Oʻzbekiston Respublikasi Prezidentining 2008-yil 8-iyuldagi PQ-910-sonli “Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009 — 2014-yillarga moʻljallangan Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 28-son, 267-modda) muvofiq Oʻzbekiston Respublikasi Xalq taʼlimi vazirligi va Moliya vazirligi qaror qiladi:

1. Ota-onalar tomonidan bolalarning musiqa va sanʼat maktablarida oʻqishi uchun haq toʻlash va undan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Mazkur Nizom Oʻzbekiston Respublikasi Prezidentining 2008-yil 8-iyuldagi PQ-910-sonli “Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009 — 2014-yillarga moʻljallangan Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 28-son, 267-modda) muvofiq bolalar (oʻquvchilar)ning (bundan keyingi oʻrinlarda bolalar deb yuritiladi) musiqa va sanʼat maktablarida oʻqishi uchun toʻlanadigan toʻlovning miqdori, uni toʻlash va undan foydalanish tartibini belgilaydi.

1. Mazkur Nizom Davlat budjeti tomonidan moliyalashtiriladigan musiqa va sanʼat maktablariga taalluqlidir.

2. Musiqa va sanʼat maktablarida oʻqish uchun toʻlanadigan toʻlovlar qonun hujjatlarida belgilanadigan miqdorlarda undiriladi.

3. Musiqa va sanʼat maktablarida bolalarning taʼlim olishlari uchun toʻlovlar ota-onalar yoki ularning oʻrnini bosuvchi shaxslar (bundan keyingi oʻrinlarda ota-onalar deb yuritiladi) va maktab maʼmuriyati tomonidan tuzilgan shartnoma asosida amalga oshiriladi.

4. Musiqa va sanʼat maktablarida oʻqish uchun toʻlanadigan toʻlov oʻquv yilining (sentabr — may) oylari uchun toʻlanadi. Toʻlovlar har oyda kelgusi oyning 5-sanasidan kechikmasdan toʻlanadi.

5. Bolaning kasalligi davrida (2 haftadan kam boʻlmaganda) musiqa va sanʼat maktabida oʻqish uchun toʻlov olinmaydi. Bunda, bolaning kasalligi toʻgʻrisida ota-onaning arizasi va davolash muassasasidan yoki hudud shifokoridan olingan maʼlumotnoma taqdim etilishi zarur.

6. Musiqa va sanʼat maktablarida oʻqish uchun amalga oshiriladigan toʻlov bank muassasalariga toʻlanadi va toʻlov toʻlanganligini tasdiqlovchi hujjat (kvitansiya) nusxasi musiqa va sanʼat maktabiga taqdim etiladi.

7. Agar toʻlov naqd pulsiz shaklda amalga oshirilgan boʻlsa, musiqa va sanʼat maktabiga toʻlov topshiriqnomasining nusxasi (toʻlov toʻlanganligi toʻgʻrisidagi bank belgisi qoʻyilgan holda) taqdim etiladi.

8. Musiqa va sanʼat maktabida oʻqish uchun toʻlangan toʻlov ushbu muassasalarning alohida budjetdan tashqari talab qilib olguncha bank depozit hisob raqamiga tushiriladi.

9. Agar toʻlov ushbu Nizomning 4-bandida koʻrsatilgan muddatdan ikki hafta mobaynida uzrli sabablarsiz toʻlanmagan taqdirda, oʻquvchilar bolalar musiqa va sanʼat maktabi roʻyxatidan chiqariladi.

10. Musiqa va sanʼat maktabida oʻqiydigan bolaning taʼlim olishi uchun toʻlanmagan toʻlov bir oy ichida toʻlangan taqdirda, bola mazkur sinfning dasturiy talabini bajargandan soʻng oʻquvchilar safiga qayta tiklanadi.

11. Mazkur Nizomga muvofiq, musiqa maktablarida taʼlim olish uchun ota-onalar tomonidan amalga oshirilgan toʻlovdan tushgan mablagʻ bolalar musiqa va sanʼat maktablarining moddiy-texnika bazasini mustahkamlash, oʻqituvchilar va konsertmeysterlarni moddiy ragʻbatlantirish uchun sarflanadi.

12. Har bir musiqa va sanʼat maktabida oʻqish uchun toʻlovlardan ozod etish va oʻqituvchi hamda konsertmeysterlarga har oylik ustamalar belgilash boʻyicha Komissiya (bundan keyingi oʻrinlarda Komissiya deb yuritiladi) tuziladi.

13. Komissiya maktab direktori buyrugʻi asosida 5 — 7 kishidan iborat boʻlgan tarkibda tayinlanadi.

Komissiya raisi — maktab direktori.

Komissiya aʼzolari — maʼnaviy-maʼrifiy va oʻquv ishlari boʻyicha direktor oʻrinbosari (masʼul kotib), musiqa va sanʼat maktabining kasaba uyushmasi raisi, ikki yetakchi oʻqituvchi va ota-onalar qoʻmitasining ikki vakili.

14. Komissiyaning asosiy vazifasi quyidagilar hisoblanadi:

a) moliya yilining boshlanishida, zarur hollarda oʻquv yili davomida ota-onalarni bolalarning oʻqishi uchun belgilangan toʻlovdan ozod etish masalasini koʻrib chiqish;

b) oʻquv yilining boshlanishida, shuningdek, zarur hollarda oʻquv yili davomida oylik ustama belgilash boʻyicha oʻqituvchi va konsertmeysterlarning nomzodlarini koʻrib chiqish hamda har oylik ustama belgilash.

15. Komissiya:

a) taqdim etilgan hujjatlarni koʻrib chiqadi va tegishli qaror qabul qiladi;

b) qaror bayonnomasini direktorga tasdiqlash uchun topshiradi.

16. Oʻqituvchi va konsertmeysterlarga ustama belgilash uchun nomzodlarni koʻrib chiqishda oʻqituvchi va konsertmeysterlarning tarbiyaviy va sinfdan tashqari ishlari, kasbiy mahorati, oʻqitish sifati va yuksak koʻrsatkichlari toʻgʻrisidagi musiqa va sanʼat maktablarining boʻlim boshliqlari tomonidan beriladigan tavsiyanomalar Komissiyaga taqdim etilishi kerak.

17. Komissiya, zarur hollarda, oʻquv yili boshida belgilangan ustamalar miqdorining muddatidan oldin oʻzgarganligi toʻgʻrisida qaror qabul qiladi.

18. Oʻzbekiston Respublikasi Vazirlar Mahkamasining 2001-yil 31-dekabrdagi 490-sonli “Oʻzbekiston Respublikasining 2002-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2001-y., 22-24-son, 159-modda) asosan musiqa va sanʼat maktablarida oʻquvchilar umumiy sonining (oʻquv yili boshlanishida) 25 foizi doirasida kam taʼminlangan oilalarning iqtidorli bolalari taʼlim olishlari uchun toʻlovdan ozod etiladilar.

19. Kam taʼminlangan oilalarning farzandlarini toʻlovdan ozod etish uchun quyidagi hujjatlar taqdim etilishi lozim:

a) ota-onalarning arizasi;

b) 16 (18) yoshgacha boʻlgan farzandlari bor oilalarning har oylik oladigan nafaqasi va oilaning har bir aʼzosiga toʻgʻri keladigan jami daromadi toʻgʻrisidagi fuqarolarning oʻzini oʻzi boshqarish organlari tomonidan beriladigan maʼlumotnoma;

v) oʻquvchining oʻzlashtirish tabeli va tavsifnomasi;

g) oʻquvchining respublika, viloyat, tuman (shahar) koʻrik-tanlovlari, festivallar, koʻrgazmalardagi ishtirokini tasdiqlovchi hujjatlar (agar mavjud boʻlsa).

20. Toʻlovdan ozod etilgan kam taʼminlangan oila farzandlari roʻyxati Komissiya tomonidan moliya yilining boshlanishida aniqlanadi va Komissiya qarori bayonnomasi asosida maktab direktori buyrugʻi bilan tasdiqlanadi.

21. Oilaning bir aʼzosiga bir oyda toʻgʻri keladigan jami daromadi eng past darajada boʻlgan kam taʼminlangan oilalarning bolalarini roʻyxatga birinchi navbatda kiritish tamoyiliga rioya qilgan holda toʻldirib boriladi.

Roʻyxatga kirmagan kam taʼminlangan oilalarning bolalaridan zaxira shakllantiriladi.

22. Musiqa va sanʼat maktablarida oʻqish uchun belgilangan toʻlovlardan yetim bolalar va ota-onalar qarovisiz qolgan bolalar ham ozod etiladilar.

23. Davlat qaramogʻida boʻlgan yetim bolalar va ota-onalar qarovisiz qolgan bolalarning oʻqishi uchun toʻlovdan ozod etishga xalq taʼlimi boʻlimlari tomonidan berilgan maʼlumotnomalar asos boʻladi.

24. Oʻqish uchun toʻlangan ota-onalar toʻlovi mablagʻlari quyidagilarga yoʻnaltiriladi:

a) 50 foizi maktabning moddiy-texnik bazasini mustahkamlashga;

b) 40 foizi maktab pedagog xodimlarining umumiy soni koʻrsatkichining 50 foizidan oshmagan oʻqituvchi va konsertmeysterlarga har oylik bazaviy tarif stavkasining 40 foizigacha moddiy ragʻbatlantirishga;

v) 10 foizi xalqaro va respublika, viloyat, tuman (shahar) koʻrik-tanlovlari, festivallar, koʻrgazmalardagi yutuqlari uchun ragʻbatlantirishga, shuningdek, oʻquvchilarni teatr, konsert, muzeylarga tashrifi hamda madaniy tadbirlarni tashkil etish va oʻtkazishga.

25. Ota-onalar toʻlovidan tushgan mablagʻlarning taqsimlanishi Komissiya qarori asosida maktab direktori buyrugʻi bilan tasdiqlanadi.

26. Oʻqituvchi va konsertmeysterlarga belgilanadigan ustama miqdori ularning tarbiyaviy va sinfdan tashqari ishlari, oʻquv jarayoniga qoʻshgan shaxsiy hissasi uchun 100 ballik tizim asosida mazkur Nizomning 1-ilovasiga muvofiq baholanadi

Bunda:

a) 80 ball va undan koʻp ballni toʻplagan oʻqituvchi va konsertmeysterlarga tarbiyaviy va sinfdan tashqari ishlari uchun bazaviy tarif stavkasining 15 foizigacha;

b) 60 balldan 80 ballgacha toʻplagan oʻqituvchi va konsertmeysterlarga tarbiyaviy va sinfdan tashqari ishlari uchun bazaviy tarif stavkasining 10 foizigacha ustama belgilanadi.

27. Oʻqituvchi va konsertmeysterlarga belgilanadigan ustama miqdori ularning kasbiy mahorati va pedagogik ishlarining yuqori koʻrsatkichlari uchun 100 ballik tizim asosida mazkur Nizomning 2-ilovasiga muvofiq baholanadi.

Bunda:

a) 70 balldan 80 ballgacha toʻplagan oʻqituvchi va konsertmeysterlarga bazaviy tarif stavkasining 25 foizigacha ustama belgilanadi;

b) 60 balldan 70 ballgacha toʻplagan oʻqituvchi va konsertmeysterlarga bazaviy tarif stavkasining 20 foizigacha ustama belgilanadi.

28. Musiqa va sanʼat maktablarida bolalarning oʻqishi uchun amalga oshirilgan toʻlov tushumining buxgalteriya hisob-kitobi quyidagicha:

yuridik shaxs maqomiga ega boʻlmagan maktablarda — hududiy moliya organining xalq taʼlimi muassasalarini moliyalashtirish boʻlimi tomonidan;

yuridik shaxs maqomiga ega boʻlgan maktablarda — ularning buxgalteriyasi tomonidan amalga oshiriladi.

29. Ota-onalar toʻlovlarining hisobi buxgalteriya hisob-kitobida quyidagi buxgalteriya qaydnomalari orqali rasmiylashtiriladi:

Dt 172

Kt 236

Ota-onalar toʻlovidan tushgan summaga quyidagi buxgalteriya qaydnomasi beriladi:

Dt 111

Kt 172

Tushgan mablagʻlarni musiqa va sanʼat maktablari tomonidan ishlatishda quyidagi buxgalteriya qaydnomasidan foydalaniladi:

Dt 178 (120)

Kt 111

Musiqa maktablarining ota-onalar toʻlovi tushumining aniq sarflanishi oʻquv yili davomida debet boʻyicha 211 yordamchi hisobvaragʻi va hisobot yilining yakunida debet boʻyicha 211 yordamchi hisobvaragʻidagi sarf-xarajatlar 236 yordamchi hisobvaragʻidagi yakuniy oborotlar asosida yopiladi.

30. Oʻzbekiston Respublikasi Xalq taʼlimi vazirligi va uning hududiy boshqarmalari ota-onalar tomonidan toʻlovni amalga oshirish va pedagog xodimlarga belgilanadigan ustamalarning monitoringini olib boradi.

31. Yuridik shaxs maqomiga ega boʻlgan taʼlim muassasasining rahbari va bosh hisobchisi ota-onalar toʻlovi tushumini maqsadli sarflash boʻyicha javobgar hisoblanadi.

32. Moliya vazirligining nazorat-taftish bosh boshqarmasi va uning hududiy boshqarmalari tomonidan bolalar musiqa va sanʼat maktablarida oʻqish uchun toʻlanadigan ota-onalar toʻlovidan tushgan mablagʻlarning oʻz vaqtida qabul qilinishi, shuningdek, maqsadli saflanishi hamda pedagog va konsertmeysterlarning ustamalari miqdorini hisoblashning toʻgʻri taqsimlanishi boʻyicha nazorat olib boriladi.

33. Ushbu Nizom talablarini buzilishida aybdor boʻlgan shaxslar qonun hujjatlariga muvofiq javobgar boʻladi.