Oʻzbekiston Respublikasining “Texnik jihatdan tartibga solish toʻgʻrisida”gi Qonuniga (Oʻzbekiston Respublikasi Oliy Majlisi palatalarining Axborotnomasi, 2009-y. 4-son, 140-modda) muvofiq buyuraman:

1. Texnik jihatdan tartibga solish sohasidagi ekspert kengashi toʻgʻrisida nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Ushbu Nizom Oʻzbekiston Respublikasining “Texnik jihatdan tartibga solish toʻgʻrisida”gi Qonuniga (Oʻzbekiston Respublikasi Oliy Majlisi palatalarining Axborotnomasi, 2009-y. 4-son, 140-modda) muvofiq davlat va xoʻjalik boshqaruvi organlari huzurida tuziladigan texnik jihatdan tartibga solish sohasidagi ekspert kengashlarining faoliyatlarini tartibga soladi.

1. Texnik jihatdan tartibga solish sohasidagi ekspert kengashlari (bundan keyingi oʻrinlarda kengash deb yuritiladi) umumiy va maxsus texnik reglamentlarni, texnik reglamentlarga oʻzgartish va qoʻshimchalarni ishlab chiqish, shuningdek mazkur reglamentlarni bekor qilish boʻyicha takliflarni ishlab chiqish uchun tashkil etiladi.

2. Kengashning asosiy vazifalari quyidagilardir:

umumiy va maxsus texnik reglamentlar loyihalarini ishlab chiqish;

umumiy va maxsus texnik reglamentlarga oʻzgartish va qoʻshimchalar kiritish, shuningdek, ularni bekor qilish toʻgʻrisida takliflar tayyorlash.

3. Kengash oʻziga yuklatilgan asosiy vazifalardan tashqari quyidagilarni amalga oshiradi:

davlat va xoʻjalik boshqaruvi organlarining vakolatlari doirasida texnik jihatdan tartibga solish davlat tizimining asosiy yoʻnalishlarini rivojlantirish boʻyicha ish rejalarini ishlab chiqish;

standartlashtirish boʻyicha tarmoq va tarmoqlararo texnika qoʻmitalariga belgilangan tartibda texnik jihatdan tartibga solish sohasidagi reja va tadbirlar ishlab chiqishda uslubiy yordam koʻrsatish.

4. Kengash quyidagi huquqlarga ega:

texnik reglamentlar ishlab chiqishda davlat va xoʻjalik boshqaruvi organlari, shuningdek, boshqa tashkilotlarning mutaxassislarini belgilangan tartibda jalb etish;

texnik reglamentlarni ishlab chiqishda davlat va xoʻjalik boshqaruvi organlaridan belgilangan tartibda tegishli maʼlumotlar olish;

texnik reglamentlar loyihalarini ishlab chiqish, shuningdek, amaldagi texnik reglamentlarga oʻzgartish va qoʻshimchalar kiritish yoki ularni bekor qilish boʻyicha texnik jihatdan tartibga solish sohasidagi vakolatli davlat organlariga takliflar kiritish;

texnik jihatdan tartibga solish sohasidagi vakolatli davlat organlariga texnik reglamentlar loyihalarini ekspertizadan oʻtkazish uchun yuborish.

5. Kengash oʻz faoliyati davomida texnik tartibga solish toʻgʻrisidagi qonunchilik hujjatlari talablariga amal qiladi.

Kengash texnik reglament loyihalarining tegishli davlat va xoʻjalik boshqaruvi organlari bilan kelishilishini taʼminlaydi.

6. Kengash tarkibi rais, rais oʻrinbosari va aʼzolardan iborat boʻladi. Ish yuritishni tashkillashtirish uchun kotib tayinlanadi.

7. Davlat va xoʻjalik boshqaruvi organi rahbarining oʻrinbosari — kengash raisi, davlat va xoʻjalik boshqaruvi organi tarkibiy tuzilmasining rahbari — kengash raisining oʻrinbosari, davlat va xoʻjalik boshqaruvi organi tarkibiy tuzilmasining masʼul xodimi – kengash kotibi etib tayinlanadi.

8. Kengash aʼzoligiga texnik reglamentlarni joriy etuvchi tashkilotlar, davlat va xoʻjalik boshqaruvi organlari, shuningdek, texnik reglamentlar qabul qilinishi munosabati bilan qayta koʻrib chiqilishi, oʻzgartirish kiritilishi yoki bekor qilinishi lozim boʻlgan mahsulotlar, ishlar va xizmatlar boʻyicha oʻzaro bogʻliq normativ hujjatlarni tasdiqlagan tashkilotlar, standartlashtirish boʻyicha bazaviy hamda tarmoqqa oid tashkilotlar vakillari tayinlanadi.

9. Kengash aʼzolari ushbu Nizomning 8-bandida koʻrsatilgan tashkilotlarning taqdimoti boʻyicha davlat va xoʻjalik boshqaruvi organi rahbarining buyrugʻi (farmoyishi) bilan tayinlanadi.

10. Kengash aʼzolari kengash ishida ishtirok etadi, kengash tomonidan qaror qabul qilishda ovoz beradi, texnik reglamentlarning loyihalari boʻyicha tegishli takliflarni beradi.

Kengash aʼzolari boshqa davlat va xoʻjalik boshqaruvi organlarida tuziladigan kengash ishida qatnashishi mumkin.

11. Kengash oʻz faoliyatini ushbu Nizomga muvofiq amalga oshiradi.

12. Kengash raisi:

kengash ishini tashkillashtiradi;

kengash majlisi boʻladigan sana va joyni belgilaydi;

kengash majlislarida raislik qiladi.

Kengash raisi boʻlmagan hollarda uning vazifalarini kengash raisining oʻrinbosari bajaradi.

13. Kengash kotibi oʻtkazilishi rejalashtirilayotgan majlislar toʻgʻrisida kengashning barcha aʼzolarini xabardor qiladi.

14. Texnik reglament loyihalari texnik reglamentlarni ishlab chiqish dasturlariga muvofiq kengash tomonidan ishlab chiqiladi.

15. Kengash tuziladigan davlat va xoʻjalik boshqaruvi organi texnik reglamentlar ishlab chiqilishi toʻgʻrisidagi xabarlarni belgilangan tartibda nashr qiladi.

16. Kengash texnik reglamentning talablari tatbiq etiladigan mahsulotlar, ishlar va xizmatlarning guruhi va turlarini aniqlaydi. Mahsulotlar, ishlar va xizmatlarning texnik reglamentlarda belgilangan talablarga muvofiqligini baholash usullari belgilanadi.

17. Texnik reglamentning loyihasi kelishilishi lozim boʻlgan tegishli tashkilotlarning roʻyxati kengash tomonidan belgilanadi va ularga yuboriladi.

18. Texnik reglament loyihalari 30 kun mobaynida kelishilishi lozim.

19. Texnik reglament loyihasi boʻyicha kelishilishi lozim boʻlgan tegishli tashkilotlarda taklif va eʼtirozlar mavjud boʻlmasa, bu haqda kengashga xabar berilishi lozim.

20. Kengash tomonidan ishlab chiqilgan texnik reglament loyihasi boʻyicha kelib tushgan barcha taqrizlar kotib tomonidan umumlashtiriladi va bu haqda 5 kun mobaynida maʼlumot tayyorlanadi.

21. Kelib tushgan taqrizlar kengash majlisida koʻrib chiqiladi.

22. Taqrizlarni koʻrib chiqish natijalariga koʻra texnik reglamentning yakuniy loyihasi tayyorlanadi.

23. Texnik reglamentlar loyihalari aniq ifodalanishi, qonunchilik hujjatlariga muvofiq kelishi, koʻrib chiqilayotgan masalaning puxta tahlilini va xolis bahosini oʻz ichiga olgan boʻlishi, texnik reglamentdan foydalanuvchilar oldiga aniq maqsad va vazifalarni qoʻyishi, shuningdek, ularning talablarini bajarishning aniq muddatlarini belgilashi lozim.

24. Texnik reglament loyihasiga kengash raisi, uning oʻrinbosari va barcha aʼzolari tomonidan rozilik imzosi qoʻyiladi. Rozilik imzosi qoʻyilgan loyiha belgilangan tartibda ekspertizadan oʻtish uchun tayyor deb hisoblanadi.

25. Texnik reglamentlarning yakuniy loyihasi 3 ish kuni mobaynida belgilangan tartibda ekspertizadan oʻtkazish uchun texnik jihatdan tartibga solish sohasidagi tegishli vakolatli davlat organiga yuboriladi.

26. Texnik reglamentlar loyihalarining ekspertizasi faoliyatlarining yoʻnalishlari boʻyicha texnik jihatdan tartibga solish sohasidagi vakolatli davlat organlari huzurida tuziladigan texnik jihatdan tartibga solish sohasidagi ekspert komissiyalari tomonidan amalga oshiriladi.

27. Texnik jihatdan tartibga solish sohasidagi ekspert komissiyasi tomonidan texnik reglament loyihasi belgilangan talablarga nomuvofiqligi haqida xulosa qabul qilingan taqdirda, ushbu xulosa kelib tushgan kundan boshlab 15 kun mobaynida texnik reglament loyihasi kengash tomonidan qayta koʻrib chiqiladi.

28. Texnik reglamentning oxiriga yetkazib ishlab chiqilgan loyihasi ushbu Nizomning 25 va 26-bandlariga asosan qayta ekspertizadan oʻtkazish uchun topshiriladi.

29. Texnik reglament loyihasi Oʻzbekiston Respublikasi Vazirlar Mahkamasi tomonidan tasdiqlangan texnik reglamentlarni ishlab chiqish dasturida oʻrnatilgan muddatlarda kengash tomonidan ishlab chiqilishi kerak.

30. Mazkur Nizom Oʻzbekiston Respublikasi sogʻliqni saqlash vazirligi, Oʻzbekiston Respublikasi Davlat arxitektura va qurilish qoʻmitasi, Oʻzbekiston Respublikasi Davlat tabiatni muhofaza qilish qoʻmitasi bilan kelishilgan