Oʻzbekiston aloqa va axborotlashtirish agentligi bilan Ozarbayjon Respublikasi Aloqa va axborot texnologiyalari vazirligi, bundan keyin “Tomonlar” deb ataluvchilar,

1996-yil 27-mayda Boku shahrida imzolangan Oʻzbekiston Respublikasi bilan Ozarbayjon Respublikasi oʻrtasida doʻstlik va hamkorlik toʻgʻrisidagi shartnoma qoidalariga asoslanib,

ikki mamlakatning ijtimoiy va iqtisodiy rivojlanishi doirasida axborot va kommunikatsiya texnologiyalari (bundan keyin “AKT”) sohasida oʻzaro manfaatli hamkorlikni rivojlantirish va mustahkamlashga intilib,

tegishli mamlakatlar jamoatchiligiga samarali va barqaror xizmat koʻrsatishning umumiy maqsad va manfaatlariga amal qilib,

Tomonlar uchun axborot va kommunikatsiya texnologiyalari sohasida umumiy ahamiyatga ega fikrlar, axborot, bilim va tajriba almashishni oʻta samarali deb hisoblab,

Tomonlar oʻrtasida AKT sohasida iqtisodiy munosabatlarni mustahkamlashda mavjud salohiyat va imkoniyatlardan toʻla foydalanish zarurligini anglab,

AKT sohasida Tomonlar oʻrtasida sarmoyalarning oʻsishida koʻmaklashish, qoʻshma korxonalarni rivojlantirish, umumiy manfaatlarni kengaytirish, texnologik taraqqiyot va iqtisodiy munosabatlarni rivojlantirishga intilishni inobatga olib,

Tomonlar, oʻz vakolatlari doirasida munosabatlarini oʻzaro manfaatdorlik asosida quradilar, Tomonlar davlatlarining milliy qonunchiligi, xalqaro huquq normalari va prinsiplari hamda ushbu Bitim qoidalariga muvofiq AKT sohasida iqtisodiy, sanoat, texnik, ilmiy va taʼlim yoʻnalishlarida hamkorlikni kelgusida ham rivojlantirish va mukammallashtirish majburiyatini oladilar.

Tomonlar oʻrtasidagi hamkorlik yoʻnalishlari AKTga oid quyidagi sohalarni oʻz ichiga oladi:

1) Tomonlar mutaxassislari oʻrtasida telekommunikatsiyani tartibga solish boʻyicha tajriba almashish;

2) “elektron hukumat”ni shakllantirish va elektron raqamli imzo texnologiyalarini tatbiq etishda hamkorlik qilish;

3) AKT sohasida investitsiya jalb etishga koʻmaklashish;

4) oʻzaro manfaatli shartlar asosida AKT sohasida qoʻshma korxonalar tashkil etishga koʻmaklashish;

5) Oʻzbekistonning taʼlim muassasalarida Ozarbayjon mutaxassislari uchun oʻquv kurslari tashkil etish;

6) AKT sohasida qoʻshma seminar, konferensiya, forum va koʻrgazmalar oʻtkazish;

7) ikki mamlakat milliy manfaatlari bir xil boʻlganda xalqaro tashkilotlarda (Butunjahon pochta ittifoqi, Xalqaro elektron aloqa ittifoqi va Aloqa sohasida mintaqaviy hamdoʻstlik kabilar) bir-birini qoʻllash;

8) ikki mamlakatning mavjud tranzit telefon trafigi almashinuvi imkoniyatlaridan samarali foydalanish masalalarini mutaxassislar darajasida muhokama qilish;

9) tajriba almashish maqsadida Tomonlardan har biri mutaxassislarining safarlarini tashkil qilish;

10) oʻzaro kelishuv boʻyicha AKT sohasidagi hamkorlikning boshqa yoʻnalishlari va shakllari.

Tomonlar mamlakatlarining tegishli organlari, tashkilotlari va korxonalariga AKT sohasida axborot almashuvini kengaytirish, mustahkam aloqalar shakllantirish va shuningdek bajarilgan ishlarni takomillashtirish, ishbilarmonlar aloqalarini kengaytirish, yangi texnologiyalarni qoʻllash maqsadida maxsus dasturlar va loyihalar bajarish sohasida hamkorlikda koʻmaklashishga yordam beradilar.

Tomonlar qishloq joylarda telekommunikatsiyani rivojlantirish sohasida umumiy amaliyotdan foydalanish uchun, mahalliy tarmoqlarni raqamlashtirish va tartibga solishda ikkala Tomon mutaxassislarining ishlarini muvofiqlashtirilishini taʼminlaydilar.

Ushbu Bitim qoidalari Tomonlarning boshqa xalqaro shartnomalaridan kelib chiqadigan huquqlari va majburiyatlariga daxl qilmaydi.

Tomonlar birgalikdagi faoliyat doirasida boshqa Tomonga beriladigan maxfiy axborotni himoya qilish va shuningdek hech qanday uchinchi tomonga tarqatmaslik maqsadida Tomonlar davlatlarining milliy qonunchiligiga muvofiq zarur chora-tadbirlarni oʻtkazishga javobgardirlar, boshqa Tomonning yozma ravishdagi ruxsati olingan holatlar bundan mustasno. Ushbu Bitimning amal qilishi toʻxtatilgan taqdirda mazkur modda qoidalari amal qilishni davom etadi.

Ushbu Bitim qoidalarini talqin qilishda yoki qoʻllashda yuzaga keladigan Tomonlar oʻrtasidagi har qanday bahslar muzokaralar yoki maslahatlashuvlar yoʻli bilan hal qilinadi.

Ushbu Bitim qoidalarini amalga oshirish masalalari boʻyicha Tomonlar oʻrtasidagi yozishmalar rus tilida olib boriladi.

Ikki Tomonning oʻzaro roziligiga koʻra mazkur Bitimga uning ajralmas qismi boʻlib hisoblanadigan, alohida protokollar bilan rasmiylashtiriladigan va 9-moddada koʻrsatilgan tartibda kuchga kiradigan oʻzgartish va qoʻshimchalar kiritilishi mumkin.

Ushbu Bitim diplomatik kanallar orqali Tomonlarning uning kuchga kirishi uchun zarur boʻlgan ichki davlat protseduralarini bajarganligi toʻgʻrisidagi soʻnggi yozma xabarnomani olgan kundan boshlab kuchga kiradi.

Ushbu Bitim 5 (besh) yil muddatga tuziladi va Tomonlardan hech biri uning amaldagi muddatining yakunidan kamida olti oy avval boshqa Tomonni Bitimning amal qilishini toʻxtatish toʻgʻrisida yozma ravishda xabardor qilmasa, uning amal qilish muddati keyingi bir yillik muddatga oʻz-oʻzidan uzaytiriladi.

Boku shahrida 2008-yil 11-sentabrda ikki nusxada, har biri oʻzbek, ozarbayjon va rus tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilishda kelishmovchiliklar yuzaga kelsa, rus tilidagi matn asos qilib olinadi.