O‘zbekiston Respublikasi Prezidentining “Xalqaro shartnomalarga qo‘shilish to‘g‘risida” 2006-yil 27-dekabrdagi PQ-542-son qaroriga muvofiq Vazirlar Mahkamasi qaror qiladi:

O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.

1. Vazirlar Mahkamasining “O‘zbekiston Respublikasi bojxona hududiga etil spirtini olib kelishni va uning tranzitini taqiqlash to‘g‘risida” 1998-yil 15-maydagi 213-son qarorining 1-bandi quyidagi tahrirda bayon qilinsin:

“1. O‘zbekiston Respublikasi bojxona hududiga etil spirtini transportning barcha turlari bilan olib kelish taqiqlansin.

Etil spirtining O‘zbekiston Respublikasi bojxona hududi orqali tranziti faqat Vazirlar Mahkamasining ruxsati bilan amalga oshiriladi, ushbu bandning uchinchi xatboshida nazarda tutilgan hollar bundan mustasno.

Etil spirtining O‘zbekiston Respublikasi bojxona hududi orqali uchinchi mamlakatlar hududidan Yevro-Osiyo iqtisodiy hamjamiyati a’zosi bo‘lgan davlatlar hududiga yoxud Yevro-Osiyo iqtisodiy hamjamiyati a’zosi bo‘lgan davlatlar hududidan uchinchi mamlakatlar hududiga tranziti faqat temir yo‘l transportida amalga oshiriladi”.

2. Vazirlar Mahkamasining 2005-yil 19-maydagi 129-son qarori (O‘zbekiston Respublikasi QT, 2005-y., 5-son, 27-modda) bilan tasdiqlangan Muhofaza choralari, antidemping va kompensatsiya bojlarini qo‘llanish maqsadida tekshirish o‘tkazish tartibi to‘g‘risidagi nizom 16-bandining uchinchi xatboshiga “vakolatli organini” so‘zlaridan keyin “Yevro-Osiyo iqtisodiy hamjamiyati a’zosi bo‘lgan davlatlarni” so‘zlari qo‘shilsin.