Muqaddas islom dini, islom falsafasi va madaniyati rivojiga ulkan hissa qo‘shgan buyuk ulamo va aziz-avliyolarning tabarruk nomlari bilan bog‘liq Imom Buxoriy, Imom Termiziy, Imom Moturidiy, Hazrati Imom, Shohi Zinda, Bahouddin Naqshband, Xoja Ahror Valiy, Ko‘k gumbaz, Dorus-saodat, Qosim shayx kabi mamlakatimiz hududidagi qutlug‘ ziyoratgoh va qadamjolarni talab darajasida saqlash va obodonlashtirish, ularning infratuzilmasini takomillashtirish ishlarini amalga oshirish maqsadida:

1. O‘zbekiston musulmonlari idorasi, Din ishlari bo‘yicha qo‘mita, Respublika Ma’naviyat va ma’rifat kengashi hamda “Nuroniy” jamg‘armasining O‘zbekiston musulmonlari idorasi huzurida Muqaddas qadamjolarni saqlash va obod etish xayriya jamg‘armasini tashkil qilish to‘g‘risidagi taklifi ma’qullansin.

2. Muqaddas qadamjolarni saqlash va obod etish jamg‘armasining Vasiylik kengashi tarkibi 1-ilovaga, ijrochi direksiyasi tuzilmasi esa 2-ilovaga muvofiq tashkil etilgani ma’lumot uchun qabul qilinsin.

3. Muqaddas qadamjolarni saqlash va obod etish jamg‘armasining asosiy vazifalari etib quyidagilar belgilansin:

yurtimizda yashab o‘tgan, yodgorlik va qadamjolari qutlug‘ ziyoratgohga aylanib ketgan aziz-avliyo va mutafakkirlarning qoldirgan bebaho merosini xalqimiz, avvalo yoshlarimizning qalbi va ongiga chuqur singdirish;

noyob tarixiy-me’moriy majmualar bo‘lmish mazkur ziyoratgohlarni saqlash, tiklash-ta’mirlash va yanada obodonlashtirish, ularning infratuzilmasini rivojlantirish;

ushbu qadamjolarning musulmon dunyosidagi nufuzini yanada oshirish, bu maskanlarga mahalliy va xorijiy fuqarolarning keng ko‘lamdagi ziyoratlarini uyushtirish, ziyoratchilar uchun zarur shart-sharoitlar yaratish;

diniy ta’lim muassasalari uchun mutaxassislar tayyorlash hamda diniy sohada faoliyat ko‘rsatayotgan xodimlarning malakasini oshirish masalasida moliyaviy ko‘mak berish.

4. Muqaddas qadamjolarni saqlash va obod etish jamg‘armasi faoliyatining moliyaviy manbalari quyidagilardan iborat bo‘lishi belgilab qo‘yilsin:

O‘zbekiston musulmonlari idorasi tasarrufidagi diniy tashkilotlar, shuningdek, yurtimizdagi idora va muassasalar, ijtimoiy tashkilotlar, korxonalar, tijorat banklari va fuqarolarning xayriya mablag‘lari;

xorijiy mamlakatlarning xayriya tashkilotlari, jamg‘armalar, davlat rahbarlari, din arboblari va boshqa shaxslarning xayr-ehsonlari.

5. Muqaddas qadamjolarni saqlash va obod etish jamg‘armasiga yo‘naltiriladigan xayriya mablag‘lari uchun O‘zbekiston Respublikasi Tashqi iqtisodiy faoliyat milliy bankida maxsus hisob raqami ochilsin.

6. Belgilab qo‘yilsinki, O‘zbekiston musulmonlari idorasi huzuridagi Muqaddas qadamjolarni saqlash va obod etish xayriya jamg‘armasiga tushadigan mablag‘lar soliqqa tortilmaydi.

7. O‘zbekiston Respublikasi Vazirlar Mahkamasining 2003-yil 22-avgustdagi “Din sohasidagi ma’naviy-ma’rifiy, ta’lim ishlarini va faoliyatini yanada takomillashtirishda ijtimoiy ko‘mak va imtiyozlar berish to‘g‘risida”gi 364-sonli qarori ikkinchi bandining ikkinchi abzatsida qayd etilgan O‘zbekiston musulmonlari idorasi huzurida tashkil etilgan maxsus jamg‘arma haqidagi punkt o‘z kuchini yo‘qotgan deb hisoblansin.

8. Maxsus jamg‘armaning mol-mulki va moliyaviy mablag‘larini yangitdan tuzilayotgan Muqaddas qadamjolarni saqlash va obod etish xayriya jamg‘armasi balansiga o‘tkazish haqidagi O‘zbekiston musulmonlari idorasining taklifi ma’kullansin.

9. O‘zbekiston musulmonlari idorasi va uning tasarrufidagi diniy tashkilotlar uchun kommunal xizmatlar (tabiiy gaz, ichimlik suvi, issiqlik energiyasi, elektr energiyasi, telefon, oqava suv va maishiy chiqindilarni tashish) bo‘yicha belgilangan to‘lov imtiyozlari hisobidan hosil bo‘lgan mablag‘lar O‘zbekiston musulmonlari idorasi budjetiga o‘tkazilsin.

10. Muqaddas qadamjolarni saqlash va obod etish xayriya jamg‘armasining O‘zbekiston musulmonlari idorasining ma’muriy binosiga joylashtirilishi ma’lumot uchun qabul qilinsin.

11. O‘zbekiston Respublikasi Adliya vazirligi bir oy muddatda Uzbekiston musulmonlari idorasi huzuridagi Muqaddas qadamjolarni saqlash va obod etish xayriya jamg‘armasi nizomini belgilangan tartibda ruyxatdan o‘tkazsin.

12. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.Qosimov zimmasiga yuklansin.