Oʻzbekiston Respublikasi Oliy Kengashi qaror qiladi:

1. “Oʻzbekiston Respublikasida kooperatsiya toʻgʻrisida”gi Oʻzbekiston Respublikasi Qonuni matbuotda eʼlon qilinishi bilanoq amalga kiritilsin.

2. Belgilab qoʻyilsinki, Oʻzbekiston Respublikasi qonunlari “Oʻzbekiston Respublikasida kooperatsiya toʻgʻrisida”gi Oʻzbekiston Respublikasi Qonuniga muvofiqlashtirilguniga qadar, Oʻzbekiston Respublikasining ushbu Qonunga zid boʻlmagan amaldagi qonun hujjatlari qoʻllanilaveradi.

3. Oʻzbekiston Respublikasi Prezidenti huzuridagi Vazirlar Mahkamasiga uch oylik muddat ichida:

jamoa xoʻjaliklari tugatiladigan (qayta tashkil etiladigan) hollarda jamoa xoʻjaligi aʼzolarining shaxsiy mulkiy javobgarligi toʻgʻrisidagi nizomni ishlab chiqish topshirilsin. Ushbu nizom tasdiqlangunga qadar 8-moddaning 1-bandi jamoa xoʻjaligining aʼzolariga taalluqli boʻlmaydi;

Oʻzbekiston Respublikasining qonun hujjatlarini “Oʻzbekiston Respublikasida kooperatsiya toʻgʻrisida”gi Oʻzbekiston Respublikasining Qonuniga muvofiqlashtirish haqida Oʻzbekiston Respublikasi Oliy Kengashiga takliflar kiritish;

Oʻzbekiston Respublikasi Hukumatining qarorlarini “Oʻzbekiston Respublikasida kooperatsiya toʻgʻrisida”gi Oʻzbekiston Respublikasi Qonuniga muvofiqlashtirib chiqish;

Oʻzbekiston Respublikasi vazirliklari, davlat qoʻmitalari, idoralari, konsernlari Qonunga zid oʻz normativ hujjatlarini qayta koʻrib chiqishlari va bekor qilishlarini taʼminlash, shuningdek ishlab turgan kooperativlar hamda ular uyushmalarining ustavlarini Qonunga muvofiq holga keltirish topshirilsin.