Oʻzbekiston Respublikasi Hukumati va Oʻmon Sultonligi Hukumati, bundan keyin “Tomonlar” deb ataluvchilar,

Ikki davlat oʻrtasida qoʻlyozmalar hamda tarixiy hujjatlarni saqlash va nashr etish boʻyicha hamkorlikni kengaytirish istagida,

Tomonlar oʻrtasida hamkorlikni yanada kengaytirishga, shuningdek oʻzbek va oʻmon mutaxassislari va tadqiqotchilari oʻrtasida ilmiy hamda madaniy sohalardagi aloqalarni kengaytirishga intilib,

Oʻzbekiston Respublikasi Fanlar akademiyasi Abu Rayhon Beruniy nomidagi Sharqshunoslik instituti kutubxonasida (keyinchalik Institut kutubxonasi) saqlanayotgan noyob qoʻlyozmalar fondining ahamiyatini anglagan holda,

2009-yil 30-martda imzolangan Oʻzbekiston Respublikasi Hukumati bilan Oʻmon Sultonligi Hukumati oʻrtasida Toshkent shahrida Oʻzbekiston Respublikasi Fanlar akademiyasi Abu Rayhon Beruniy nomidagi Sharqshunoslik institutining kutubxonasi binosini qurish toʻgʻrisida Anglashuv protokoli qoidalarini amalga oshirish maqsadida,

Oʻmon Sultonligi Hukumatining Institut kutubxonasi binosini begʻaraz moliyaviy koʻmagi asosida qurib berish taklifidan kelib chiqqan holda,

Tomonlar oʻzaro kelishuv va oʻz davlatlarining milliy qonunchiligi asosida Institut kutubxonasi binosining qurilishi loyihasini amalga oshiradilar.

Oʻmon Sultonligi Hukumati Institut kutubxonasi binosini qurib berish uchun begʻaraz moliyalashtiradi.

Oʻzbek Tomoni Institut kutubxonasi binosining qurilishi uchun Toshkent shahrida joylashgan kamida 10 ming kv. m yer uchastkasini ajratadi.

Oʻzbek tomoni Institut kutubxonasi binosining qurilishi loyihasini amalga oshirish maqsadida Oʻzbekistonga olib kiriladigan barcha asbob-uskuna hamda zarur inventarni bojxona toʻlovlaridan ozod qiladi.

Tomonlar ilmiy va madaniy, shuningdek Institut kutubxonasi fondida qoʻlyozma asarlarni saqlash, kataloglashtirish, nashr etish, birgalikda ilmiy konferensiya va simpoziumlar tashkil etish, mutaxassislarni almashish hamda ularning malakasini oshirish kabi sohalarda hamkorlikni amalga oshiradilar. Mazkur hamkorlikning aniq yoʻnalishlari Tomonlarning vakolatli organlari tarafidan kelishiladigan dasturda belgilangan holda amalga oshiriladi.

Ushbu Bitim qoidalarini amalga oshirish maqsadida Oʻzbekiston Respublikasi Tashqi ishlar vazirligi, Fanlar akademiyasi va Oʻmon Sultonligi Tashqi ishlar vazirligi vakolatli organlar hisoblanadi.

Tomonlar mazkur Bitimda nazarda tutilgan Institut kutubxonasi binosining qurilishi loyihasi hamda ilmiy va madaniy hamkorlikning amalga oshirish bilan bogʻliq masalalarni hal etish uchun Tomonlar davlatlarining milliy qonunchiligiga muvofiq zarur tadbirlarni koʻrishga kelishdilar.

Tomonlar Institut kutubxonasi binosining qurilishi loyihasini amalga oshirish maqsadida Tomonlarning vakolatli organlari vakillaridan iborat Qoʻshma ishchi guruhini tashkil etadilar va quyidagi chora-tadbirlarni amalga oshiradi:

1. Loyihani muvofiqlashtiradi, uning bajarish muddatlarini belgilaydi, ilmiy va madaniy hamkorlik dasturini tayyorlaydi, shuningdek ularga kerakli oʻzgartishlar kiritadi.

2. Loyihaning texnikaviy va moliyaviy shartlarini muhokama qiladi va kelishadi.

Tomonlar mazkur Bitimni imzolagan sanadan soʻng uch oy davomida Qoʻshma ishchi guruhining yigʻilishini oʻtkazishga kelishdilar.

Ushbu Bitim qoidalarini qoʻllash va talqin qilishda yuzaga keladigan bahs va kelishmovchiliklar muzokara hamda maslahatlashuvlar orqali hal qilinadi.

Tomonlarning oʻzaro kelishuviga muvofiq, ushbu Bitimga uning ajralmas qismi hisoblanadigan alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin hamda ular mazkur Bitimning 12-moddasida belgilangan tartibda kuchga kiradi.

Ushbu Bitim imzolangan vaqtdan boshlab kuchga kiradi va nomuayyan muddatga tuziladi. Tomonlardan biri ushbu Bitimning amal qilishini toʻxtatish niyati toʻgʻrisida boshqa Tomonni diplomatik kanallar orqali yozma ravishda xabardor qilsa, Bitim mazkur xabarnoma yuborilgan kundan boshlab olti (6) oy oʻtgandan soʻng amal qilishini toʻxtatadi.

Agar Tomonlar boshqacha kelishmagan boʻlsalar, mazkur Bitimning amal qilishini toʻxtatilishi, uning amal qilishi davrida boshlangan dasturlar va loyihalarni toʻliq amalga oshirilishiga taʼsir etmaydi.

Masqat shahrida 2009-yil 5-oktabrda ikki asl nusxada har biri oʻzbek, arab va ingliz tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilishda kelishmovchiliklar yuzaga kelgan holda ingliz tilidagi matn ustuvor hisoblanadi.