Giyohvandlikning oldini olish va narkotik moddalarning noqonuniy aylanishiga qarshi kurash sohasida xorijiy, xalqaro tashkilotlar yoki chet el davlatlari, shuningdek ichki donorlarning mablagʻlari, Oʻzbekiston Respublikasining davlat tashkilotlari yoki nodavlat notijorat tashkilotlarining oʻz mablagʻlari hisobiga moliyalashtiriladigan texnik koʻmaklashish loyihalari/dasturlarini samarali amalga oshirish, ularning amalga oshirilishi uchun faoliyatni muvofiqlashtirishni takomillashtirish va qatʼiy nazoratni taʼminlash maqsadida Vazirlar Mahkamasi qaror qiladi:

1. Giyohvandlikning oldini olish va narkotik moddalarning noqonuniy aylanishiga qarshi kurash sohasida xorijiy, xalqaro tashkilotlar yoki chet el davlatlari, shuningdek boshqa yuridik shaxslar tomonidan moliyalashtiriladigan texnik koʻmaklashish loyihalari/dasturlarini amalga oshirish tartibi toʻgʻrisidagi nizom ilovaga muvofiq tasdiqlansin.

2. Vazirliklar va idoralar bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.

3. Oʻzbekiston Respublikasi Tashqi ishlar vazirligi va Adliya vazirligi ushbu Nizomni xalqaro moliyaviy va iqtisodiy institutlar, chet el hukumat tashkilotlari, xalqaro va xorijiy nodavlat notijorat tashkilotlarning vakolatxonalari va filiallariga yetkazsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Giyohvandlik vositalari va psixotrop moddalar toʻgʻrisida”, “Fuqarolarning sogʻligʻini saqlash toʻgʻrisida”, “Oʻzbekiston Respublikasida yoshlarga oid davlat siyosatining asoslari toʻgʻrisida”, “Axborot erkinligi prinsiplari va kafolatlari toʻgʻrisida”gi Oʻzbekiston Respublikasi qonunlari va Oʻzbekiston Respublikasining boshqa normativ-huquqiy hujjatlari asosida ishlab chiqilgan.

2. Nizom, agar Oʻzbekiston Respublikasining xalqaro shartnomalarida oʻzgacha hol nazarda tutilmagan boʻlsa, qonunchilikka muvofiq giyohvandlikning oldini olish va narkotik moddalarning noqonuniy aylanishiga qarshi kurash sohasida xorijiy, xalqaro tashkilotlar yoki chet el davlatlari, shuningdek ichki donorlarning mablagʻlari, Oʻzbekiston Respublikasining davlat tashkilotlari yoki nodavlat notijorat tashkilotlarining oʻz mablagʻlari hisobiga moliyalashtiriladigan texnik koʻmaklashish loyihalari/dasturlarini koʻrib chiqish, ekspertizadan oʻtkazish, amalga oshirish, amalga oshirish monitoringini olib borish, uzaytirish, oʻzgartirish, toʻxtatib qoʻyish, toʻxtatish, shuningdek bekor qilish tartibini belgilaydi.

Oʻzbekiston Respublikasi norezidentlari (xorijiy, xalqaro tashkilotlar yoki chet el davlatlari) va Oʻzbekiston Respublikasi rezidentlari (ichki donorlar, Oʻzbekiston Respublikasining davlat tashkilotlari yoki nodavlat notijorat tashkilotlari) giyohvandlikning oldini olish va narkotik moddalarning noqonuniy aylanishiga qarshi kurash sohasida texnik koʻmaklashish loyihalari/dasturlarining tashabbus koʻrsatuvchilari boʻlishi mumkin.

3. Giyohvandlikning oldini olish va narkotik moddalarning noqonuniy aylanishiga qarshi kurash sohasida texnik koʻmaklashish loyihasi/dasturi (keyingi oʻrinlarda — loyiha/dastur deb ataladi) xorijiy, xalqaro tashkilotlar yoki chet el davlatlari tomonidan moliyalashtirilgan taqdirda, tashabbus koʻrsatuvchi loyiha/dasturni amalga oshirish toʻgʻrisidagi taklifni belgilangan tartibda Oʻzbekiston Respublikasi Tashqi ishlar vazirligiga yuboradi.

Loyiha/dastur ichki donorlarning mablagʻlari, Oʻzbekiston Respublikasining davlat tashkilotlari yoki nodavlat notijorat tashkilotlarining oʻz mablagʻlari hisobiga moliyalashtirilgan taqdirda, tashabbus koʻrsatuvchi loyiha/dasturni amalga oshirish toʻgʻrisidagi taklifni belgilangan tartibda Oʻzbekiston Respublikasi Vazirlar Mahkamasi huzuridagi Narkotik moddalarni nazorat qilish milliy axborot-tahlil markaziga (keyingi oʻrinlarda — Narkotik moddalarni nazorat qilish markazi deb ataladi) yuboradi.

4. Loyiha/dasturni amalga oshirish boʻyicha taklifning tashabbus koʻrsatuvchisi, shuningdek uni amalga oshirishning maqsadga muvofiqligini asoslagan va moliyalashtirish manbalarini hamda kutilayotgan natijalarni, shuningdek boshqa shartlarni koʻrsatgan holda tushuntirish xati taqdim etadi.

5. Oʻzbekiston Respublikasi Tashqi ishlar vazirligi bir hafta muddatda xorijiy, xalqaro tashkilotlar yoki chet el davlatlari tomonidan moliyalashtiriladigan loyiha/dasturni amalga oshirish toʻgʻrisidagi taklifni koʻrib chiqadi hamda Narkotik moddalarni nazorat qilish markaziga loyiha/dasturni bundan keyin jadallashtirish imkoniyatlari haqida taklif kiritadi.

6. Narkotik moddalarni nazorat qilish markazi bir hafta muddatda:

loyiha/dasturni amalga oshirish toʻgʻrisida tushgan taklifni ekspertizadan oʻtkazadi hamda ekspert ishlanmasini yanada davom ettirish zarurligini va uni amalga oshirishning maqsadga muvofiqligini aniqlaydi;

koʻrib chiqilayotgan loyiha/dasturning oʻziga xosligini hisobga olgan holda loyiha/dasturni ushbu Nizomga 1-ilovaga muvofiq loyiha/dasturda nazarda tutilgan masalalar vakolatiga kiradigan tegishli vazirliklar va idoralarga ekspertizadan oʻtkazish uchun kiritadi.

7. Oʻzbekiston Respublikasining ekspertiza organlari oʻn kun muddatda oʻz vakolatlari doirasida loyiha/dastur har tomonlama puxta ishlab chiqilishini taʼminlaydilar va belgilangan tartibda ekspert xulosalarini Narkotik moddalarni nazorat qilish markaziga yuboradi.

Zarur hollarda Narkotik moddalarni nazorat qilish markazi loyiha/dastur amalga oshirilishining boʻlishi mumkin boʻlgan salbiy maʼnaviy-axloqiy, ijtimoiy-iqtisodiy, huquqiy va boshqa oqibatlari yoʻqligi toʻgʻrisida xulosa olish uchun vakolatli tashkilotlarning vakillarini, alohida mutaxassislar va mustaqil ekspertlarni jalb etgan holda ishchi guruh tashkil etishi mumkin.

8. Narkotik moddalarni nazorat qilish markazi bir hafta muddatda:

ekspertiza organlarining xulosalarini tahlil qiladi va umumlashtiradi;

ekspertiza organlari tomonidan ijobiy xulosalar kiritilgan taqdirda loyiha/dasturni belgilangan tartibda Oʻzbekiston Respublikasi narkotik moddalarni nazorat qilish davlat komissiyasiga kiritadi;

ekspertiza organlari tomonidan loyiha/dasturni amalga oshirishning maqsadga muvofiq emasligi toʻgʻrisida asoslangan salbiy xulosalar kiritilgan yoki loyiha/dasturni puxta ishlash yuzasidan mulohazalar bildirilgan taqdirda yigʻma xulosa tayyorlaydi hamda koʻrib chiqish va yanada puxta ishlash uchun uni tashabbus koʻrsatuvchiga qaytarish uchun Oʻzbekiston Respublikasi Tashqi ishlar vazirligiga yuboradi;

loyiha/dastur ichki donorlarning mablagʻlari, Oʻzbekiston Respublikasining davlat tashkilotlari yoki nodavlat notijorat tashkilotlarining oʻz mablagʻlari hisobiga moliyalashtirilgan taqdirda Narkotik moddalarni nazorat qilish markazi yigʻma xulosani bevosita tashabbus koʻrsatuvchiga yuboradi.

9. Narkotik moddalarni nazorat qilish markazi zaruriyat boʻlganda tegishli ekspertiza organlarini va tashkil etilgan ishchi guruhni taklif etgan holda loyiha/dasturni kollegial muhokama qilishni tashkil etishi mumkin.

10. Loyiha/dasturni amalga oshirish toʻgʻrisidagi taklifni takroriy kiritish ushbu Nizomning 3 va 4-bandlari talablariga muvofiq amalga oshiriladi.

11. Loyiha/dastur belgilangan tartibda Oʻzbekiston Respublikasi narkotik moddalarni nazorat qilish davlat komissiyasi tomonidan maʼqullangandan keyin loyiha/dasturning tashabbus koʻrsatuvchisi bilan tegishli hujjatlar (memorandum yoki kontrakt) rasmiylashtiriladi.

12. Loyiha/dasturni amalga oshirish boʻyicha masʼul vazirlik, idora yoki boshqa tashkilot (keyingi oʻrinlarda — bajaruvchi deb ataladi), shuningdek loyiha/dasturni amalga oshirish guruhi rahbari Oʻzbekiston Respublikasi narkotik moddalarni nazorat qilish davlat komissiyasining qarori bilan tasdiqlanadi.

13. Loyiha/dasturni amalga oshirish boʻyicha bajaruvchi tegishli hujjatlar rasmiylashtirilgandan keyin oʻn kun muddatda:

aniq muddatlar va birgalikda bajaruvchilarni koʻrsatgan holda loyiha/dasturni amalga oshirishni taʼminlash tadbirlari rejasini ishlab chiqadi hamda manfaatdor vazirliklar va idoralar bilan kelishadi;

mablagʻlarni oʻzlashtirish jadvalini ishlab chiqadi va Oʻzbekiston Respublikasi Moliya vazirligi bilan kelishadi.

Loyiha/dasturni amalga oshirish boʻyicha tadbirlarning kelishilgan rejasi va mablagʻlarni oʻzlashtirish jadvali Narkotik moddalarni nazorat qilish markazi tomonidan tasdiqlanadi.

14. Aniq loyiha/dastur bajarilishi monitoringini olib borish bevosita bajaruvchi tomonidan taʼminlanadi, loyiha/dastur amalga oshirilishining umumiy monitoringi, muvofiqlashtirish va nazorat qilish esa Narkotik moddalarni nazorat qilish markazi tomonidan amalga oshiriladi.

15. Loyiha/dasturning bajaruvchisi:

doimiy asosda loyiha/dastur amalga oshirilishining batafsil monitoringini olib boradi;

har oyda Narkotik moddalarni nazorat qilish markaziga tasdiqlangan tadbirlar rejasiga muvofiq loyiha/dasturning amalga oshirilishi toʻgʻrisidagi tezkor axborotni va yilning har choragida — toʻliq tahliliy hisobotni kiritadi;

har oyda ajratilgan mablagʻlardan maqsadli foydalanilishi toʻgʻrisida Oʻzbekiston Respublikasi Moliya vazirligiga axborot kiritadi;

tasdiqlangan ish rejasiga muvofiq Oʻzbekiston Respublikasi narkotik moddalarni nazorat qilish davlat komissiyasi majlisida hisobot beradi.

16. Narkotik moddalarni nazorat qilish markazi:

yilning har choragida Vazirlar Mahkamasiga loyihalar/dasturlar amalga oshirilishi va amalga oshirish natijalari toʻgʻrisidagi axborotni kiritadi;

tegishli loyihalar/dasturlarni bajaruvchilarning hisobotlarini Oʻzbekiston Respublikasi Narkotik moddalarni nazorat qilish davlat komissiyasi va Vazirlar Mahkamasining tegishli komplekslari majlislarida koʻrib chiqish toʻgʻrisida taklif kiritadi.

17. Texnik koʻmaklashish mablagʻlaridan, shu jumladan nomoddiy shakldagi vositalardan maqsadli foydalanilishini hisobga olish va nazorat qilish qonunchilikka muvofiq belgilangan shakllar boʻyicha va muddatlarda Oʻzbekiston Respublikasi Moliya vazirligi tomonidan amalga oshiriladi.

18. Ayrim hollarda, tashabbus koʻrsatuvchi va bajaruvchi tomonidan majburiyatlar buzilishi holatlari aniqlangan taqdirda Oʻzbekiston Respublikasi Narkotik moddalarni nazorat qilish davlat komissiyasiga belgilangan tartibda:

xorijiy, xalqaro tashkilotlar yoki chet el davlatlari tomonidan moliyalashtiriladigan loyihalar/dasturlar boʻyicha — Narkotik moddalarni nazorat qilish markazi tomonidan Oʻzbekiston Respublikasi Tashqi ishlar vazirligi bilan birgalikda;

ichki donorlar, Oʻzbekiston Respublikasining davlat tashkilotlari yoki nodavlat notijorat tashkilotlarining oʻz mablagʻlari hisobiga moliyalashtiriladigan loyihalar/dasturlar boʻyicha — Narkotik moddalarni nazorat qilish markazi tomonidan zarur chora-tadbirlar koʻrilishi toʻgʻrisida takliflar kiritadi.

19. Loyiha/dasturni amalga oshirish yakunlangandan keyin bajaruvchi bir oy muddatda Oʻzbekiston Respublikasi narkotik moddalarni nazorat qilish davlat komissiyasiga va Oʻzbekiston Respublikasi Moliya vazirligiga:

vazirlik, idora yoki boshqa tashkilotning rahbari tomonidan tasdiqlangan loyiha/dastur amalga oshirilishi yakunlari toʻgʻrisida yakuniy hisobot;

loyiha/dasturni amalga oshirish doirasida erishilgan natijalardan foydalanish toʻgʻrisida taklif;

balansga berish hamda olingan moddiy-texnika vositalaridan va boshqalardan foydalanish toʻgʻrisida taklif kiritadi.

Giyohvandlikning oldini olish va narkotik moddalarning noqonuniy aylanishiga qarshi kurash sohasida texnik koʻmaklashish loyihalari/dasturlarini koʻrib chiqish, ekspertizadan oʻtkazish va amalga oshirish va amalga oshirilishi monitoringini olib borish sxemasi ushbu Nizomga 2-ilovada keltirilgan.

20. Loyiha/dasturni uzaytirish va/yoki oʻzgartirish toʻgʻrisidagi masalani koʻrib chiqish ushbu Nizomning II boʻlimiga muvofiq amalga oshiriladi.

21. Toʻxtatib turish, toʻxtatish va bekor qilish toʻgʻrisidagi taklif bajaruvchi yoki manfaatdor vazirliklar va idoralar tomonidan:

xorijiy, xalqaro tashkilotlar yoki chet el davlatlari tomonidan loyihalashtirilayotgan loyihalar/dasturlar boʻyicha — Oʻzbekiston Respublikasi Moliya vazirligi va Tashqi ishlar vazirligi bilan kelishgan holda;

ichki donorlarning mablagʻlari, Oʻzbekiston Respublikasining davlat tashkilotlari yoki nodavlat notijorat tashkilotlari mablagʻlari hisobiga moliyalashtirilayotgan loyihalar/dasturlar boʻyicha — Oʻzbekiston Respublikasi Moliya vazirligi bilan kelishgan holda qonunchilikka muvofiq Vazirlar Mahkamasiga kiritiladi.