Ilmiy tadqiqotlarni tashkil qilish tizimini takomillashtirish va oʻtkazilayotgan iqtisodiy tadqiqotlarning amaliy yoʻnalishini kuchaytirish, ularni iqtisodiyotni isloh qilish hamda erkinlashtirishning asosiy ustuvor yoʻnalishlari va maqsadli vazifalarini amalga oshirishga yoʻnaltirish, mamlakatni iqtisodiy va ijtimoiy rivojlantirishni prognoz qilishning mustahkam ilmiy-metodologik bazasini yaratish maqsadida:

1. Oʻzbekiston Respublikasi Iqtisodiyot vazirligi, Moliya vazirligi va Markaziy bankining tugatilayotgan Markazlar — Iqtisodiyot vazirligi huzuridagi Samarali iqtisodiy siyosat markazi, Moliya vazirligi huzuridagi Soliq-budjet siyosati markazi, Markaziy bank huzuridagi Pul-kredit siyosati markazi, Bank-moliya tizimi rivojlanishini prognozlash va erkinlashtirish instituti negizida Ijtimoiy-iqtisodiy tadqiqotlar markazi (bundan buyon matnda — Markaz deb yuritiladi) tashkil etish toʻgʻrisidagi taklifi qabul qilinsin.

Markaz oʻz faoliyatida Oʻzbekiston Respublikasi Vazirlar Mahkamasining Iqtisodiyot va tashqi iqtisodiy aloqalar masalalari yigʻma axborot-tahlil departamentiga hisobot beradi.

2. Quyidagilar Markaz faoliyatining asosiy vazifalari va yoʻnalishlari etib belgilansin:

tabiiy, mineral-xomashyo, yoqilgʻi-energetika va yer-suv resurslarini uzoq muddatli istiqbolda rivojlantirish va ulardan oqilona foydalanish boʻyicha chuqur tahlil qilish, takliflar ishlab chiqish va prognozlarni shakllantirish;

makroiqtisodiy parametrlar va proporsiyalarni tizimli tahlil qilish, koʻp variantli uzoq va oʻrta muddatli makroiqtisodiy prognozlarni shakllantirish, yigʻma qiymat balanslari tizimini ishlab chiqish, ularning amalga oshirilishi monitoringini olib borish, makroiqtisodiy barqarorlik va izchil iqtisodiy oʻsishni taʼminlash boʻyicha takliflar tayyorlash;

moliya-bank tizimini yanada isloh qilish va erkinlashtirish, iqtisodiyotda toʻlov va hisob-kitoblar mexanizmini takomillashtirish, turli darajadagi budjetlar oʻrtasida oʻzaro munosabatlarni maqbullashtirish, soliq maʼmuriyatchiligining ilgʻor usullarini amaliyotga joriy etish jarayonlarini tahlil etish va takliflar ishlab chiqish, shuningdek pul muomalasini mustahkamlash, soliq, budjet va kredit siyosatini, inflatsiyani jilovlash mexanizmini takomillashtirish, milliy valyutaning barqarorligini taʼminlash masalalari;

tarmoq va hududiy proporsiyalarni chuqur tahlil etish, shu asosda iqtisodiyotdagi tarkibiy oʻzgartirishlar va ularni belgilovchi omillar, raqobat muhitini rivojlantirish boʻyicha takliflar ishlab chiqish, investitsiya siyosatining ustuvor yoʻnalishlarini asoslab berish, qulay investitsiya muhitini shakllantirish va xorijiy investitsiyalarni jalb etish boʻyicha tavsiyalar tayyorlash;

oila isteʼmol budjetini belgilovchi omillarni tadqiq etish, daromadlar va xarajatlar, real ish haqi manbalarini shakllantirish hamda aholi farovonligini oshirish sohasida ijtimoiy va iqtisodiy siyosatni ishlab chiqish borasida chuqur asoslangan takliflar tayyorlash;

demografik jarayonlarni tadqiq qilish, oqilona bandlikni va mintaqalar ijtimoiy infratuzilmasini rivojlantirishni taʼminlaydigan chora-tadbirlarni asoslash;

xalqaro hisob va hisobot tizimini joriy etish, milliy hisobvaraqlar tizimini takomillashtirish boʻyicha jahon tajribasini oʻrganish va takliflar ishlab chiqish.

3. Quyidagilar belgilansin:

Markaz tadqiqotlarining 2-bandda koʻrsatilgan eng muhim funksional yoʻnalishlari boʻyicha shakllantiriladigan loyihalar Markazning asosiy tarkibiy boʻlinmalarini tashkil etadi;

tadqiqot loyihalariga ilmiy ishlarda tajribaga ega boʻlgan yuqori malakali mutaxassislardan tanlov asosida tayinlanadigan loyiha rahbarlari boshchilik qiladi;

Ilmiy kengash qaroriga binoan loyihalarning rahbarlari va ijrochilari bilan Oʻzbekiston Respublikasi Mehnat kodeksiga muvofiq bir yilga mehnat shartnomasi (kontraktlar) tuziladi, ularda loyiha temasi, maqsadi, vazifalari va uni amalga oshirishning asosiy bosqichlari aniq koʻrsatiladi;

loyiha rahbarlarining hisobotlari Ilmiy kengash majlislarida muntazam tinglab boriladi, kengash yil yakunlariga koʻra oʻtkazilgan tadqiqotlarning natijalari va sifatiga baho beradi hamda loyiha doirasida tadqiqotlarni davom ettirish yoki uni yopish toʻgʻrisida qaror qabul qiladi;

Markaz xodimlariga davlat boshqaruvi organlari xodimlari uchun belgilangan mehnatga haq toʻlash, mukofotlash va moddiy yordam koʻrsatish shartlari joriy etiladi.

4. Quyidagilar:

umumiy cheklangan xodimlar soni 166 nafar, shu jumladan ilmiy xodimlar soni 130 nafar boʻlgan Ijtimoiy-iqtisodiy tadqiqotlar markazining tuzilmasi 1-ilovaga* muvofiq;

Ijtimoiy-iqtisodiy tadqiqotlar markazi toʻgʻrisidagi nizom 2-ilovaga* muvofiq tasdiqlansin.

Markaz direktoriga Iqtisodiyot va tashqi iqtisodiy aloqalar masalalari yigʻma axborot-tahlil departamenti bilan kelishilgan holda zarurat tugʻilganda Markazning tasdiqlangan tuzilmasiga xodimlarning cheklangan soni doirasida oʻzgartirishlar kiritish huquqi berilsin.

Belgilansinki, Markaz direktori Iqtisodiyot va tashqi iqtisodiy aloqalar masalalari yigʻma axborot-tahlil departamentining taqdimnomasi boʻyicha Vazirlar Mahkamasi tomonidan lavozimga tasdiqlanadi.

5. Markazga quyidagi huquqlar berilsin:

tadqiqotlarga tarmoq ekspertlari sifatida kontrakt asosida davlat boshqaruvi organlari, idoralar, banklarning mutaxassislarini, tadqiqot markazlari xodimlarini, oliy oʻquv yurtlari, shu jumladan chet el oliy oʻquv yurtlarining olimlari va oʻqituvchilarini jalb etish;

boshqa ilmiy tadqiqot tashkilotlari, jamgʻarmalar, universitetlar, shu jumladan xalqaro va xorijiy tashkilotlar, jamgʻarmalar, universitetlar bilan qoʻshma tadqiqotlar oʻtkazishga shartnomalar tuzish;

noshirlik faoliyatini amalga oshirish, iqtisodiyotni rivojlantirish muammolari boʻyicha axborot-tahliliy sharh va maʼlumotnomalar chop etish;

Markaz zimmasiga yuklangan vazifalar doirasida markaziy iqtisodiy organlar, vazirliklar, idoralar, banklar va boshqa tashkilotlardan zarur normativ, statistik va tahliliy axborotlarni talab qilib olish.

6. Quyidagilar Markazni moliyalashtirish manbalari etib belgilansin:

maqsadli budjet mablagʻlari, vazirliklar, idoralar va banklarning buyurtmanomalari boʻyicha tadqiqotlar oʻtkazishga ular tomonidan ajratiladigan mablagʻlar;

xalqaro moliya institutlari va donor tashkilotlarning grantlari;

Oʻzbekiston Respublikasi qonun hujjatlari doirasida Markazning oʻz faoliyatidan oladigan daromadlari.

Markaz daromadlari soliqqa tortish obyekti emasligi belgilab qoʻyilsin.

7. Markaz:

Oʻzbekiston Respublikasi Prezidentining farmonlari, qarorlari va farmoyishlari, Oliy Majlis materiallari, Vazirlar Mahkamasining qaror va farmoyishlari, vazirliklar hamda idoralarning normativ va yoʻriqnoma hujjatlari yuborilishi shart boʻlgan tashkilotlar roʻyxatiga;

Oʻzbekiston Respublikasi Davlat statistika qoʻmitasi, Moliya vazirligi, Tashqi iqtisodiy aloqalar, investitsiyalar va savdo vazirligi, Mehnat va aholini ijtimoiy muhofaza qilish vazirligi, Davlat soliq qoʻmitasi, Davlat bojxona qoʻmitasi, Davlat mulki qoʻmitasining statistik axborotnomalari yuborilishi shart boʻlgan roʻyxatga kiritilsin.

8. Markaz:

Iqtisodiyot va tashqi iqtisodiy aloqalar masalalari yigʻma axborot-tahlil departamenti, Oʻzbekiston Respublikasi Moliya vazirligi bilan kelishilgan holda ikki hafta muddatda Markazning lavozimlar roʻyxatini ishlab chiqsin va belgilangan tartibda tasdiqlasin;

bir oy muddatda Markaz boʻlinmalari respublikada amalga oshirilayotgan iqtisodiy islohotlarning mohiyatini chuqur anglaydigan yuqori malakali, tajribali mutaxassislar bilan kontrakt asosida toʻldirilishini taʼminlasin.

9. Belgilansinki, Ijtimoiy-iqtisodiy tadqiqotlar markazi Iqtisodiyot vazirligi huzuridagi Samarali iqtisodiy siyosat markazi, Moliya vazirligi huzuridagi Soliq-budjet siyosati markazi, Markaziy bank huzuridagi Pul-kredit siyosati markazi, Bank-moliya tizimi rivojlanishini prognozlash va erkinlashtirish institutining shartnomalari hamda majburiyatlari boʻyicha huquqiy voris hisoblanadi.

10. Markaz quyidagi manzilda joylashtirilsin: Toshkent shahri, A. Qayumov koʻchasi, 2, mazkur bino Oʻzbekiston Respublikasi Markaziy banki balansidan Markaz balansiga bepul oʻtkaziladi, Gʻulomov koʻchasi, 1.

11. Quyidagilar:

Vazirlar Mahkamasining “Iqtisodiy tadqiqotlarni tashkil qilishni takomillashtirish chora-tadbirlari toʻgʻrisida” 2000-yil 29-noyabrdagi 464-sonli qarori;

Vazirlar Mahkamasining “Bank-moliya sohasidagi tadqiqotlarni chuqurlashtirish chora-tadbirlari toʻgʻrisida” 2002-yil 18-noyabrdagi 398-sonli qarori oʻz kuchini yoʻqotgan deb hisoblansin.

12. Ushbu qarorning ijrosini nazorat qilish Oʻzbekiston Respublikasi Bosh vazirining oʻrinbosari V.A. Golishev zimmasiga yuklansin.