Gʻallachilik va paxtachilik sohasida ilmiy-tadqiqot ishlarini yanada chuqurlashtirish, Qashqadaryo viloyati ilmiy muassasalarining moddiy-texnika bazasini modernizatsiya qilish, qattiq va yumshoq bugʻdoyning yangi raqobatbardoshli navlarini, shuningdek mintaqalarning tabiiy-iqlim sharoitlariga javob beradigan tezpishar, qurgʻoqchilikka chidamli gʻoʻza navlarini yaratish ishlarini jadallashtirish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi hamda Qashqadaryo viloyati hokimligining Oʻzbekiston Qishloq xoʻjaligi ilmiy-ishlab chiqarish markazi huzurida Qashqadaryo boshoqli don ekinlari seleksiyasi va urugʻchiligi ilmiy-tadqiqot institutini tashkil etish toʻgʻrisidagi taklifi qabul qilinsin.

2. Quyidagilar Qashqadaryo boshoqli don ekinlari seleksiyasi va urugʻchiligi ilmiy-tadqiqot institutining asosiy vazifalari etib belgilansin:

qattiq va yumshoq bugʻdoyning yuqori sifat koʻrsatkichlariga ega boʻlgan, kasalliklar va zararkunandalarga chidamli raqobatbardoshli yangi navlarini yaratish;

mintaqalarning tabiiy-iqlim sharoitlariga javob beradigan xorijiy va mahalliy navlarni tanlab olish va joylashtirish boʻyicha takliflar tayyorlash;

yaratilayotgan boshoqli don ekinlari navlarining boshlangʻich urugʻchiligi tizimini tashkil etish;

suv bilan yetarli taʼminlanmagan va qurgʻoqchilik sharoitlarida boshoqli don ekinlaridan yuqori hosil olish boʻyicha ilgʻor agrotexnologiyalarni ishlab chiqish.

3. Qashqadaryo boshoqli don ekinlari seleksiyasi va urugʻchiligi ilmiy-tadqiqot institutining tuzilmasi hamda xodimlarining 62 kishidan (xizmat koʻrsatuvchi xodimlardan tashqari) iborat boʻlgan cheklangan soni 1-ilovaga muvofiq tasdiqlansin.

Oʻzbekiston Qishloq xoʻjaligi ilmiy-ishlab chiqarish markazi bir oy muddatda institutni yuqori malakali ilmiy kadrlar bilan taʼminlasin.

4. Oʻzbekiston Respublikasi Qishloq va suv xoʻjaligi vazirligi bir oy muddatda Qashqadaryo boshoqli don ekinlari seleksiyasi va urugʻchiligi ilmiy-tadqiqot instituti ustavini ishlab chiqsin va belgilangan tartibda tasdiqlasin, shuningdek uni davlat roʻyxatidan oʻtkazishni taʼminlasin.

5. Qashqadaryo viloyati hokimligi:

bir hafta muddatda — tashkil etilayotgan institutga viloyatning uchta zonasida 1000 gektar ishlov beriladigan, shu jumladan 300 gektar sugʻoriladigan va 700 gektar lalmi yerlar ajratsin;

bir oy muddatda — institutni maʼmuriy va ishlab chiqarish binolari, shuningdek aloqa vositalari bilan taʼminlasin.

6. Oʻzbekiston Respublikasi Qishloq va suv xoʻjaligi vazirligi, Oʻzbekiston Qishloq xoʻjaligi ilmiy-ishlab chiqarish markazi hamda Qashqadaryo viloyati hokimligining Oʻzbekiston paxtachilik ilmiy-tadqiqot institutining faoliyat koʻrsatayotgan Qashqadaryo filialini tarkibiy boʻlinmalar tashkil etish, uning ilmiy-ishlab chiqarish bazasini kengaytirish hamda kadrlar tarkibini yetakchi olimlar va mutaxassislar bilan mustahkamlash asosida yanada rivojlantirish toʻgʻrisidagi taklifi qabul qilinsin.

7. Quyidagilar Oʻzbekiston paxtachilik ilmiy-tadqiqot instituti Qashqadaryo filialining asosiy vazifalari etib belgilansin:

seleksiya, urugʻchilik, navlarni yangilash, tolasining sifati yuqori boʻlgan tezpishar yangi gʻoʻza navlarini yaratish va ularni mintaqaning turli tuproq-iqlim sharoitlarida oqilona joylashtirish sohasidagi ishlarni takomillashtirish va jadallashtirish;

suv bilan yetarli taʼminlanmagan va qurgʻoqchilik sharoitlarida gʻoʻza oʻstirishning zamonaviy agrotexnologiyalarini ishlab chiqish;

gʻoʻzaning yangi va istiqbolli navlari boshlangʻich urugʻchiligi tizimini tashkil etish.

9. Qashqadaryo viloyati hokimligi va “Oʻzbekneftgaz” milliy xolding kompaniyasining tashkil etilayotgan Qashqadaryo boshoqli don ekinlari seleksiyasi va urugʻchiligi ilmiy-tadqiqot instituti hamda Oʻzbekiston paxtachilik ilmiy-tadqiqot institutining Qashqadaryo filiali faoliyatini tashkil etish uchun 3-ilovadagi jadvalga muvofiq mablagʻlarni bosqichma-bosqich ajratish toʻgʻrisidagi taklifiga rozilik berilsin.

10. Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasiga, Oʻzbekiston qishloq xoʻjaligi ilmiy-ishlab chiqarish markaziga Qashqadaryo boshoqli don ekinlari seleksiyasi va urugʻchiligi ilmiy-tadqiqot instituti hamda Oʻzbekiston paxtachilik ilmiy-tadqiqot institutining Qashqadaryo filiali tomonidan ishlab chiqiladigan ilmiy-amaliy va innovatsiya ishlarini 2009 — 2011-yillarda qishloq xoʻjaligi sohasida ilm-fanni rivojlantirish dasturlari boʻyicha budjet mablagʻlari hisobiga moliyalashtirish yuzasidan tanlovlar oʻtkazishga ruxsat berilsin.

11. Oʻzbekiston Respublikasi Qishloq va suv xoʻjaligi vazirligi, Moliya vazirligi hamda Iqtisodiyot vazirligi “Oʻzdonmahsulot” aksiyadorlik kompaniyasi bilan birgalikda bir oy muddatda boshoqli don ekinlari urugʻi yetishtiruvchi xoʻjaliklarni, shuningdek ilmiy muassasalar — navlar originatorlarini, seleksiya va urugʻchilik sohasi olimlarini ragʻbatlantirish toʻgʻrisidagi nizomni ishlab chiqsinlar va belgilangan tartibda tasdiqlasinlar.

12. Oʻzbekiston Respublikasi Oliy va oʻrta maxsus taʼlim vazirligi Qishloq va suv xoʻjaligi vazirligi bilan birgalikda 2009 — 2015-yillarda qishloq xoʻjaligi yoʻnalishidagi oliy taʼlim va ilmiy muassasalarda Qashqadaryo viloyati uchun bakalavrlar, magistrlar, aspirantlar va doktorantlar tayyorlashni tashkil etsin, bunda kelgusida ularni tashkil etilayotgan qishloq xoʻjaligi sohasidagi ilmiy muassasalarga yuborish va ulardan oqilona foydalanishni nazarda tutsin.

13. Oʻzbekiston Respublikasi Qishloq va suv xoʻjaligi vazirligi Adliya vazirligi bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Qosimov va E.R. Shoismatov zimmasiga yuklansin.