Respublika hududida xorijiy investitsiyalarni jalb etgan holda geologiya-qidiruv ishlarini yanada kengaytirish va foydali qazilmalarni qazib olish maqsadida:

1. O‘zbekiston Respublikasi Geologiya va mineral resurslar davlat qo‘mitasining tadbirkorlik tavakkalchiligi sharoiti bilan Navoiy viloyatining G‘arbiy Uchtepa maydonida qimmatbaho metallar konini aniqlash va keyinchalik qazib olish maqsadida geologiya-qidiruv ishlarini amalga oshirish uchun “Koreya Resorsiz Korporeyshn” (Koreya Respublikasi) korporatsiyasi bilan birgalikda xorijiy investitsiyalar ishtirokida “O‘z-KORES Mayning” mas’uliyati cheklangan jamiyat shaklidagi korxonani tashkil etish taklifi qabul qilinsin.

2. Quyidagilar ma’lumot uchun qabul qilinsin:

“O‘z-KORES Mayning” MChJning ustav mablag‘i dastlab ekvivalenti 3,55 mln. AQSh dollariga teng miqdorda shakllantiriladi, keyinchalik 4 yil davomida belgilangan tartibda ilovaga* muvofiq jadvalga ko‘ra 8.4 mln. AQSh dollariga teng miqdorigacha oshib boradi;

O‘zbekiston tomoni “O‘z-KORES Mayning” MChJ ustav kapitaliga G‘arbiy Uchtepa maydonidagi geologiya-qidiruv ishlari jarayonida olingan geologik, geofizik va boshqa axborotlar shaklida hissa qo‘shadi;

koreya tomoni korxonaning ustav kapitaliga geologiya-qidiruv ishlarini o‘tkazishga investitsiya qilinadigan 4,2 mln. AQSh dollari miqdoridagi pul hissasini qo‘shadi;

tomonlarning bitimiga ko‘ra, geologiya-qidiruv ishlari “O‘z-KORES Mayning” MChJ tomonidan 4 yil mobaynida olib boriladi, shundan so‘ng korxona faoliyatini tugatish haqida qaror qabul qilinadi yoki qimmatbaho metallar koni aniqlangan taqdirda, belgilangan tartibda undan sanoat ko‘lamida foydalanishga TIA tayyorlanadi.

3. O‘zbekiston Respublikasi Geologiya va mineral resurslar davlat qo‘mitasi bir oy muddatda “Koreya Resorsiz Korporeyshn” korporatsiyasi bilan ta’sis hujjatlarini imzolasin va “O‘z-KORES Mayning” MChJning ro‘yxatdan o‘tkazilishini ta’minlasin.

5. “O‘z-KORES Mayning” MChJ geologiya-qidiruv ishlarini olib borish davrida O‘zbekiston Respublikasi Iqtisodiyot vazirligi va Moliya vazirligi tomonidan tasdiqlanadigan ro‘yxatga muvofiq olib kelinadigan geologiya-qidiruv ishlarini olib borishga mo‘ljallangan texnologik asbob-uskunalar va moddiy-texnika resurslari bojxona to‘lovlaridan (bojxona rasmiylashtiruvi yig‘imlaridan tashqari) ozod etilsin.

6. Mazkur Qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.