Shaharda va shahar atrofida yoʻlovchilar tashish bilan band boʻlgan harakatdagi tarkibdan foydalanish samaradorligini oshirish, aholiga xizmat koʻrsatish madaniyati va sifatini yaxshilash maqsadida Vazirlar Mahkamasi qaror qiladi:

1. “Toshshaharyoʻlovchitrans” uyushmasida va “Oʻzavtotrans” korporatsiyasining viloyat birlashmalarida yoʻlkira kartochkalari va imtiyozli kartochkalarni sotish boʻyicha yagona xoʻjalik hisobidagi markazlar tashkil etilsin.

2. “Oʻzavtotrans” korporatsiyasiga va “Toshshaharyoʻlovchitrans” uyushmasiga hokimliklar bilan kelishgan holda yoʻlovchilar oqimi koʻp boʻlgan yoʻnalishlarda shahar yoʻnalishlaridagiga qaraganda 2 baravar ortiq yoʻl haqi belgilagan holda ekspress avtobus yoʻnalishlarini joriy etishga ruxsat berilsin, ushbu yoʻnalishlarda avtobuslar umumiy sonining koʻpi bilan 20 foizi ishlashi mumkinligi belgilab qoʻyilsin.

3. Respublika shahar hokimliklari “Oʻzavtotrans” korporatsiyasi “Toshshaharyoʻlovchitrans” uyushmasi bilan birgalikda bir chorak davomida:

yoʻnalishlar masofasini va ularning shahar transportining boshqa turlari bilan takrorlanishini qisqartirish maqsadida mavjud yoʻnalishlar tarmogʻini;

harakatdagi tarkibning harakat jadvallari va grafiklariga aniqlik kiritgan holda tigʻiz vaqtlarda yoʻlovchilar oqimini maqbullashtirish maqsadida yirik korxonalar va tashkilotlar ish vaqtining boshlanishi va tugallanishi jadvallarini qayta koʻrib chiqsin.

4. Hokimliklar:

transport korxonalari bilan birgalikda shaharlar va tumanlarning sanoat korxonalarida ehtiyot qismlar, uzellar va agregatlarni, shuningdek, rezinotexnika buyumlarini joylashtirish va tayyorlash yoʻli bilan harakatdagi tarkibning texnik holatini saqlab turish masalalarini koʻrib chiqsin;

transport va yoʻl korxonalari bilan birgalikda yoʻnalishlar oʻtadigan koʻchalar va avtomobil yoʻllari qatnov qismining holatini koʻrib chiqsin hamda aniqlangan kamchiliklarni bartaraf etish choralarini koʻrsin.

5. Belgilab qoʻyilsinki, Mudofaa vazirligi, Ichki ishlar vazirligi, Adliya vazirligi, Ijtimoiy taʼminot vazirligi, Prokuratura, Davlat bojxona qoʻmitasi, Davlat soliq bosh boshqarmasi mehnatning koʻchma xususiyati bilan bogʻliq xizmat vazifalarini bajarayotgan oʻz xodimlariga jamoat transportida bepul yurish uchun markazlashtirilgan tartibda xarid qilinadigan imtiyozli oylik yoʻl kartochkalarini taqdim etadi.

6. 5-bandda koʻrsatilgan vazirliklar va idoralar xarajatlar smetasida imtiyozli kartochkalar sotib olish uchun mablagʻlar ajratilishini nazarda tutsin.

7. Vazirliklar, idoralar, korxonalar va tashkilotlarga xodimlarga jamoat transportida yurish haqini kompensatsiya qilishni oylik yoʻl kartochkalarini sotib olish yoʻli bilan amalga oshirish tavsiya etilsin.

8. Vazirliklar, idoralar, hokimliklar, mulkchilik shakllaridan qatʼi nazar, korxonalar va tashkilotlarga yoʻlovchilar transportida bepul yurish huquqini beruvchi guvohnomalarni tayyorlash va berish taqiqlansin, bunda ushbu huquqdan faqat “Oʻzavtotrans” korporatsiyasi va “Toshshaharyoʻlovchitrans” uyushmasi foydalanishi belgilab qoʻyilsin.

9. Oʻzbekiston Respublikasi Moliya vazirligi Markaziy bank bilan birgalikda avtomobil yoqilgʻisi, xarid qilinadigan harakatdagi tarkib, ehtiyot qismlar uchun oldindan haq toʻlash maqsadida “Oʻzavtotrans” korporatsiyasiga va “Toshshaharyoʻlovchitrans” uyushmasiga budjet mablagʻlari oldindan ajratilishini taʼminlasin.

10. Oʻzbekiston Respublikasi Ichki ishlar vazirligi Toshshaharyoʻlovchitrans obyektlarida, xususan tungi vaqtda, jamoat tartibi saqlanishini taʼminlasin, jinoyatchilikka qarshi kurashni kuchaytirsin.

11. “Oʻzavtotrans” korporatsiyasi va “Toshshaharyoʻlovchitrans” uyushmasi:

yoʻlovchi tashishlarda aholiga xizmat koʻrsatish madaniyati va sifatini yaxshilash boʻyicha zarur chora-tadbirlar koʻrilishini taʼminlasin;

jamoat transportida bepul yurish huquqini beruvchi yagona guvohnoma namunasini ishlab chiqsin va joriy etsin;

harakatdagi tarkib tegishli ekipirovkasiz, tashish qoidalarisiz va tarifikatsiyasiz yoʻlga chiqarilishini taqiqlasin;

liniyada moliyaviy intizomni buzuvchilarga nisbatan sanksiyalarni kuchaytirgan holda tushumning toʻliq yigʻilishini taʼminlash ustidan nazoratni kuchaytirsin;

belgilangan daromadlar rejasini bajarganlik, harakatdagi tarkibdan samarali foydalanganlik, salonni namunali va estetik saqlaganlik uchun haydovchilarni (konduktorlarni) ragʻbatlantirish va sanab oʻtilganlarni bajarmaganlik uchun, shuningdek, yoʻnalishdan oʻzboshimchalik bilan chetga chiqqanlik, harakat jadvalini buzganlik, yoʻlovchilarga chipta bermaganlik yoki yoʻl haqi uchun ortiqcha haq undirganlik va oʻz xizmat vazifalariga rioya qilmaganlik uchun jazolash toʻgʻrisidagi nizomni ishlab chiqsin va joriy etsin.

12. “Oʻzdavneftmahsulot” birlashmasi 1993-yilda yoʻlovchi tashish korxonalariga yoqilgʻi-moylash materiallarini belgilangan limitga nisbatan yuz foiz berish tartibini saqlab qolsin.

13. Vazirlar Mahkamasining Mashinasozlik kompleksi harakatdagi tarkibning barqaror ishlashini va gaz-ballon yoqilgʻisiga oʻtishi bilan uning samaradorligini oshirish maqsadida bir oy muddatda “Oʻzavtotrans” korporatsiyasi va “Toshshaharyoʻlovchitrans” uyushmasining buyurtmanomalari boʻyicha respublika sanoat korxonalarida gaz-ballon uskunalarini tayyorlashga buyurtmanomalarni koʻrib chiqsin va joylashtirsin.

14. Qarorning bajarilishini nazorat qilish Kapital qurilish, transport va aloqa kompleksiga yuklansin.