O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi qaroriga muvofiq (O‘zbekiston Respublikasi qonun hujjatlari to‘plami, 2009-y., 5-son, 38-modda.) O‘zbekiston Respublikasi Davlat soliq qo‘mitasi, Moliya vazirligi, Davlat bojxona qo‘mitasi va Davlat arxitektura va qurilish qo‘mitasi qaror qiladilar:

1. Yangidan tashkil etilayotgan ixtisoslashtirilgan ta’mirlash-qurilish tashkilotlari tomonidan soliq va bojxona imtiyozlarini qo‘llash tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Ushbu Nizom O‘zbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida” 2009-yil 29-yanvardagi PQ-1051-son qaroriga (O‘zbekiston Respublikasi qonun hujjatlari to‘plami, 2009-yil, 5-son, 38-modda) muvofiq yangi tashkil etilayotgan ixtisoslashtirilgan ta’mirlash-qurilish tashkilotlari tomonidan soliq va bojxona imtiyozlarini qo‘llash tartibini belgilaydi.

1. O‘zbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida” 2009-yil 29-yanvardagi PQ-1051-son qaroriga asosan yangidan tashkil etilayotgan ta’mirlash-qurilish tashkilotlari 2017-yil 1-yanvargacha:

soliqlarning barcha turlarini va davlat maqsadli jamg‘armalariga majburiy ajratmalarni to‘lashdan ozod qilinadi, budjetdan tashqari Pensiya jamg‘armasi bundan mustasno;

Vazirlar Mahkamasi tomonidan tasdiqlanadigan ro‘yxatlar bo‘yicha O‘zbekiston Respublikasi hududiga olib kiriladigan qurilish texnikasi va kichik mexanizatsiyalash vositalari uchun bojxona to‘lovlari to‘lashdan (bojxona rasmiylashtiruvi yig‘imlari bundan mustasno) ozod qilinadi.

2. Ixtisoslashtirilgan ta’mirlash-qurilish tashkiloti faqat foydalanishga tayyor holda topshirish shartlarida uy-joy fondi obyektlarini rejalashtirish, qayta rejalashtirish, bezash, qurish, qayta qurish va ta’mirlash ishlarini amalga oshiradigan tashkilotdir.

Bunda:

a) binoni rejalashtirish deganda tekislikdagi gorizontal kesim ko‘rinishida binoning rejalashtirilgan hajmiy tuzilmasining ma’lum masshtabdagi tasviri (chizmalari) tushuniladi;

b) binoni qayta rejalashtirish deganda binoning va/yoki uning alohida xonalari funksional vazifalarining o‘zgarishiga olib keladigan ishlar majmuasi tushuniladi. Bunday ishlarga, jumladan, quyidagilar kiradi:

ko‘tarib turmaydigan pardevorlarni butunlay yoki qisman almashtirish;

ko‘tarib turmaydigan pardevorlarda teshiklar teshish;

muhandislik yoki santexnika asbob-uskunalarini almashtirish;

v) dizayn deganda qulaylik, tejamkorlik va go‘zallikning mushtarakligi prinsipiga asoslangan holda binoning old tomoni va ichki xonalarini me’moriy bezash, interyer elementlarini badiiy konstruksiyalash tushuniladi;

g) rekonstruksiya deganda bino (xona) va inshootlarning asosiy texnik-iqtisodiy ko‘rsatkichlarini va funksional vazifalarini (xonalar soni va maydonini, binolarning qurilish hajmi va umumiy maydonini) o‘zgartirish bilan bog‘liq ishlar majmui tushuniladi;

d) ta’mirlash deganda quyidagilar tushuniladi:

kapital ta’mirlash — bino yoki uning alohida elementlarining foydalanish ko‘rsatkichlarini yaxshilash bilan bog‘liq, bino (bino elementi) mustahkamligini va qulayligini ta’minlashga yo‘naltirilgan tiklash bo‘yicha ishlar majmui, shuningdek, daha ichida eskirgan uy-joy muhandislik tarmoqlarini almashtirish va turar joylarga qayta qurish, shu jumladan turar joy fondining uylari oldidagi hududda landshaft loyiha yechimlaridan foydalangan holda obodonlashtirish ishlarini amalga oshirish;

joriy ta’mirlash — binoning yoki uning alohida elementlarining foydalanish ko‘rsatkichlarini saqlab turish bo‘yicha ishlar majmui;

e) qurilish inshootlarini tayyor holda topshirish deganda buyurtmachining topshirig‘iga binoan obyektda barcha ishlar majmuini bajarish, shu bilan birga loyihalashtirish hujjatlarini ishlab chiqish, qurilish-montaj, maxsus va ishga tushirish-sozlash ishlarini bajarish, obyektni texnologik va muhandislik asbob-uskunalari bilan jihozlash, foydalanishga tayyor qurilish mahsulotini yaratish tushuniladi.

3. Mazkur Nizomning 1-bandida ko‘rsatilgan imtiyozlar ixtisoslashtirilgan qurilish-ta’mirlash korxonalari tomonidan faqat o‘z kuchlari bilan bajarilgan ishlarga qo‘llaniladi.

4. Ixtisoslashtirilgan ta’mirlash-qurilish tashkiloti agar O‘zbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlari to‘g‘risida” 2009-yil 29-yanvardagi PQ-1051-son qarori chiqqandan keyin yuridik shaxs sifatida ro‘yxatga olingan bo‘lsa, u yangidan tashkil etilgan hisoblanadi.

Faoliyat ko‘rsatib kelayotgan korxonalarni qayta tashkil etish yo‘li bilan ular huzurida yoki ularning mol-mulklari huzurida tashkil etilgan tashkilotlar yangidan tashkil etilgan ta’mirlash-qurilish tashkilotlari sifatida qaralmaydi.

5. Yuridik shaxslarga soliqlar, bojxona va majburiy to‘lovlarni budjetga to‘lash bo‘yicha berilgan imtiyozlarni rasmiylashtirish va buxgalterlik hisobida aks ettirish tartibi to‘g‘risidagi nizomga (ro‘yxat raqami 1463-son, 2005-yil 2-aprel) (O‘zbekiston Respublikasi qonun hujjatlari to‘plami, 2005-y., 14-son, 105-modda) muvofiq bo‘shayotgan mablag‘larni maqsadli ishlatish nazarda tutilmagan soliqlar va bojxona imtiyozlari berilganda budjetga to‘lanadigan soliqlar, bojxona va majburiy to‘lovlar hisoblab chiqarilmaydi va mahsulotlar (tovarlar, ishlar, xizmatlar) hamda boshqa mol-mulkning sotish (xarid) qiymatiga kiritilmaydi.

Bo‘shayotgan mablag‘larni maqsadli ishlatishni nazarda tutmaydigan soliqlar va bojxona imtiyozlarini buxgalteriya hisobida aks ettirish tartibi yuqorida qayd qilingan Nizom bilan tartibga solinadi.

6. Yangidan tashkil etilayotgan ixtisoslashtirilgan ta’mirlash-qurilish tashkilotlariga soliq va bojxona to‘lovlari bo‘yicha imtiyozlar va preferensiyalar ushbu Nizomning 1-ilovasida keltirilgan shaklga muvofiq davlat soliq xizmati va davlat bojxona xizmati organlariga taqdim etiladigan arizaga asosan taqdim etiladi. Ariza davlat soliq xizmati organlariga yoki davlat bojxona xizmati organlariga ikki nusxada taqdim etiladi, shulardan bittasi vakolatli organning tegishli belgisi bilan soliq to‘lovchiga qaytariladi. Bunda, yangidan tashkil etilayotgan ixtisoslashtirilgan ta’mirlash-qurilish tashkilotlari hisoblangan mikrofirma va kichik korxonalar tomonidan soliq va bojxona to‘lovlari bo‘yicha imtiyozlar va preferensiyalarni qo‘llash uchun ariza taqdim etilmaydi.

7. Bojxona to‘lovlari bo‘yicha imtiyozlar (bojxona rasmiylashtiruvi uchun yig‘imlaridan tashqari) O‘zbekiston Respublikasi Vazirlar Mahkamasi tomonidan tasdiqlangan ro‘yxat asosida olib kirilayotgan tovarlarni erkin muomalaga chiqarish rejimiga o‘tkazish bojxona rasmiylashtiruvi vaqtida taqdim etiladi.

8. Imtiyozlardan foydalangan ixtisoslashtirilgan ta’mirlash-qurilish tashkilotlari haqiqatda ixtisoslashganligini tasdiqlash uchun yil yakuni bo‘yicha soliq hisobotlarini taqdim etish bilan bir vaqtda davlat soliq xizmati organlariga ushbu Nizomning 2-ilovasida keltirilgan shaklga muvofiq Ma’lumotnoma — hisob-kitobni taqdim etadilar. Ma’lumotnoma — hisob-kitob davlat soliq xizmati organlariga ikki nusxada taqdim etiladi, shulardan bittasi davlat soliq xizmatining tegishli belgisi bilan soliq to‘lovchiga qaytariladi.

9. Agar ixtisoslashtirilgan ta’mirlash-qurilish tashkiloti hisobot yili yakuni bo‘yicha taqdim etilgan Ma’lumotnoma — hisob-kitobdan kelib chiqqan holda imtiyozlar taqdim etish uchun belgilangan mezonlarga mos kelmasa (ixtisoslashtirilgan ta’mirlash-qurilish tashkiloti hisoblanmaganda), soliq va bojxona to‘lovlari bo‘yicha berilgan imtiyozlar bekor qilinadi va ushbu to‘lovlarni budjetga to‘lash majburiyati qonun hujjatlarida nazarda tutilgan jarima sanksiyalarini hisobga olgan holda tiklanadi.

Korxona imtiyozlarni qo‘llash uchun belgilangan mezonlarga mos kelmasligi holatlari aniqlangan taqdirda davlat soliq xizmati organlari 10 ish kuni ichida davlat bojxona organlarini aniqlangan hollar to‘g‘risida ilgari to‘lanmagan bojxona to‘lovlarini undirish choralarini ko‘rish uchun xabardor qiladi.

10. Soliq va bojxona imtiyozlarini to‘g‘ri qo‘llanilishi ustidan nazorat O‘zbekiston Respublikasi davlat soliq xizmati va davlat bojxona xizmati organlari tomonidan amalga oshiriladi.