Texnik shisha tola ishlab chiqarishini tashkil etish va “Xobas-TAPO” qoʻshma korxonasida tashkil etilgan nometall sentrifugalangan quvurlar ishlab chiqarishini xom ashyo bilan taʼminlash maqsadida Vazirlar Mahkamasi qaror qiladi:

1. Quyidagilar:

“Oʻzeltexsanoat” uyushmasining “Oniks” aksiyadorlik jamiyati tomonidan “Prayss-Daymler” (Germaniya) va “Roviteks” (Shveysariya) kompaniyalari bilan birgalikda ustav fondi 5,98 mln Germaniya markasiga teng boʻlgan hamda ulushlar 1-ilovaga* muvofiq Oʻzbekiston tomoni va xorijiy tomonlar oʻrtasida teng taqsimlangan texnik tola ishlab chiqarish boʻyicha “Oʻzglaszayden” qoʻshma korxonasi tashkil etilganligi;

“Oʻzglaszayden” qoʻshma korxonasi tomonidan quvvati yiliga 9,4 ming tonna texnik shisha tolasi ishlab chiqarish boʻyicha umumiy qiymati 60,3 mln. Germaniya markasidan iborat asbob-uskunalar turkumini yetkazib berish va montaj qilish yuzasidan Germaniyaning “Proyektirung und Adlagenbau GmbX Bautsen” kompaniyasi bilan kontrakt tuzilganligi maʼlumot uchun qabul qilinsin.

2. Belgilansinki, koʻrsatib oʻtilgan kontraktni mablagʻ bilan taʼminlash quyidagi tartibda:

kontrakt qiymatining 05 foizi (“Germes” jamiyatining sugʻurta mukofotini hisobga olgan holda 50,1 mln. Germaniya markasi) — xorijiy bankining Germaniyaning “Germes” jamiyati sugʻurta qoplamasi ostidagi mablagʻlarini qayta moliyalash yoʻli bilan “Oʻzsanoatqurilishbank” krediti hisobiga;

kontrakt qiymatining 15, foizi (10,2 mln. Germaniya markasi) — “Proyektirung und Anlagenbau GmbX Bautsen” kompaniyasiga 8,2 mln Germaniya markasi qiymatiga ega boʻlgan “nou-xau”ni va qoʻshma korxonaga investitsiya majburiyatlari sifatida beriladigan 2,0 mln Germaniya markasi miqdoridagi pul mablagʻlarini berish yoʻli bilan “Oʻzglaszayden” qoʻshma korxonasining xorijiy muassislari hisobiga;

jalb etiladigan xorijiy kreditlarni tashkil etish boʻyicha xorijni bankka barcha xarajatlarni toʻlash, shuningdek qurilish davrida foizlarni toʻlash — xorijiy muassislarning “Oʻzglaszayden” qoʻshma korxonasiga investitsiya majburiyatlari sifatida beriladigan mablagʻlari hisobiga;

xorijiy kreditni, u boʻyicha foizlarni hamda ishlab chiqarish davridagi boshqa chiqimlarni qaytarish — 2-ilovaga* muvofiq qaytarish jadvaliga koʻra “Oʻzglaszayden” qoʻshma korxonasining oʻz mablagʻlari hisobiga amalga oshiriladi.

3. Qayd etilsinki, “Oʻzglaszayden” qoʻshma korxonasining xorijiy muassislari oʻz zimmalariga “Xobas-TAPO” qoʻshma korxonasi tomonidan talab etib olinmagan texnik shisha tola hajmlarini eksport qilish majburiyatini oldilar.

5. “Oʻzglaszayden” qoʻshma korxonasi kreditlarni qaytarish davrida texnik shisha tola ishlab chiqarish uchun import xom ashyo, materiallar, ehtiyot qismlar va tez eskiradigan qismlar uchun bojxona toʻlovlari toʻlashdan (bojxonada rasmiylashtirilganligi uchun yigʻimlar bundan mustasno) ozod qilinsin.

6. “Oʻzsanoatqurilishbank” bir oy muddatda xorijiy bank va “Oʻzglaszayden” qoʻshma korxonasi bilan kredit bitimlari tuzsin.

7. Oʻzbekiston Respublikasi Moliya vaziri “Oʻzsanoatqurilishbank” majburiyatlari boʻyicha xorijiy bankka, shuningdek “Oʻzglaszayden” qoʻshma korxonasining majburiyatlari boʻyicha “Oʻzsanoatqurilishbank”ka Oʻzbekiston Respublikasi Hukumati kafolatlarini belgilangan tartibda berishga vakil qilinsin.

8. Oʻzbekiston Respublikasi Adliya vazirligi kredit bitimlarida belgilangan shakl boʻyicha Oʻzbekiston Respublikasi Hukumati kafolatlari boʻyicha belgilangan tartibda yuridik xulosani rasmiylashtirsin.

9. Oʻzbekiston Respublikasi Tashqi ishlar vazirligi “Oʻzeltexsanoat” uyushmasining va “Oʻzglaszayden” qoʻshma korxonasining buyurtmanomalari boʻyicha loyihani amalga oshirishda qatnashuvchi xorijiy mutaxassislar uchun koʻp martalik kirish vizalari konsullik yigʻimlari undirmasdan rasmiylashtirish masalalarini oʻz vaqtida koʻrib chiqsin.

10. Oʻzbekiston Respublikasi Ichki ishlar vazirligi “Oʻzeltexsanoat” uyushmasining va “Oʻzglaszayden” qoʻshma korxonasining buyurtmanomalari boʻyicha loyihani amalga oshirishda qatnashuvchi xorijiy mutaxassislarni yashash joyida davlat boji undirmasdan vaqtincha roʻyxatdan oʻtkazsin va vaqtincha roʻyxatdan oʻtkazish muddatini uzaytirsin.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.