Qo‘qon shahrida kichik biznes va xususiy tadbirkorlikni yanada keng rivojlantirish hamda shu asosda ichki bozorni tovar va xizmatlar bilan to‘ldirishni ta’minlash, yangi ish o‘rinlari, shu jumladan sanoat korxonalari bilan kooperatsiyalash yo‘li bilan kasanachilikni rivojlantirish hisobiga tashkil etish va aholi daromadlarini oshirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Qo‘qon shahrini sanoat jihatidan rivojlantirish hamda uni obodonlashtirish va infratuzilmasini yaxshilashga doir qo‘shimcha chora-tadbirlar to‘g‘risida” 2009-yil 19-oktabrdagi F-3283-son farmoyishiga muvofiq tuzilgan Ishchi komissiya tomonidan O‘zbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi, Farg‘ona viloyati va Qo‘qon shahar hokimliklari bilan birgalikda ishlab chiqilgan 2010 — 2012-yillarda Qo‘qon shahrida kichik biznes va xususiy tadbirkorlikni rivojlantirish chora-tadbirlari dasturi tasdiqlansin, Dastur quyidagilarni o‘z ichiga oladi:

Qo‘qon shahrida sanoat ishlab chiqarishi, xizmatlar va servis sohasida yangi kichik biznes korxonalari tashkil etish parametrlarini 1-ilovaga* muvofiq;

Qo‘qon shahrida xizmatlar va servis sohasida kichik biznesni, shuningdek bandlik yo‘nalishlari bo‘yicha kasanachilikni rivojlantirish hisobiga ish o‘rinlari tashkil etish va aholi bandligini ta’minlash parametrlarini 2-ilovaga* muvofiq.

2. Quyidagilarga:

O‘zbekiston Respublikasi Prezidentining 2009-yil 19-oktabrdagi F-3283-son farmoyishiga muvofiq tuzilgan Ishchi komissiya (R.S. Azimov)ga vazirliklar, idoralar, xo‘jalik birlashmalari, korxonalar, mahalliy hokimiyat organlarining ushbu qaror bilan tasdiqlangan Chora-tadbirlar dasturida nazarda tutilgan tadbirlarni belgilangan muddatlarga muvofiq amalga oshirish bilan bog‘liq faoliyatini muvofiqlashtirish funksiyalari;

Farg‘ona viloyati hokimi vazifasini bajaruvchi (X.X. Ne’matov)ga, Qo‘qon shahar hokimi (Sh.U. Sobirov)ga ushbu qarorda belgilangan 2010 — 2012-yillarda Qo‘qon shahrida kichik biznes va xususiy tadbirkorlikni rivojlantirish chora-tadbirlari dasturi parametrlarini sifatli va o‘z vaqtida bajarish uchun zarur shart-sharoitlarni yaratish hamda ta’minlash yuzasidan shaxsan javobgarlik yuklansin.

3. Qo‘qon shahar hokimligi shahar korxonalari va tashkilotlari, tijorat banklari bilan birgalikda:

loyihalarning tashabbuskorlari bo‘lgan kichik biznes va xususiy tadbirkorlik subyektlariga zarur ta’sis hujjatlarini tayyorlashda, yer uchastkalari, turar joy bo‘lmagan obyektlar va foydalanilmayotgan ishlab chiqarish maydonlarini ajratishda, shuningdek biznesni tashkil etish va yuritish uchun zarur bo‘lgan ro‘yxatdan o‘tkazish tartibotlarini amalga oshirishda har tomonlama ko‘maklashsin;

ushbu qarorga 2-ilovaga muvofiq ish o‘rinlari tashkil etish bo‘yicha belgilangan parametrlarning bajarilishini ta’minlashga yo‘naltirilgan kasanachilikning turli shakllarini, birinchi navbatda, sanoat korxonalari bilan kooperatsiyalash asosida kengaytirish bo‘yicha aniq tadbirlar kompleksini bir oy muddatda ishlab chiqsin va tasdiqlasin;

Chora-tadbirlar dasturining belgilangan parametrlari bajarilishi yuzasidan monitoring tashkil etsin, uning natijalarini har oyda ko‘rib chiqsin hamda muammoli masalalarni hal etish bo‘yicha zarur tezkor va amaliy chora-tadbirlar ko‘rsin;

2010 — 2012-yillarda Qo‘qon shahrida kichik biznes va xususiy tadbirkorlikni rivojlantirish chora-tadbirlari dasturining bajarilishi to‘g‘risida har chorakda O‘zbekiston Respublikasi Vazirlar Mahkamasiga axborot taqdim etsin.

4. Tijorat banklariga Qo‘qon shahridagi kichik biznes va xususiy tadbirkorlik subyektlariga, eng avvalo, boshlang‘ich (dastlabki) kapitalni shakllantirish, ularning faoliyatini rivojlantirish va kengaytirish, zamonaviy asbob-uskunalar va mini-texnologiyalar sotib olish, aylanma mablag‘larni to‘ldirish uchun qonun hujjatlarida belgilangan tartibda kreditlar ajratilishini ta’minlash tavsiya etilsin.

5. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.