Boshqaruv xodimlari sonini maqbullashtirish, uni bozor iqtisodiyoti tamoyillari va talablariga muvofiqlashtirish, davlat hamda xoʻjalik boshqaruvi organlari faoliyati samaradorligini yanada oshirish maqsadida:

1. Oʻzbekiston Respublikasi Prezidentining 2008-yil 25-yanvardagi R-2919-sonli farmoyishi bilan tashkil etilgan Davlat va xoʻjalik boshqaruvi organlari tuzilmasini takomillashtirish hamda boshqaruv xodimlari sonini qisqartirish boʻyicha Respublika komissiyasining:

davlat va xoʻjalik boshqaruvi organlari rahbarlari oʻrinbosarlari lavozimlarining sonini 1-ilovaga* muvofiq qisqartirish toʻgʻrisidagi;

2008-yilning 1-iyulidan boshlab davlat va xoʻjalik boshqaruvi organlari hamda ularga boʻysunuvchi korxona va tashkilotlar boshqaruv xodimlarining cheklangan sonini 2 va 3-ilovalarga* muvofiq belgilash toʻgʻrisidagi takliflari qabul qilinsin.

2. Davlat va xoʻjalik boshqaruvi organlari:

oʻn kun muddatda xodimlar sonini qisqartirish boʻyicha komissiya tashkil etsin, boshqaruv va yordamchi xodimlarning qisqartiriladigan lavozimlari roʻyxatini aniqlasin hamda qisqartirishga tushgan shaxslarni qonun hujjatlarida belgilangan tartibda xabardor qilsin;

2008-yilning 15-iyuligacha boʻlgan muddatda xodimlar sonini qisqartirish boʻyicha olib borilgan ishlar toʻgʻrisida Oʻzbekiston Respublikasi Moliya vazirligiga axborot taqdim etilishini taʼminlasin;

qonun hujjatlarida belgilangan tartibda Oʻzbekiston Respublikasi Mehnat va aholini ijtimoiy muhofaza qilish vazirligi hamda uning joylardagi organlari bilan birgalikda ishdan boʻshatiladigan xodimlarni ishga joylashtirish choralarini koʻrsin va ularga koʻmaklashsin.

3. Oʻzbekiston Respublikasi Vazirlar Mahkamasi komplekslarining rahbarlari:

mazkur Qarorda belgilangan davlat va xoʻjalik boshqaruvi organlari boshqaruv xodimlari sonini qisqartirish hamda boʻshaydigan xodimlarni ishga joylashtirish ustidan qatʼiy nazorat oʻrnatsin;

bir oy muddatda mutasaddi vazirliklar va idoralar bilan birgalikda ushbu Qaror talablarini hisobga olgan holda davlat va xoʻjalik boshqaruvi organlari tuzilmasini qayta koʻrib chiqsin va zarur hollarda Oʻzbekiston Respublikasi Vazirlar Mahkamasiga tegishli takliflar kiritsin.

4. Belgilansinki, boshqaruv xodimlari soni qisqartirilishi munosabati bilan boʻshaydigan mablagʻlar toʻliq hajmda davlat va xoʻjalik boshqaruvi organlarining yuqori malakali xodimlari ish haqini oshirishga yoʻnaltiriladi.

5. Oʻzbekiston Respublikasi Moliya vazirligi:

budjet tashkilotlarining shtat jadvali va xarajatlari smetasini mazkur Qarorda belgilangan boshqaruv xodimlarining cheklangan soniga hamda yordamchi xodimlar sonining hisoblab chiqilgan normativlariga qatʼiy muvofiq ravishda roʻyxatdan oʻtkazsin;

Oʻzbekiston Respublikasi Davlat statistika qoʻmitasi bilan birgalikda davlat va xoʻjalik boshqaruvi organlari tomonidan boshqaruv apparati boshqaruv xodimlarining belgilab qoʻyilgan cheklangan soniga hamda xizmat koʻrsatuvchi va texnik xodimlar soni nisbatining hisoblab chiqilgan normativlariga rioya qilinishi ustidan doimiy monitoring olib borsin. Monitoring natijalari toʻgʻrisida har yili 25-yanvargacha va har chorakda hisobot davridan keyingi oyning 20 sanasigacha Oʻzbekiston Respublikasi Vazirlar Mahkamasiga axborot taqdim etsin.

6. Ushbu Qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.