Toʻqimachilik sanoatiga investitsiyalarni jalb etish va tugatilgan “Oʻzbektoʻqimachimash” ishlab chiqarish birlashmasining ishlab chiqarish maydonlarining bir qismida zamonaviy toʻqimachilik ishlab chiqarishini tashkil etish uchun zarur shart-sharoitlar yaratish maqsadida Vazirlar Mahkamasi qaror qiladi:

1. “Oʻzbekyengilsanoat” davlat-aksiyadorlik kompaniyasi, Oʻzbekiston Respublikasi Moliya vazirligi, Iqtisodiyot vazirligi va Davlat mulki qoʻmitasining toʻqimachilik sanoatiga investitsiyalarni jalb etish va tugatilgan “Oʻzbektoʻqimachimash” ishlab chiqarish birlashmasining Toshkent shahar, Yakkasaroy tumani, U.Nosir koʻchasi, 53b-uyda joylashgan 3 (temirchilik — presslash sexi) va 8 (asbobsozlik-mexanika sexi) — ishlab chiqarish korpuslarini (keyingi oʻrinlarda 3 va 8-ishlab chiqarish korpuslari deb yuritiladi) ularning bazasida zamonaviy toʻqimachilik ishlab chiqarishini tashkil etish sharti bilan “BF Textile Produktion” masʼuliyati cheklangan jamiyat xorijiy korxonaga sotish toʻgʻrisidagi taklifiga rozilik berilsin.

2. “BF Textile Produktion” masʼuliyati cheklangan jamiyat xorijiy korxona oʻz zimmasiga:

3 va 8-ishlab chiqarish korpuslarini mustaqil baholash tashkiloti tomonidan aniqlangan 5,443 mlrd soʻm miqdoridagi baholash qiymati boʻyicha, toʻlovlarni 7 yil mobaynida yarim yillik teng ulushlar bilan toʻlagan holda, sotib olish;

2011-yil 1-sentabrgacha sotib olinayotgan 3 va 8-ishlab chiqarish korpuslari bazasida bir yilda kamida 5 ming tonna paxta tolasini qayta ishlash quvvatiga ega boʻlgan zamonaviy texnologik asbob-uskunalar bilan jihozlangan yigiruv-toʻquv korxonasini tashkil etish shaklidagi 7,0 mln AQSH dollariga teng summalik investitsiya majburiyatlarini bajarish;

kamida 300 ta yangi ish oʻrni yaratish majburiyatlarini qabul qilishi maʼlumot uchun qabul qilinsin.

3. Oʻzbekiston Respublikasi Davlat mulki qoʻmitasi “Oʻzbekyengilsanoat” davlat-aksiyadorlik kompaniyasi bilan birgalikda:

oʻn kun muddatda “BF Textile Produktion” masʼuliyati cheklangan jamiyat xorijiy korxona bilan, ushbu qarorning 2-bandida koʻrsatilgan shartlarda investitsiyalar kiritish jadvalini tasdiqlangan holda, 3 va 8-ishlab chiqarish korpuslarining oldi-sotdi shartnomasini tuzsin;

“BF Textile Produktion” masʼuliyati cheklangan jamiyat xorijiy korxona qabul qilingan investitsiya majburiyatlarini zarur tarzda bajarishi ustidan qatʼiy nazoratni taʼminlasin;

“Yengilsanoatservis” unitar korxonasining ikki qavatli maʼmuriy binosi tutashib ketgan hududlar bilan birga investitsiya majburiyatlari bajarilgandan soʻng keyinchalik sotib olish sharti bilan “BF Textile Produktion” masʼuliyati cheklangan jamiyat xorijiy korxonaga belgilangan tartibda ijaraga berilishini taʼminlasin.

4. Toshkent shahar hokimligi Toshkent shahar Arxitektura va qurilish bosh boshqarmasi bilan birgalikda tugatilgan “Oʻzbektoʻqimachimash” ishlab chiqarish birlashmasi hududining tasdiqlangan bosh rejasiga bir oy muddatda tegishli oʻzgartirishlar kiritilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.