Oʻzbekiston Respublikasi Vazirlar Mahkamasining 2017-yil 31-avgustdagi 683-son “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida” va 2007-yil 27-iyundagi 131-sonli “Avtomototransport vositalari uchun roʻyxatdan oʻtkazish davlat raqami belgilarining yangi namunalarini joriy etish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2007-y., 25-26-son, 264-modda) qarorlariga muvofiq buyuraman:

1. Avtomototransport vositalarini qayta roʻyxatdan oʻtkazishni (qayd etishni) tashkil etish va amalga oshirish tartibi toʻgʻrisidagi yoʻriqnoma ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Ushbu Yoʻriqnoma Oʻzbekiston Respublikasi Vazirlar Mahkamasining 2017-yil 31-avgustdagi 683-son “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida” hamda 2007-yil 27-iyundagi 131-sonli “Avtomototransport vositalari uchun roʻyxatdan oʻtkazish davlat raqami belgilarining yangi namunalarini joriy etish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2007-y., 25-26-son, 264-modda) qarorlariga muvofiq avtomototransport vositalarini (tirkamalarini, yarim tirkamalarini) (bundan keyingi oʻrinlarda transport vositasi deb yuritiladi) qayta roʻyxatdan oʻtkazish (qayd etish), shuningdek, ularning yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta taʼmirlash va almashtirish tartibini belgilaydi.

1. Mazkur Yoʻriqnomada quyidagi asosiy tushunchalar qoʻllaniladi:

transport vositasining egasi (vakili) — transport vositasining mulkdori yoki qonun hujjatlarida belgilangan asoslar va doirada transport vositasiga egalik qiluvchi yoki undan foydalanuvchi yoxud uni tasarruf etuvchi jismoniy yoki yuridik shaxs;

yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari — mexanik ravishda deformatsiyalanganligi, kimyoviy reagentlar taʼsiri ostida boʻlganligi yoki yuqori haroratda (termik) ishlov berilganligi oqibatida tashqi koʻrinishini aniqlay olmaslik darajasida oʻzgargan roʻyxatdan oʻtkazish davlat raqami belgilari.

qayta roʻyxatdan oʻtkazish (qayd etish) — tegishli yuridik asoslar mavjud boʻlganida transport vositalarini hisobga olishga doir maʼlumotlar va hujjatlarga oʻzgartirishlar hamda qoʻshimchalar kiritish.

2. Mazkur Yoʻriqnoma talablari Oʻzbekiston Respublikasi Vazirlar Mahkamasining 2007-yil 27-iyundagi 131-sonli qarori bilan joriy etilgan roʻyxatdan oʻtkazish davlat raqami belgilarining yangi namunalariga tatbiq etiladi.

Mazkur Yoʻriqnoma Oʻzbekiston Respublikasi Mudofaa vazirligi, Milliy xavfsizlik xizmati va Ichki ishlar vazirligining ichki qoʻshinlariga tegishli harbiy transport vositalari, yuridik va jismoniy shaxslarga tegishli traktorlar, traktor tirkamalari va oʻziyurar mexanizmlar, umumfoydalanish yoʻllarida ishlatilmaydigan avtomobillar, shuningdek, tramvay, trolleybuslarning roʻyxatdan oʻtkazish davlat raqami belgilariga nisbatan qoʻllanilmaydi.

3. Avtomototransport vositalarini qayta roʻyxatdan oʻtkazish quyidagi hollarda amalga oshiriladi:

mulkdor-jismoniy shaxsning familiyasi, ismi, otasining ismi oʻzgarganda, shuningdek mulkdor-yuridik shaxs qayta tashkil etilganda yoki nomlanishi oʻzgarganda;

avtomototransport vositalarini roʻyxatdan oʻtkazish joyini oʻzgartirishni talab qilmagan holda avtomototransport vositasi egasining yashash (turar) joyi yoki joylashgan joyi (pochta manzili) oʻzgarganda;

yuridik shaxslarga tegishli yuk avtomototransport vositalarining, avtobus va mikroavtobuslarning saqlab turiladigan joyi oʻzgarganda;

avtomototransport vositalarining rangi va (yoki) raqamli agregati oʻzgarganda;

avtomototransport vositasi qayta jihozlanganda;

avtomototransport vositasini roʻyxatdan oʻtkazish guvohnomasi yoki roʻyxatdan oʻtkazish davlat raqam belgisi yaroqsiz holga kelganda, shikastlanganda yoki yoʻqolganda.

4. Transport vositalarini qayta roʻyxatdan oʻtkazish (qayd etish) Qoraqalpogʻiston Respublikasi Ichki ishlar vazirligi, Toshkent shahar ichki ishlar bosh boshqarmasi va viloyatlar ichki ishlar boshqarmalari Davlat yoʻl harakati xavfsizligi xizmatlarining roʻyxatlash va imtihon olish boʻlimlari yoki tumanlararo roʻyxatlash va imtihon olish boʻlinmalari (bundan keyingi oʻrinlarda RIB (TRIB) deb yuritiladi) tomonidan amalga oshiriladi.

5. Mazkur Yoʻriqnomaning 3-bandida koʻrsatilgan holatlar mavjud boʻlganda, transport vositasining texnik holatidan qatʼi nazar, yuridik va jismoniy shaxslar oʻn kun mobaynida RIB (TRIB)larga murojaat etishlari shart.

6. Transport vositalarining yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta tiklash, shuningdek, ularni boshqasiga almashtirish RIB (TRIB)lar tomonidan amalga oshiriladi.

7. Yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari taʼmirlanmaydi.

Yoʻqotilgan (oʻgʻirlangan), foydalanish jarayonida standart talablariga rioya etilmasdan buzilgan yoki qasddan buzilgan roʻyxatdan oʻtkazish davlat raqami belgilari qayta tiklanmaydi. Ularning oʻrniga yangi roʻyxatdan oʻtkazish davlat raqami belgilari beriladi.

8. Roʻyxatdan oʻtkazish davlat raqami belgilarini qayta tiklash, shuningdek, ularni boshqasiga almashtirish uchun transport vositalarining egalari yozma ravishda RIB (TRIB)larga murojaat qiladilar.

9. RIB (TRIB) tomonidan jismoniy va yuridik shaxslarning yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta tiklash boʻyicha murojaatlari umumlashtiriladi hamda bir oyda bir marta Ichki ishlar vazirligi Yoʻl harakati xavfsizligi bosh boshqarmasiga (bundan keyingi oʻrinlarda IIV YHXBB deb yuritiladi) buyurtma rasmiylashtiriladi.

10. Buyurtmaga quyidagilar ilova qilinadi:

qabul qilish-topshirish dalolatnomasi;

yaroqsiz xolga kelib qolgan, shikastlangan yoki buzilgan roʻyxatdan oʻtkazish davlat raqami belgilari;

tegishli toʻlovni tasdiqlovchi hujjat;

transport vositasining roʻyxatga olinganligi toʻgʻrisidagi qayd etish guvohnomasining nusxasi.

11. Buyurtmalar asosida yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari IIV YHXBB qoshidagi “Uzavtomotobelgi” Davlat unitar korxonasida (bundan keyingi oʻrinlarda Davlat unitar korxona deb yuritiladi) qayta ishlab chiqariladi. Buyurtmalar Davlat unitar korxonaga kelib tushgandan keyin RIB (TRIB)larning vakili ishtirokida mazkur Yoʻriqnomaning 10-bandida koʻrsatilgan roʻyxatdan oʻtkazish davlat raqami belgilari hamda hujjatlar tekshiriladi. Taqdim etilgan roʻyxatdan oʻtkazish davlat raqami belgilari namunasining haqiqiy holati koʻrib chiqiladi. Yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari yoʻq qilinadi va bu haqda tegishli dalolatnoma tuziladi.

12. Davlat unitar korxonasi tomonidan roʻyxatdan oʻtkazish davlat raqami belgilarini qayta tiklash oʻttiz kun mobaynida amalga oshiriladi.

13. Roʻyxatdan oʻtkazish davlat raqami belgilari qayta tiklangandan soʻng, ular RIB (TRIB)larga taqdim etiladi va bu haqda foydalanishda boʻlib shikastlangan va yaroqsiz holga kelib qolgan roʻyxatga olish davlat raqami belgilarini qayd etish kitobiga yozib qoʻyiladi.

14. Avtomototransport vositalarining har bir qayta tiklangan roʻyxatdan oʻtkazish davlat raqami belgilari haqidagi maʼlumot IIV YHXBB va Axborot markazi elektron hisob bazasiga kiritiladi.

15. Transport vositalari roʻyxatga olingan kundan boshlab oʻttiz kun ichida ishlab chiqarish kamchiligi oqibatida roʻyxatdan oʻtkazish davlat raqami belgilari yaroqsiz holga kelsa, bunday roʻyxatdan oʻtkazish davlat raqami belgilarini qayta tiklash toʻlovlarsiz amalga oshiriladi.

Boshqa holatlarda toʻlov asosida amalga oshiriladi.

16. Roʻyxatdan oʻtkazish davlat raqami belgilarini qayta tiklash davrida transport vositalariga ilgari foydalanishda boʻlgan yaroqli roʻyxatdan oʻtkazish davlat raqami belgilari vaqtincha foydalanishga beriladi. Bu haqda Vaqtincha hisobga olishni qayd etish kitobiga belgi kiritiladi. Transport vositasini qayd etish guvohnomasiga vaqtincha foydalanishga berilayotgan roʻyxatdan oʻtkazish davlat raqami belgilarining raqamlari, seriyasi hamda uning amal qilish muddati toʻgʻrisida tegishli yozuv kiritiladi hamda RIB (TRIB) muhri bilan tasdiqlanadi. Roʻyxatdan oʻtkazish davlat raqami belgilari vaqtincha foydalanishga berilganda toʻlov undirilmaydi.

17. Qayta tiklangan roʻyxatdan oʻtkazish davlat raqami belgilarini qabul qilib olish vaqtida transport vositalari egalari vaqtincha foydalanishga berilgan roʻyxatdan oʻtkazish davlat raqami belgilarini qaytaradilar. Ular RIB (TRIB)lar tomonidan belgilangan tartibda yoʻq qilinadi.

17¹. Roʻyxatdan oʻtkazish davlat raqami belgisini qisqa muddatda qayta tiklash zaruriyati paydo boʻlganda jismoniy va yuridik shaxslar IIV YHXBBga ariza bilan murojaat etishlari mumkin.

Arizaga quyidagilar ilova qilinadi:

avtomototransport vositasi egasi yoki uning vakilining shaxsini tasdiqlovchi hujjat;

tegishli toʻlovni tasdiqlovchi hujjat;

transport vositasining roʻyxatga olinganligi toʻgʻrisidagi qayd etish guvohnomasining nusxasi.

17². IIV YHXBB tomonidan uch ish kuni ichida ariza va unga ilova qilingan hujjatlar oʻrganilib, transport vositasi koʻrikdan oʻtkaziladi. Hujjatlarda kamchiliklar aniqlanmagan taqdirda Toshkent shahar Ichki ishlar bosh boshqarmasi Yoʻl harakati xavfsizligi boshqarmasiga hamda Davlat unitar korxonasiga tegishli topshiriq yuboriladi.

Toshkent shahar Ichki ishlar bosh boshqarmasi Yoʻl harakati xavfsizligi boshqarmasi shu kunning oʻzida yaroqsiz yoki shikastlangan roʻyxatdan oʻtkazish davlat raqami belgilarini qabul qiladi hamda qayta tiklash davrida ilgari foydalanishda boʻlgan roʻyxatdan oʻtkazish davlat raqami belgilarini vaqtincha foydalanishga beradi.

Qayta tiklangan roʻyxatdan oʻtkazish davlat raqami belgilari besh ish kuni ichida Toshkent shahar Ichki ishlar bosh boshqarmasi Yoʻl harakati xavfsizligi boshqarmasi tomonidan beriladi.

18. Ushbu Yoʻriqnoma talablarini buzganlikda aybdor boʻlgan shaxslar qonun hujjatlarida belgilangan tartibda javobgar boʻladilar.