik boshqaruvi organlari” soʻzlari bilan almashtirilsin;

v) 8-band quyidagi tahrirda bayon qilinsin:

“8. Ish beruvchining yozma farmoyishi bilan vaqtincha boshqa tashkilotga ishga oʻtkazilgan yoxud oʻrindoshlik boʻyicha ishlayotgan xodim bilan baxtsiz hodisa yuz bersa baxtsiz hodisa sodir boʻlgan tashkilot tomonidan tekshiriladi va hisobga olinadi”;

g) 13-band quyidagi tahrirda bayon qilinsin:

“13. Korxona xodimi rahbarligida ishlab chiqarish amaliyoti oʻtayotgan yoki ish bajarayotgan oʻquvchilar, talabalar bilan yuz bergan baxtsiz hodisa korxona tomonidan taʼlim muassasasi vakili bilan birgalikda tekshiriladi va korxona tomonidan hisobga olinadi.

Korxona tomonidan ishlab chiqarish amaliyoti uchun ajratilgan uchastkada oʻqituvchilari rahbarligida ishlab chiqarish amaliyotini oʻtayotgan yoki ish bajarayotgan oʻquvchilar, talabalar bilan yuz bergan baxtsiz hodisalar taʼlim muassasalari tomonidan korxona vakili bilan birgalikda tekshiriladi va taʼlim muassasasi tomonidan hisobga olinadi”;

3. III boʻlimda:

a) 1-bandda:

ikkinchi xatboshidagi “bilan” soʻzidan keyin “salomatlikka yetkazilgan zararning ogʻirligi darajasidan qatʼi nazar” soʻzlari qoʻshilsin;

izohdagi “Shikastlanganlikning” soʻzi “Salomatlikka yetkazilgan zararning” soʻzlari bilan almashtirilsin;

b) 2-bandda:

toʻrtinchi xatboshi rus tilida oʻzgartiriladi;

beshinchi xatboshidagi “prokuraturaga” soʻzi “hududiy ichki ishlar organiga” soʻzlari bilan almashtirilsin;

toʻqqizinchi xatboshi quyidagi tahrirda bayon qilinsin:

“ish beruvchining fuqarolik javobgarligini majburiy sugʻurta qilish shartnomasi boʻyicha sugʻurtalovchiga”;

v) 3-bandda:

uchinchi xatboshidagi “Oʻzbekiston Kasaba uyushmalari Federatsiyasi Kengashiga aʼzo tashkilotda yuz bergan hollarda, kasaba uyushmalarining mehnat (bosh) texnik nazoratchisi” soʻzlari “ish beruvchining fuqarolik javobgarligini majburiy sugʻurta qilish shartnomasi boʻyicha sugʻurtalovchining vakili” soʻzlari bilan almashtirilsin;

beshinchi xatboshidagi “yuz berganida” soʻzlaridan keyin “ish beruvchi va kasaba uyushmasi qoʻmitasi yoki xodimlarning boshqa vakillik organi vakillari tarkibida ish beruvchining buyrugʻi bilan tashkil etilgan komissiya tomonidan” soʻzlari qoʻshilsin;

toʻqqizinchi xatboshidagi “Davlat mehnat texnika nazorati” soʻzlari “Mehnatni muhofaza qilish boshqarmasi” soʻzlari bilan almashtirilsin;

oʻninchi xatboshi chiqarib tashlansin;

oʻn birinchi xatboshi oʻninchi xatboshi deb hisoblansin;

g) 4-banddagi uchinchi xatboshi chiqarib tashlansin;

d) 5-bandga quyidagi tahrirdagi xatboshi qoʻshilsin:

“Komissiya aʼzosi maxsus tekshirish oʻtkazayotgan komissiya xulosasidan norozi boʻlganda oʻzining alohida fikrini bildirishi mumkin”;

e) 7-bandga quyidagi tahrirdagi xatboshilar qoʻshilsin:

“oʻrtacha oylik ish haqi toʻgʻrisida maʼlumotnoma — yetkazilgan zararni qoplash summasini hisoblab chiqish uchun;

boquvchisini yoʻqotganligi munosabati bilan yetkazilgan zararni qoplash toʻgʻrisidagi buyruq nusxasi — oʻlim bilan tugagan baxtsiz hodisa yuz berganda”;

j) 8-bandda:

ikkinchi xatboshidagi “prokuraturaga” soʻzi “hududiy ichki ishlar organiga” soʻzlari bilan almashtirilsin;

uchinchi xatboshidagi “korporatsiya, uyushma, konsern” soʻzlari “xoʻjalik boshqaruvi organi” soʻzlari bilan almashtirilsin;

toʻrtinchi xatboshidagi “hamda viloyat (Qoraqalpogʻiston Respublikasi, Toshkent shahar) kasaba uyushmalari kengashiga ham, agar baxtsiz hodisa Oʻzbekiston Kasaba uyushmalari Federatsiyasi Kengashiga aʼzo tashkilotda yuz bergan boʻlsa” soʻzlari chiqarib tashlansin;

z) 9-bandning ikkinchi xatboshidagi “Sanoatkontexnazorat” soʻzidan keyin “yoki “Oʻzdavenergonazorat” inspeksiyasi” soʻzlari qoʻshilsin;

i) 10-bandga quyidagi mazmundagi xatboshi qoʻshilsin:

“Ushbu baxtsiz hodisa oʻlim sodir boʻlgan vaqtdan boshlab oʻlim bilan tugagan baxtsiz hodisa sifatida hisobga olinishi kerak”.

4. IV boʻlimda:

a) 7-banddagi “prokuratura”, “davlat avtomobil nazorati, davlat yongʻin nazorati organlari” soʻzlari tegishli ravishda “hududiy ichki ishlar organlari va yoʻl harakati xavfsizligi davlat xizmati, yongʻin xavfsizligi davlat xizmati” soʻzlari bilan almashtirilsin;

b) 8-banddagi “Prokuratura organlari” va “Davlat mehnat texnika nazoratiga” soʻzlari tegishli ravishda “Hududiy ichki ishlar organlari” Mehnatni muhofaza qilish va mehnat sharoitlari ekspertizasi davlat inspeksiyasiga” soʻzlari bilan almashtirilsin.

5. Nizomga 1, 3, 4 va 5-ilovalar matnidagi “korporatsiya, uyushma, konsern” soʻzlari “xoʻjalik boshqaruvi organi” soʻzlari bilan almashtirilsin.