Oʻzbekiston Respublikasi Prezidentining “Inson huquqlari umumjahon deklaratsiyasi qabul qilinganligining 60 yilligiga bagʻishlangan tadbirlar dasturi toʻgʻrisida” 2008-yil 1-maydagi PF-3994-son Farmonini bajarish yuzasidan va inson huquqlari boʻyicha milliy institutlarning samarali faoliyat koʻrsatishi uchun zarur shart-sharoitlar yaratish maqsadida Vazirlar Mahkamasi qaror qiladi:

1. 2008-yilda inson huquqlari boʻyicha Oʻzbekiston milliy institutlarining moddiy-texnika bazasini mustahkamlash boʻyicha chora-tadbirlar kompleksi ilovaga muvofiq tasdiqlansin.

2. Oʻzbekiston Respublikasi Moliya vazirligi:

2008-yilda Oʻzbekiston Respublikasi Oliy Majlisining Inson huquqlari boʻyicha vakili kotibiyatiga (keyingi oʻrinlarda “Vakil Kotibiyati” deb ataladi) va Inson huquqlari boʻyicha milliy markazga (keyingi oʻrinlarda “Markaz” deb ataladi) Oʻzbekiston Respublikasi Vazirlar Mahkamasining zaxira jamgʻarmasidan asoslangan hisob-kitoblar boʻyicha ushbu qarorga ilovaga kiritilgan zarur zamonaviy ofis mebeli, avtotransport, kompyuter texnikasi, dasturiy vositalar va boshqa moddiy-texnika vositalari sotib olish uchun belgilangan tartibda mablagʻ ajratsin;

2008-yil oktyabr oyidan boshlab Davlat budjetidan Vakilning, uning Kotibiyatining joriy taʼminoti, bosma materiallar chiqarish, axborot nashrlari va adabiyotlarga obuna boʻlish, xalqaro Ombudsman institutlariga aʼzolik badallari toʻlash, Vakil va uning Kotibiyati xodimlarining xalqaro forumlar ishida qatnashishi uchun har yili mablagʻlar ajratilishini, shuningdek avtomobillarni saqlashga limitlar ajratilishini nazarda tutsin.

3. Vakil kotibiyati Toshkent shahar, Shayxontohur tumani, Oʻzbekiston shoh koʻchasi, 16 “A” uydagi maʼmuriy binoga joylashtirilsin.

Toshkent shahar hokimligi bir oy muddatda ushbu qarorga muvofiq Vakilning Kotibiyati uchun ajratilgan xonalar belgilangan tartibda taʼmirlanishini taʼminlasin.

4. Vakil Kotibiyati va Markaz Oʻzbekiston Respublikasi Vazirlar Mahkamasining qarorlari va farmoyishlari, Oʻzbekiston Respublikasi vazirliklari, davlat qoʻmitalari va idoralarining normativ-huquqiy hujjatlari bir nusxada majburiy yuboriladigan tashkilotlar roʻyxatiga kiritilsin.

5. Oʻzbekiston matbuot va axborot agentligi Vakil Kotibiyatini va Markazni bosma va kitob mahsulotlari (huquqiy, ijtimoiy-siyosiy, iqtisodiy va tarixiy nashrlar)ning nazorat nusxalarini (1 nusxa) bepul oladigan tashkilotlar roʻyxatiga kiritsin hamda Vakil va Markazning buyurtmanomalari boʻyicha axborot-tahliliy va ilmiy mahsulotlar nashr etilishiga koʻmaklashsin.

6. Oʻzbekiston aloqa va axborotlashtirish agentligi:

bir oy muddatda Vakil Kotibiyatini belgilangan tartibda zarur aloqa vositalari, shu jumladan Hukumat aloqa vositalari, shuningdek Internet tarmogʻi bilan taʼminlasin;

Vakil Kotibiyati va Markaz bilan birgalikda 2008-yil 1-noyabrgacha Internet tarmogʻida ularning veb-saytlarini ishlab chiqsin va uzluksiz ishlashini taʼminlasin.

7. Oʻzbekiston Respublikasi Adliya vazirligi bir oy muddatda amaldagi qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.