O‘zbekiston Respublikasi Soliq kodeksi, O‘zbekiston Respublikasi “Davlat soliq xizmati to‘g‘risi”gi Qonunining 7-moddasi va O‘zbekiston Respublikasi Prezidentining 2007-yil 14-martdagi “Ishlab chiqarishni modernizatsiyalash, texnik va texnologik qayta jihozlashni rag‘batlantirishga oid qo‘shimcha chora-tadbirlar to‘g‘risida” PF-3860-son Farmoniga muvofiq qaror qilamiz:

1. Ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xo‘jalik yurituvchi subyektlar tomonidan imtiyozlarni qo‘llash tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatiga olingan kundan boshlab o‘n kun o‘tgach kuchga kiradi.

Mazkur Nizom O‘zbekiston Respublikasi Soliq kodeksi va O‘zbekiston Respublikasi Prezidentining 2007-yil 14-martdagi PF-3860-sonli “Ishlab chiqarishni modernizatsiyalash, texnik va texnologik qayta jihozlashni rag‘batlantirishga oid qo‘shimcha chora-tadbirlar to‘g‘risida”gi Farmoniga muvofiq, ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xo‘jalik yurituvchi subyektlar tomonidan imtiyozlarni qo‘llash tartibini belgilaydi”;

1. Mazkur Nizom maqsadlari uchun quyidagi asosiy tushunchalardan foydalaniladi:

yangi texnologik jihoz – chiqarilgan sanadan boshlab uch yildan oshmagan texnologik jihoz;

modernizatsiyalash — asosiy vositalar obyektini texnologik yoki xizmat maqsadini o‘zgartirish, ularning unumdorligini oshirish yoki boshqa sifat ko‘rsatkichlarini yaxshilashga yo‘naltirilgan ishlar;

texnik va texnologik qayta jihozlash — ilg‘or texnika va texnologiyalarni joriy etish, ishlab chiqarishni mexanizatsiyalash va avtomatlashtirish, ma’nan va jismonan eskirgan uskunalarni unumdorligi yanada yuqori bo‘lganlari bilan yangilash asosida asosiy vositalar yoki ularning ayrim qismlarining texnik-iqtisodiy ko‘rsatkichlarini oshirish bo‘yicha chora-tadbirlar majmui. Texnik va texnologik qayta jihozlash yangi ishlab chiqarishni tashkil etish hamda ishlab turgan ishlab chiqarishlarni kengaytirishni ham o‘z ichiga oladi.

ishlab chiqarish ehtiyojlari uchun foydalaniladigan binolar va inshootlarni rekonstruksiya qilish — ishlab chiqarishni takomillashtirish va uning texnik-iqtisodiy ko‘rsatkichlarini oshirish bilan bog‘liq bo‘lgan hamda ishlab chiqarish quvvatlarini oshirish, mahsulot (ishlar, xizmatlar) sifatini yaxshilash va nomenklaturasini o‘zgartirish maqsadlarida rekonstruksiya qilish loyihasi bo‘yicha amalga oshiriladigan tovarlarni ishlab chiqarish, ishlarni bajarish yoki xizmatlarni ko‘rsatish ehtiyojlari uchun foydalaniladigan mavjud binolar va inshootlarni qayta qurish;

ishlab chiqarishni yangi qurilish shaklida kengaytirish — mahsulot ishlab chiqarish, ish bajarish va xizmat ko‘rsatish jarayonida foydalanish maqsadida yangi bino va inshootlarning qurilishi.

2. Yangi texnologik jihozni sotib oluvchi, ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xo‘jalik yurituvchi subyektlarga yuridik shaxslardan olinadigan foyda solig‘i, yagona soliq to‘lovi va mol-mulk solig‘i bo‘yicha imtiyozlar ushbu Nizomda belgilangan tartibda taqdim etiladi.

O‘zbekiston Respublikasi hududiga olib kirilayotgan texnologik jihozlarga bojxona to‘lovlari bo‘yicha (qo‘shilgan qiymat solig‘i, import boj to‘lovlari) imtiyozlar O‘zbekiston Respublikasi Soliq kodeksining 211-moddasi va “Boj tarifi to‘g‘risida”gi Qonunining 33-moddasiga muvofiq taqdim etiladi.

3. Lizing obyektini qo‘shimcha lizingga berishda, ushbu Nizomda belgilangan yuridik shaxslardan olinadigan foyda solig‘i, yagona soliq to‘lovi va mol-mulk solig‘i bo‘yicha imtiyozlar qo‘shimcha lizingni oluvchiga taalluqli bo‘ladi. Bu holda lizing obyektini qo‘shimcha lizingga beruvchi lizing oluvchiga yuridik shaxslardan olinadigan foyda solig‘i, yagona soliq to‘lovi va mol-mulk solig‘i bo‘yicha nazarda tutilgan imtiyozlar tatbiq etilmaydi.

4. Soliq imtiyozlari (mol-mulk solig‘i bo‘yicha imtiyozlar bundan mustasno) yangi jihoz ishlab chiqarishga joriy etilgan yoki o‘z ishlab chiqarishini modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilish amalga oshirilgan navbatdagi soliq davridan boshlab qo‘llaniladi.

Yuridik shaxslardan olinadigan foyda solig‘i va yagona soliq to‘lovi bo‘yicha imtiyozlar foyda (tushum) qaysi faoliyat turidan olingan bo‘lishidan qat’i nazar, soliq solinadigan foydaning (soliq solinadigan bazaning) barcha summasiga nisbatan tatbiq etiladi;

Mol-mulk solig‘i bo‘yicha imtiyozlar mazkur Nizomning 15-bandida nazarda tutilgan tartibda taqdim etiladi.

Yangi kiritilayotgan texnologik jihoz bo‘yicha imtiyozlarni qo‘llash uchun yuridik shaxslardan olinadigan foyda solig‘i, yagona soliq to‘lovi va mol-mulk solig‘i bo‘yicha hisob-kitoblarga qayta kiritilayotgan yangi texnologik jihozni foydalanishga topshirish sanasi ko‘rsatilgan, korxona rahbari yoki u tomonidan vakil qilingan shaxs tomonidan tasdiqlangan ixtiyoriy shakldagi Ma’lumotnoma ilova qilinadi.

6. Yuridik shaxslarning soliq solinadigan foydasi ishlab chiqarishni modernizatsiyalashga, texnik va texnologik jihatdan qayta jihozlashga, yangi texnologik jihoz xarid qilishga, ishlab chiqarishni yangi qurilish shaklida kengaytirishga, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishga, ushbu maqsadlar uchun berilgan kreditlarni qaytarishga, lizing obyekti qiymatining o‘rnini qoplashga yo‘naltiriladigan mablag‘lar summasiga, tegishli soliq davrida hisoblangan amortizatsiyani chegirib tashlagan holda, biroq soliq solinadigan foydaning 30 foizidan ko‘p bo‘lmagan miqdorda kamaytiriladi.

6¹. Yuridik shaxslardan olinadigan foyda solig‘i bo‘yicha imtiyoz tovarlar (ishlar, xizmatlar) ishlab chiqarishni amalga oshiruvchi soliq to‘lovchilar tomonidan qo‘llaniladi.

7. Kreditni (lizingni) to‘lashda soliq solish foydasidan asosiy qarz summasini (lizing obyekti qiymatini) to‘lashga sarflangan summa chiqarib tashlanadi.

8. Soliq solish bazasini hisoblashda jihozlarni sotib olish uchun foydalanilgan mablag‘lar faqat bir marta chegirib tashlanadi. Masalan, agarda soliq solish bazasi kredit (lizing) hisobiga olingan jihoz qiymatiga kamaytirilgan bo‘lsa, u holda ushbu kreditni (lizing obyekti qiymatini) to‘lashga sarflangan mablag‘lar soliq solish bazasidan chegirib tashlanmaydi.

9. Soliq solinadigan foydani ushbu Nizomning 6-bandida ko‘rsatilgan maqsadlarga yo‘naltiriladigan mablag‘lar summasiga kamaytirish xarajatlar amalga oshirilgan soliq davridan e’tiboran, yangi texnologik jihoz bo‘yicha esa u foydalanishga topshirilgan paytdan e’tiboran besh yil ichida amalga oshiriladi. Agar joriy soliq davrida yuqorida ta’kidlab o‘tilgan maqsadlar uchun yo‘naltiriladigan mablag‘lar summasi soliq solinadigan foydaning 30 foizidan oshsa, qolgan summa kelgusi soliq davrlarida o‘rnatilgan muddatda chegirilib borishi mumkin.

Bunda, soliq solish foydasining kamaytirilishi har hisobot (soliq) davrida o‘sib boruvchi yakun bilan amalga oshiriladi.

10. Agar hisobot (soliq) davrida hisoblangan amortizatsiya summasi ishlab chiqarishni modernizatsiyalash, texnik va texnologik qayta jihozlashga, ushbu maqsadlar uchun berilgan kreditlarni qaytarishga va lizing obyekti qiymatining o‘rnini qoplashga yo‘naltirilgan mablag‘lar summasidan oshsa, ushbu hisobot (soliq) davrida yuridik shaxslardan olinadigan foyda solig‘i bo‘yicha soliq solish foydasining kamaytirilishi amalga oshirilmaydi.

12. Yagona soliq to‘lovi bo‘yicha soliq solinadigan baza yangi texnologik asbob-uskunalar olishga yo‘naltirilgan mablag‘lar summasiga, lekin soliq solinadigan bazaning ko‘pi bilan 25 foiziga kamaytiriladi. Soliq solinadigan bazani kamaytirish texnologik asbob-uskunalarni foydalanishga joriy etilgan soliq davridan boshlab besh yil mobaynida amalga oshiriladi.

Yagona soliq to‘lovi bo‘yicha imtiyoz texnologik jihozga uning xarid qilish manbaidan (o‘z mablag‘lari, yoki qarzga olingan mablag‘lar, shu jumladan lizing) qat’i nazar, beriladi.

13. Soliq solish bazasining kamaytirilishi texnologik jihoz ishlab chiqarishga kiritilgan hisobot soliq davridan boshlab amalga oshiriladi. Bunda, har bir hisobot soliq davrida soliq solish bazasidan chegirilishi lozim bo‘lgan mablag‘ summasi soliq solish bazasining 25 foizidan oshmasligi lozim.

Agar qayta kiritilayotgan jihozning qiymati joriy soliq davrda soliq solish bazasining 25 foizidan oshib ketsa, u holda ortgan summa kelgusi soliq davrlarida o‘rnatilgan muddat doirasida, belgilangan cheklashlarni hisobga olib chegirilishi mumkin.

15. Mol-mulk solig‘i bo‘yicha imtiyoz qayta kiritilayotgan yangi texnologik jihoz ishlab chiqarishga kiritilgan paytdan boshlab besh yil muddatga ozod etish ko‘rinishida beriladi.

16. Mol-mulk solig‘i hisob-kitobiga ilova qilinadigan soliq solinmaydigan mol-mulk ro‘yxatida alohida satrda ishlab chiqarishga qayta kiritilayotgan yangi texnologik jihozning qoldiq qiymati belgilangan imtiyoz davri davomida ko‘rsatilishi lozim.

17. Bojxona to‘lovlari bo‘yicha imtiyoz texnologik jihoz va unga tegishli butlovchi va ehtiyot qismlarning qo‘shilgan qiymat solig‘i va import bojxona bojlaridan ozod qilish ko‘rinishida beriladi.

18. Texnologik jihozni qo‘shilgan qiymat solig‘i va import bojxona bojlaridan ozod etish O‘zbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi va Davlat bojxona qo‘mitasi tomonidan tasdiqlanadigan texnologik jihozlar ro‘yxatiga muvofiq qo‘llaniladi.

19. Olib kirilayotgan texnologik jihozga tegishli bo‘lgan butlovchi va ehtiyot qismlar qo‘shilgan qiymat solig‘i va import bojxona bojlaridan texnologik jihozlarni yetkazib berish bo‘yicha shartnoma shartlarida butlovchi va ehtiyot qismlar texnologik jihoz bilan bir to‘plamda yetkazib berish ko‘zda tutilgan hollarda ozod etiladi.

20. Bojxona to‘lovlari bo‘yicha imtiyozlar tatbiq etiladigan texnologik jihoz olib kirilayotganda, bojxona yuk deklaratsiyasining (BYuD) “Preferensiylar” nomli 36-ustunida bojxona to‘lovlaridan ozod qilinishining tegishli kodlari ko‘rsatiladi.

21. Texnologik jihozlar xarid (import) qilingan paytdan boshlab uch yil ichida sotib yuborilgan yoki tekinga berilgan bo‘lsa, yuridik shaxslardan olinadigan foyda solig‘i, yagona soliq to‘lovi va mol-mulk solig‘i bo‘yicha imtiyozlar bekor qilinadi va qonunchilikda belgilangan tartibda ularni to‘lash bo‘yicha majburiyatlar tiklanadi.

22. Bojxona to‘lovlari bo‘yicha imtiyozlar faqatgina import qilingan texnologik jihoz olib kirilgan paytdan e’tiboran uch yil ichida eksportga realizatsiya qilingan yoki bepul berilgan taqdirda bekor qilinadi. Bunda to‘lanishi lozim bo‘lgan to‘lovlarni to‘lash bo‘yicha majburiyat texnologik jihozni eksport qiluvchiga yuklatiladi.

Import qilingan texnologik jihoz eksport qilinganda eksportyor bojxona organlariga texnologik jihozni import qilishda bojxona rasmiylashtiruvi amalga oshirilgan BYuDning nusxasini taqdim etishi lozim.

23. Import qilingan texnologik jihoz O‘zbekiston Respublikasi hududida realizatsiya qilingan yoki bepul berilgan taqdirda bojxona to‘lovlarni to‘lash bo‘yicha majburiyatlar yuzaga kelmaydi.

Bunda import qilingan texnologik jihozni berayotgan tomon (importyor, sotuvchi, egasi) xaridorga texnologik jihozni import qilishda bojxona rasmiylashtiruvi amalga oshirilgan BYuDning nusxasini taqdim etishi lozim.

24. Mazkur Nizomda belgilangan imtiyozlarning to‘g‘ri qo‘llanishi ustidan nazorat davlat soliq xizmati organlari tomonidan O‘zbekiston Respublikasi Soliq kodeksi, O‘zbekiston Respublikasining “Davlat soliq xizmati to‘g‘risida”gi Qonuni va O‘zbekiston Respublikasining boshqa qonun hujjatlariga muvofiq amalga oshiriladi.