O‘zbekiston Respublikasi Prezidentining “2007 — 2010-yillarda umumiy foydalaniladigan avtomobil yo‘llari qurilishini rivojlantirish chora-tadbirlari to‘g‘risida” 2006-yil 20-dekabrdagi PQ-535-son qaroriga muvofiq, shuningdek yuqori xalqaro talablar va standartlarga javob beradigan avtomobil yo‘llari tarmog‘ini yanada rivojlantirish va takomillashtirish, xalqaro ahamiyatga va davlat ahamiyatiga ega bo‘lgan umumiy foydalaniladigan avtomobil yo‘llarini xalqaro transport yo‘laklariga keng integratsiyalashni ta’minlash maqsadida Vazirlar Mahkamasi qaror qiladi:

1. Quyidagilar:

2010-yilda xalqaro ahamiyatga ega bo‘lgan umumiy foydalaniladigan avtomobil yo‘llarini mukammal va o‘rtacha ta’mirlash dasturi 1-ilovaga* muvofiq;

2010-yilda davlat ahamiyatiga ega bo‘lgan umumiy foydalaniladigan avtomobil yo‘llarini mukammal va o‘rtacha ta’mirlash dasturi 2-ilovaga* muvofiq tasdiqlansin.

2. Ushbu qaror bilan tasdiqlangan dasturlarga (keyingi o‘rinlarda dasturlar deb ataladi) kiritilgan obyektlarni mukammal va o‘rtacha ta’mirlashni moliyalashtirish O‘zbekiston Respublikasi Moliya vazirligi huzuridagi Respublika yo‘l jamg‘armasi mablag‘lari hisobiga amalga oshirilishi ma’lumot uchun qabul qilinsin.

3. O‘zbekiston Respublikasi Moliya vazirligi huzuridagi Respublika yo‘l jamg‘armasi, “Davarxitektqurilish” qo‘mitasi, Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari:

tasdiqlangan dasturlarga kiritilgan obyektlarning loyiha-smeta hujjatlari bir oy muddatda o‘z vaqtida va sifatli ishlab chiqilishini, shuningdek ularning belgilangan tartibda tarmoq va davlat ekspertizasidan o‘tkazilishini;

2010-yil 1-maygacha 1 va 2-ilovalarga kiritilgan yangidan boshlanadigan obyektlar bo‘yicha tanlov savdolari o‘tkazilishini va belgilangan tartibda pudrat shartnomalari tuzilishini;

“O‘zavtoyo‘l” davlat-aksiyadorlik kompaniyasi va pudrat yo‘l-qurilish tashkilotlari bilan birgalikda, zarurat bo‘lganda ishlarni 2-3 smenada tashkil etishni nazarda tutgan holda, malakali mehnat resurslari jamlanishini;

tasdiqlangan dasturlarni amalga oshirish doirasida ajratilgan mablag‘lardan maqsadli foydalanilishi, bajarilayotgan yo‘l-ta’mirlash ishlari, foydalanilayotgan xomashyo va materiallarning sifati, shuningdek qurilish-texnik me’yorlar va qoidalarga rioya qilinishi yuzasidan qat’iy nazoratni ta’minlasinlar.

4. O‘zbekiston Respublikasi Moliya vazirligi huzuridagi Respublika yo‘l jamg‘armasi, “O‘zavtoyo‘l” davlat-aksiyadorlik kompaniyasi va “Davarxitektqurilish” qo‘mitasi:

pudrat yo‘l-qurilish tashkilotlari bilan birgalikda 1 va 2-ilovalarga kiritilgan obyektlar bo‘yicha ishlarni bajarishning kalendar jadvallarini ishlab chiqsinlar va tasdiqlasinlar;

har oyda O‘zbekiston Respublikasi Moliya vazirligi huzuridagi Respublika yo‘l jamg‘armasining Texnik kengashi va “O‘zavtoyo‘l” davlat-aksiyadorlik kompaniyasining kengaytirilgan qo‘shma majlislarida pudrat tashkilotlari rahbarlarining tasdiqlangan dasturlarda nazarda tutilgan topshiriqlar va vazifalar bajarilishi to‘g‘risidagi hisobotlarini eshitib borsinlar;

har bir chorak yakunlari bo‘yicha O‘zbekiston Respublikasi Vazirlar Mahkamasiga xalqaro ahamiyatga va davlat ahamiyatiga ega bo‘lgan umumiy foydalaniladigan avtomobil yo‘llarini mukammal va o‘rtacha ta’mirlash dasturlari amalga oshirilishi to‘g‘risidagi yig‘ma axborotni taqdim etsinlar.

5. “O‘zbekneftgaz” milliy xolding kompaniyasi O‘zbekiston Respublikasi Moliya vazirligi huzuridagi Respublika yo‘l jamg‘armasi va “O‘zavtoyo‘l” davlat-aksiyadorlik kompaniyasi bilan kelishilgan, Vazirlar Mahkamasi tomonidan tasdiqlangan jadvallarga muvofiq yo‘lbop suyuq neft-bitumning belgilangan tartibda o‘z vaqtida sotilishini ta’minlasin.

6. Qoraqalpog‘iston Respublikasi Vazirlar Kengashi Raisi, viloyatlar, shaharlar va tumanlar hokimlari zimmasiga:

yo‘l harakati xavfsizligi boshqarmalari bilan birgalikda yo‘l-ta’mirlash ishlari olib borilayotgan uchastkalarda avtotransport oqimlari harakati zarur darajada tashkil etilishi;

qurilishi tugallangan obyektlarni, mukammal va o‘rtacha ta’mirlangan umumiy foydalaniladigan avtomobil yo‘llari topshirish va ularni foydalanishga qabul qilish bo‘yicha tegishli obyektlarni qabul qilish komissiyalari ishida o‘z vakillarining qatnashishi;

tasdiqlangan dasturlarning so‘zsiz bajarilishini ta’minlash uchun yo‘l-qurilish texnikasi va mehnat resurslarining dasturlarda nazarda tutilmagan ishlarga jalb etilishini taqiqlagan holda pudrat yo‘l-ta’mirlash tashkilotlariga qulay maishiy va boshqa zarur shart-sharoitlar yaratilishi yuzasidan shaxsiy javobgarlik yuklansin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari B.A. Xo‘jayev zimmasiga yuklansin.