“Oʻzbekiston Respublikasida yoshlarga doir davlat siyosatining asoslari toʻgʻrisida”gi Qonun, “Ijtimoiy himoya yili” Davlat dasturiga muvofiq va yosh oilalarni moddiy va maʼnaviy qoʻllab-quvvatlashni yanada kuchaytirish, mehnat faoliyatini boshlash va mustaqil hayotga kirib kelishida ularga zarur yordam koʻrsatish, barqaror daromad manbalarini shakllantirish mexanizmlari va amaliy ragʻbatlantirish omillarini yaratish hamda ularning uy-joy va maishiy sharoitlarini yaxshilash maqsadida:

1. Quyidagilar joylardagi davlat hokimiyati va xoʻjalik boshqaruvi organlari, tijorat banklari, fuqarolarning oʻzini oʻzi boshqarish organlari, “Kamolot” yoshlar ijtimoiy harakati, Maʼnaviyat targʻibot markazi, “Mahalla” jamgʻarmasi, “Oila” markazi, boshqa nodavlat notijorat tashkilotlarining eng muhim vazifasi hisoblansin:

respublikamizning har bir hududida yangi ish oʻrinlari ochish, yoshlarni kichik biznes va tadbirkorlikka faol jalb qilish, yosh oilalarga oʻz ishini tashkil etish uchun mikrokreditlar ajratish, kasanachilikni rivojlantirish, ularga imtiyozli ravishda qoramollar sotish asosida mehnat bilan bandligini taʼminlash va yosh oilalarning barqaror daromad manbalarini shakllantirish uchun zarur sharoit yaratish;

yosh oilalarga ipoteka va isteʼmol kreditlari ajratish yoʻli bilan uy-joy sotib olish yoki qurish, uy xoʻjaligini yoʻlga qoʻyishda ularni har tomonlama qoʻllab-quvvatlash;

ijtimoiy-iqtisodiy muammolarni hal etishda yosh oilalarga amaliy yordam berish, ularga sifatli taʼlim, tibbiy, huquqiy, axborot, maslahat va boshqa, jumladan bolalar sogʻligʻini saqlash va tarbiyalashni taʼminlash boʻyicha xizmatlar koʻrsatish;

yosh oilalarni maʼnaviy qoʻllab-quvvatlashni kuchaytirish, yoshlarda oʻzi qurgan yangi oila uchun gʻurur va masʼuliyat hissini, ota-onaga, keksa avlod vakillariga hurmat-ehtirom, mehnat qilish va xalqimizning boqiy maʼnaviy qadriyatlari ruhida bola tarbiyalashga intilish tuygʻularini shakllantirish;

fuqarolarning oʻzini oʻzi boshqarish organlari orqali kam taʼminlangan oilalar farzandlari boʻlgan yoshlarga, shu jumladan nikohdan oʻtish va toʻy marosimlarini oʻtkazishda qoʻshimcha moddiy yordam koʻrsatish.

2. Tijorat banklari, “Kamolot” yoshlar ijtimoiy harakati, Savdo-sanoat palatasi, Oʻzbekiston Respublikasi Iqtisodiyot vazirligi va Moliya vazirligining tijorat banklari tomonidan imtiyozli shartlar asosida yosh oilalarga ipoteka, isteʼmol kreditlari va mikrokreditlar shaklida quyidagi maqsadlar uchun 2007-yilda 50,0 milliard soʻm ajratish toʻgʻrisidagi taklifi maʼqullansin:

kichik biznes va xususiy tadbirkorlikni tashkil qilish;

uy-joy qurish, taʼmirlash va sotib olish (ijaraga olish);

uy-xoʻjaligini yoʻlga qoʻyish;

mebel va boshqa uzoq muddat foydalaniladigan hayotiy zarur tovarlar sotib olish.

Tijorat banklari, “Kamolot” yoshlar ijtimoiy harakati, Oʻzbekiston Respublikasi Savdo-sanoat palatasiga yosh oilalarga koʻrsatib oʻtilgan maqsadlar uchun 2007-yilga moʻljallangan hajmdan kam boʻlmagan miqdorda qoʻshimcha kredit mablagʻlarini izlab topish va ajratish toʻgʻrisida Oʻzbekiston Respublikasi Iqtisodiyot vazirligi va Moliya vazirligi bilan kelishilgan takliflarni har yili Vazirlar Mahkamasiga kiritish tavsiya etilsin.

3. Belgilab qoʻyilsinki, qonunchilikka muvofiq, mazkur Farmon tatbiq etiladigan yosh oila toifasiga, har biri 30 yoshdan oshmagan, birinchi marta rasmiy nikohdan oʻtgan yoshlar kiradi.

4. Belgilansinki, jismoniy shaxslar — yosh oila aʼzolarining soliqqa tortiladigan daromadlariga quyidagi daromadlari kirmaydi:

soliqqa tortiladigan ish haqi va boshqa daromadlarning shaxsiy uy-joy yoki koʻp qavatli uyda xonadon qurish, taʼmirlash va sotib olish uchun olingan ipoteka kreditlari va ular boʻyicha hisoblangan foizlarni qoplash uchun yoʻnaltirilgan summasi;

xoʻjalik subyekti — ish beruvchidan uy-joy sotib olish uchun olingan mablagʻ.

Sotib olingan (mulk huquqi davlat roʻyxatidan oʻtkazilgan) kundan boshlab besh yil ichida ushbu mol-mulk sotilsa, mazkur bandda koʻrsatilgan daromadlar belgilangan tartibda jismoniy shaxslar daromadlariga solinadigan soliqqa tortiladi.

5. Xoʻjalik subyektlariga daromad soligʻi yoki yagona soliq toʻlovini hisoblashda soliqqa tortiladigan bazani yosh oilalar toifasiga kiruvchi xodimlarga ipoteka kreditlari badallari toʻlashga va (yoki) mulk sifatida uy-joy sotib olishga tekin berilgan mablagʻlar summasiga teng hajmda, ammo soliqqa tortiladigan bazaning 10 foizidan oshmagan miqdorda, kamaytirish huquqi berilsin.

6. Oʻzbekiston Respublikasi Moliya vazirligi bir oy muddatda mazkur Farmonda koʻzda tutilgan soliq imtiyozlarini qoʻllash tartibini ishlab chiqsin va tasdiqlasin.

7. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Davlat mulki qoʻmitasi va Oʻzbekiston Respublikasi Davlat arxitektura va qurilish qoʻmitasi bilan birgalikda:

2007-yil 1-sentabrgacha davlat tasarrufida boʻlgan vaqtincha foydalanilmayotgan yotoqxonalar, uylar va koʻp xonadonli uylardagi boʻsh turgan xonalarni ulardagi maishiy sharoitlarning yosh oilalar yashashi uchun mos kelishi nuqtai-nazaridan inventarizatsiya qilsin;

2007-2008-yillar davomida Nukus shahrida, har bir viloyat markazi va Toshkent shahrida foydalanilmayotgan yotoqxonalar, uy-joylar va koʻp xonadonli uylardagi boʻsh turgan xonalar negizida oilaviy yotoqxonalar va yosh oilalar uchun imtiyozli narxlarda ijaraga beriladigan kvartiralar tashkil etsin.

Belgilab qoʻyilsinki, mazkur bandga muvofiq yosh oilalarga beriladigan uy-joyni taʼmirlashni moliyalash hamda uni zarur sanitariya-maishiy asboblar bilan jihozlash tegishli mahalliy budjetlarning daromad qismi koʻrsatkichlarining oshirib bajarilgan summasi hamda “Ijtimoiy himoya yili” Davlat dasturini amalga oshirish doirasida jalb qilinayotgan homiylar mablagʻlari hisobidan amalga oshiriladi.

Oʻzbekiston Respublikasi Iqtisodiyot vazirligi va Davlat mulki qoʻmitasi Moliya vazirligi hamda Davlat arxitektura va qurilish qoʻmitasi bilan birgalikda bir oy muddatda Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari tomonidan vaqtincha foydalanilmayotgan yotoqxonalar, uylar va koʻp xonadonli uylardagi boʻsh turgan xonalarni yosh oilalarga berish tartibi toʻgʻrisidagi nizom loyihasini Oʻzbekiston Respublikasi Vazirlar Mahkamasiga kiritsin.

8. Oʻzbekiston Respublikasi Adliya vazirligi Moliya vazirligi hamda boshqa manfaatdor vazirlik va idoralar bilan birgalikda bir oy muddatda mazkur Farmondan kelib chiqqan holda qonun hujjatlarga kiritiladigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur Farmonning ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklatilsin.