Qashqadaryo va Surxondaryo viloyatlarining Toshguzar-Boysun-Qumqo‘rg‘on yangi temir yo‘li bo‘ylab joylashgan hududlarida mineral xomashyo bazasini yanada kengaytirish va samarali o‘zlashtirish, zamonaviy qurilish materiallari ishlab chiqarishni kengaytirish, shuningdek qo‘shimcha ish o‘rinlari yaratish maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot vazirligi “O‘zqurilishmateriallari aksiyadorlik kompaniyasi, Davlat geologiya qo‘mitasi, Qashqadaryo va Surxondaryo viloyatlari hokimliklarining:

2008—2012-yillarda Qashqadaryo va Surxondaryo viloyatlarida qurilish materiallari ishlab chiqarish quvvatlarini oshirishning maqsadli parametrlari to‘g‘risida 1-ilovaga* muvofiq;

2008—2012-yillarda amalga oshirish, uchun investorlarga tavsiya etilayotgan Qashqadaryo va Surxondaryo viloyatlarida qurilish materiallari ishlab chiqarish bo‘yicha istiqbolli investitsiya loyihalari to‘g‘risida 2-ilovaga* muvofiq;

qurilish materiallari ishlab chiqarish uchun 2008—2012-yillarda sanoat asosida o‘zlashtirish tavsiya etilayotgan Qashqadaryo va Surxondaryo viloyatlarida qidirib topilgan, biroq foydalanilmayotgan xomashyo konlarini ishga tushirish to‘g‘risida 3-ilovaga* muvofiq takliflariga rozilik berilsin.

2. Tashqi iqtisodiy faoliyat milliy banki, “Paxta-bank” aksiyadorlik-tijorat banki, “Mikrokreditbank” aksiyadorlik-tijorat banki, “Ipoteka-bank” aksiyadorlik-tijorat ipoteka banki, “Hamkorbank” aksiyadorlik-tijorat banki, “Asaka” davlat aksiyadorlik-tijorat banki va O‘zbekiston Respublikasi aksiyadorlik-tijorat sanoat-qurilish banki tomonidan ushbu qarorga 2-ilovaga* kiritilgan investitsiya loyihalarini amalga oshirish uchun jami 500 mln so‘mdan ortiq maqsadli kreditlar ajratish nazarda tutilganligi ma’lumot uchun qabul qilinsin.

3. Iqtisodiyot vazirligi va “O‘zqurilishmateriallari” aksiyadorlik kompaniyasi manfaatdor vazirliklar va idoralar, Qashqadaryo va Surxondaryo viloyatlari hokimliklari bilan birgalikda yangi ishlab chiqarishlar quvvatlarining, muhandislik va ijtimoiy infratuzilmaning, shuningdek ishlab chiqariladigan mahsulotlarning har bir turi bo‘yicha eksport hajmlarining asoslangan hisob-kitoblari bilan birga loyiha hujjatlarini tayyorlash, kelishish va tasdiqlashga oid takliflarni bir oy muddatda tayyorlasinlar va Vazirlar Mahkamasiga kiritsinlar.

4. Qashqadaryo va Surxondaryo viloyatlari hokimliklari investorlarni jalb etish uchun qulay shart-sharoitlar yaratish, konlarni o‘zlashtirishda, tasdiqlangan loyiha yechimlariga muvofiq obyektlar qurilishi uchun yer uchastkalari ajratish masalalarini hal etishda, shuningdek ularni amalga oshirish davomida tizimli asosda yordam ko‘rsatish va ko‘maklashish bo‘yicha bir oy muddatda chora-tadbirlar ko‘rsinlar.

5. O‘zbekiston Respublikasi Tashqi iqtisodiy aloqalar, investitsiyalar va savdo vazirligi “O‘zqurilishmateriallari” aksiyadorlik kompaniyasiga hamda Qashqadaryo va Surxondaryo viloyatlari hokimliklariga qurilish materiallari sanoati sohasida investitsiya loyihalarini amalga oshirish tajribasiga ega bo‘lgan xorijiy investorlarni qidirib topish va jalb etishda ko‘maklashsin.

6. O‘zbekiston Respublikasi Davlat geologiya qo‘mitasi Surxondaryo viloyatida sement ishlab chiqarish ehtiyojlari uchun foydalanish maqsadida Oqtoshdagi istiqbolli maydonlarda joylashgan gipsli tosh konlarida izlash-qidirish ishlarini olib borish va 2011-yilgacha tugallash chora- tadbirlarini ko‘rsinlar.

7. O‘zbekiston Respublikasi “Davarxitektqurilish” qo‘mitasi investitsiya loyihalarini davlat ekspertizasidan o‘tkazishda yangi ishlab chiqarishlarning yuqori texnologiyaligi va samaradorligi, mineral xomashyo va yoqilg‘i-energetika resurslari tejalgan holda ishlab chiqariladigan mahsulotlarning raqobatbardoshligi va tannarxi masalalariga alohida e’tibor qaratsin.

8. Belgilab qo‘yilsinki:

Iqtisodiyot vazirligi, “O‘zqurilishmateriallari” aksiyadorlik kompaniyasi hamda Qashqadaryo va Surxondaryo viloyatlari hokimliklarining birgalikdagi taqdimiga ko‘ra, tegishli ravishda asoslangan taqdirda, O‘zbekiston Respublikasi Vazirlar Mahkamasi huzuridagi Xalqaro moliya institutlari, tashkilotlari va donor mamlakatlar bilan hamkorlik qilish, yirik va strategik jihatdan muhim investitsiya loyihalarini amalga oshirish masalalari bo‘yicha Idoralararo kengash tomonidan investitsiya loyihalari ro‘yxatiga tasdiqlangan maqsadli parametrlar saqlab qolingan holda, o‘zgartirish va qo‘shimchalar kiritiladi;

“O‘zqurilishmateriallari” aksiyadorlik kompaniyasi raisi hamda Qashqadaryo va Surxondaryo viloyatlari hokimlari loyiha amalga oshirilayotgan viloyatlarda qurilish materiallari sanoatini rivojlantirishning maqsadli parametrlari o‘z vaqtida ta’minlanishi uchun shaxsan javob beradilar.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari N.M. Xanov zimmasiga yuklansin.