Oʻzbekiston Respublikasi Prezidentining “Qishloq xoʻjaligi mashinasozligi tarmogʻini yanada isloh qilish chora-tadbirlari toʻgʻrisida” 2008-yil 4-apreldagi 830-son qarorini bajarish yuzasidan hamda qishloq xoʻjaligini ilgari “Oʻzbekqishloqmash” OAJ tomonidan ishlab chiqarilgan texnika bilan taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi, Davlat mulki qoʻmitasi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining qishloq xoʻjaligi texnikasi va unga butlovchi buyumlar ishlab chiqarishni tashkil etish uchun tugatilayotgan “Oʻzbekqishloqmash” OAJdan “Agregat zavodi” OAJga:

tugatish qiymati boʻyicha — ilovaga* muvofiq roʻyxat boʻyicha ishlab chiqarish asbob-uskunalarini “Agregat zavodi” OAJning ustav fondidagi davlat ulushini koʻpaytirish hisobiga;

tekin asosda — konstruktorlik va texnologik hujjatlarni, shuningdek texnologik jihozlarni berish toʻgʻrisidagi taklifiga rozilik berilsin.

2. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi koʻrsatib oʻtilgan ishlab chiqarish asbob-uskunalari, konstruktorlik va texnologik hujjatlar, shuningdek texnologik jihozlar “Agregat zavodi” OAJga berilishini taʼminlasin.

3. Belgilansinki:

ishlab chiqarish asbob-uskunalarini qayta joylashtirish, montaj qilish, ishga tushirish-sozlash ishlari va ishlab chiqarish quvvatlarini qishloq xoʻjaligi texnikasi ishlab chiqarishga tayyorlash “Agregat zavodi” OAJning oʻz mablagʻlari hisobiga amalga oshiriladi;

“Agregat zavodi” OAJ 2009-yildan boshlab “Oʻzbekqishloqmash” OAJning qishloq xoʻjaligi texnikasi nomenklaturasi ishlab chiqarilishini va bosqichma-bosqich modernizatsiya qilinishini taʼminlasin.

4. Oʻzbekiston Respublikasi Davlat mulki qoʻmitasi:

Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Adliya vazirligi bilan birgalikda investorlarning investitsiya majburiyatlarini va ularni bajarish jadvallarini aniq aks ettirgan holda “Oʻzbekqishloqmash” OAJning koʻchmas mol-mulkini sotishga shartnomalar tuzishda “Oʻzbekqishloqmash” OAJning tugatuvchi boshqaruvchisiga koʻmaklashsin;

investorlar qabul qilgan investitsiya majburiyatlari ular tomonidan bajarilishi ustidan qatʼiy nazoratni taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari U.U. Rozuqulov zimmasiga yuklansin.