Yangi ishlab chiqarishlar tashkil etish, ishlab turgan sanoat korxonalarini modernizatsiyalash va texnologik jihatdan qayta jihozlash, ishlab chiqarilayotgan raqobatbardosh mahsulotlarni mahalliylashtirishni chuqurlashtirish hisobiga Qo‘qon shahrining sanoat salohiyatini yanada rivojlantirish, shuningdek shu asosda aholining bandligini va daromadlarini oshirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Qo‘qon shahrini sanoat jihatidan rivojlantirish hamda uni obodonlashtirish va infratuzilmasini yaxshilashga doir qo‘shimcha chora-tadbirlar to‘g‘risida” 2009-yil 19-oktabrdagi F-3283-son farmoyishiga muvofiq tashkil etilgan Ishchi komissiya tomonidan O‘zbekiston Respublikasi Iqtisodiyot vazirligi va Moliya vazirligi, Farg‘ona viloyati va Qo‘qon shahri hokimliklari, boshqa manfaatdor vazirliklar, idoralar, xo‘jalik birlashmalari, tijorat banklari ishtirokida ishlab chiqilgan 2010 — 2012-yillarda Qo‘qon shahrining sanoat salohiyatini rivojlantirish, ishlab chiqarishni modernizatsiyalash va mahalliylashtirish loyihalarini amalga oshirish chora-tadbirlari dasturi ma’qullansin. Dastur quyidagilarni o‘z ichiga oladi:

2010 — 2012-yillarda Qo‘qon shahri korxonalarini modernizatsiyalash va texnologik jihatdan qayta jihozlash, sanoat mahsulotlarini mahalliylashtirishni chuqurlashtirishning aniq dasturini 1-ilovaga* muvofiq;

Qo‘qon shahri sanoat korxonalarini moliyaviy sog‘lomlashtirish dasturini 2-ilovaga* muvofiq;

Qo‘qon shahrining istiqbolsiz sanoat korxonalarini yangi mulkdorlarga jadal sotish tadbirlarini 3-ilovaga* muvofiq.

2. Ishchi komissiya (R.S. Azimov)ga belgilangan muddatlarga muvofiq ushbu qaror bilan tasdiqlangan Chora-tadbirlar dasturida nazarda tutilgan tadbirlar samarali amalga oshirilishi bilan bog‘liq masalalar bo‘yicha davlat va xo‘jalik boshqaruvi organlari, tijorat banklari, mahalliy davlat hokimiyati organlari faoliyatini muvofiqlashtirish funksiyasi yuklansin.

3. Dasturda nazarda tutilgan chora-tadbirlar amalga oshirilishi uchun mas’ul bo‘lgan Farg‘ona viloyati va Qo‘qon shahri hokimliklari, vazirliklar, idoralar va xo‘jalik birlashmalari, tijorat banklari:

o‘n kun muddatda Chora-tadbirlar dasturiga kiritilgan investitsiya loyihalarining loyiha hujjatlarini ishlab chiqish va investitsiya loyihalarini amalga oshirish tarmoq jadvallarini belgilangan tartibda tasdiqlasinlar;

tasdiqlangan Chora-tadbirlar dasturida nazarda tutilgan parametrlarga va muddatlarga muvofiq korxonalarni moliyaviy sog‘lomlashtirish va bankrot korxonalarni yangi mulkdorlarga jadal sotish chora-tadbirlari so‘zsiz bajarilishini ta’minlasinlar;

har oyda Chora-tadbirlar dasturiga kiritilgan tadbirlar bajarilishi monitoringini olib borsinlar, tadbirlarni so‘zsiz hal etish yuzasidan zarur tezkor va amaliy chora-tadbirlar ko‘rsinlar;

har chorakda Ishchi komissiyaga Chora-tadbirlar dasturiga kiritilgan tadbirlar bajarilishi to‘g‘risida axborot bersinlar.

4. O‘zbekiston Respublikasi Iqtisodiyot vazirligi, Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi amalga oshirilishini ta’minlash bo‘yicha maxsus idoralararo komissiya ushbu qarorga 1-ilovada ko‘rsatilgan loyihalarni belgilangan tartibda tegishli yilning Investitsiya dasturiga va Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga kiritsinlar.

5. O‘zbekiston Respublikasi Davlat soliq qo‘mitasi, Monopoliyadan chiqarish, raqobat va tadbirkorlikni qo‘llab-quvvatlash davlat qo‘mitasi bir hafta muddatda 3-ilovaga kiritilgan iqtisodiy nochor korxonalarga nisbatan belgilangan tartibda bankrotlik tartibotini qo‘llash tashabbusi bilan chiqsinlar.

Oliy xo‘jalik sudiga qarzdor korxonalarni bankrot deb e’tirof etish to‘g‘risidagi da’vo arizalarini ko‘rib chiqishni hamda 3-ilovada ko‘rsatilgan ishlamayotgan, iqtisodiy nochor va eskirgan asbob-uskunalardan foydalanayotgan sanoat korxonalari bo‘yicha tugatish ishini boshlashni jadallashtirish tavsiya qilinsin.

6. Belgilab qo‘yilsinki, istisno tariqasida:

3-ilovaga kiritilgan sanoat korxonalari bankrot deb e’lon qilingandan keyin ularni mulkiy komplekslar shaklida tijorat banklari va investorlarga sotish, ishlab chiqarish tiklangandan hamda korxonalar yangi mulkdorlarga sotilgandan keyin, keyinchalik qarzlarni kreditorlarga qaytargan holda, savdo o‘tkazilmasdan investitsiya majburiyati ostida bepul berish shartlarida amalga oshiriladi;

inventarizatsiya, mol-mulk qiymatini baholash hamda bankrot korxonalarning mol-mulkini sotib oluvchi tijorat banklari va investorlar bilan shartnomalar tuzish tugatish ishi boshlangan paytdan boshlab uch hafta mobaynida amalga oshiriladi.

7. Ishchi komissiya (R.S. Azimov)ga ushbu qaror bilan tasdiqlangan 2010 — 2012-yillarda Qo‘qon shahrining sanoat salohiyatini rivojlantirish, ishlab chiqarishni modernizatsiyalash va mahalliylashtirish loyihalarini amalga oshirish chora-tadbirlari dasturiga, zaruriyat bo‘lganda, O‘zbekiston Respublikasi Iqtisodiyot vazirligi hamda boshqa manfaatdor vazirliklar va idoralarning xulosalari hisobga olingan holda tuzatish kiritish huquqi berilsin.

8. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.