2007-yilda cheklangan suv resurslaridan oqilona hamda maqsadli foydalanishni ta’minlash va kutilayotgan suv tanqisligini yumshatish maqsadida:

1. Belgilansinki, 2007-yilda respublikaning barcha suv omborlari irrigatsion ish rejimiga o‘tkaziladi.

O‘zbekiston Respublikasi Qishloq va suv xo‘jaligi vazirligi “O‘zbekenergo” DAK bilan birgalikda suv omborlarining belgilangan rejimda ishlashini ta’minlasin.

O‘zbekiston Respublikasi Iqtisodiyot vazirligi “O‘zbekenergo” DAK hamda Qishloq va suv xo‘jaligi vazirligi bilan birgalikda bir oy muddatda suv omborlari irrigatsiya rejimiga o‘tkazilishining 2007-yilda elektr energiya ishlab chiqarish prognoz hajmlariga ta’sirini o‘rganib chiqsin va zarur holda O‘zbekiston Respublikasi Prezidentining 2006-yil 29-dekabrdagi F-2646-sonli farmoyishi bilan tasdiqlangan elektroenergiya resurslari va uni taqsimlash balansi parametrlarini o‘zgartirish bo‘yicha Vazirlar Mahkamasiga takliflar kiritsin.

2. 2007-yilda Buxoro, Jizzax, Qashqadaryo, Navoiy va Samarqand viloyatlarida, shuningdek Farg‘ona vodiysi viloyatlarida sholi ekish taqiqlansin.

Sholini boshqa hududlarda joylashtirish, shuningdek takroriy ekinlar ekish ularning suv resurslari bilan ta’minlanishiga qarab, kutilayotgan suv tanqisligini yumshatish bo‘yicha Hukumat komissiyasi bilan kelishilgan holda O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi hamda viloyatlar hokimliklari takliflari bo‘yicha amalga oshiriladi.

3. Quyidagilar:

2007-yilda kutilayotgan suv tanqisligini yumshatish bo‘yicha asosiy irrigatsiya-melioratsiya chora-tadbirlari 1-ilovaga* muvofiq;

2007-yilda kutilayotgan suv tanqisligini yumshatish bo‘yicha Hukumat komissiyasining tarkibi 2-ilovaga* muvofiq tasdiqlansin.

Quyidagilar Hukumat komissiyasining asosiy vazifalari etib belgilansin:

kutilayotgan suv tanqisligini yumshatish bo‘yicha tasdiqlangan irrigatsiya-melioratsiya chora-tadbirlarini bajarish yuzasidan vazirlik va idoralar, Qoraqalpog‘iston Respublikasi Vazirlar Kengashi va viloyatlar hokimliklarining faoliyatini nazorat qilish va muvofiqlashtirish;

irrigatsiya tizimlari suv havza boshqarmalari va hududlarning suv olish limitlarini, shuningdek 2007-yil yozgi vegetatsiya davrida suv omborlari ish rejimini tasdiqlash, bularga rioya etish, sug‘orish uchun mo‘ljallangan suvlarni to‘g‘ri hisobga olish va undan oqilona foydalanish ustidan nazoratni tashkil etish;

suv tanqisligi bilan bog‘liq ravishda yuzaga keladigan muammolarni bartaraf etish bo‘yicha tezkor choralar ko‘rish.

4. Hukumat komissiyasi (Sh. Mirziyoyev) Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda bir hafta muddatda 2007-yilda kutilayotgan suv tanqisligini yumshatish chora-tadbirlarining bajarilishini ta’minlaydigan ishlarning har bir obyektlar bo‘yicha ro‘yxatini ishlab chiqsin va tasdiqlasin.

6. “O‘zbekenergo” DAK zimmasiga nasos stansiyalarining, sug‘orish quduqlarining tashqi elektr ta’minoti obyektlarini, mazkur obyektlar kompaniyaning shaxsiy mablag‘lari hisobidan moliyalashtirilishini nazarda tutgan holda, loyihalashtirish va qurish bo‘yicha buyurtmachi vazifasi yuklansin.

7. O‘zbekiston Respublikasi Qishloq va suv xo‘jaligi vazirligi bilan “O‘zbekenergo” DAKga suv tanqisligi obyektlari qurilishini loyihalashtirish bilan bir vaqtda alohida ish chizmalari va smetalar bo‘yicha moliyalashtirishga ruxsat berilsin.

8. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.