2007-yil Oʻzbekiston Respublikasi Investitsiya dasturi parametrlari bajarilishini taʼminlash, ishlab chiqarishni modernizatsiya qilishga, texnologik jihatdan qayta jihozlash va rekonstruksiya qilishga, shuningdek akademik litseylar, kasb-hunar kollejlari va umumtaʼlim maktablari qurishga ajratilgan budjet mablagʻlaridan foydalanish samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi tomonidan Moliya vazirligi, Tashqi iqtisodiy aloqalar, investitsiyalar va savdo vazirligi, “Davarxitektqurilish” qoʻmitasi, boshqa manfaatdor vazirliklar, idoralar va xoʻjalik yurituvchi subyektlar bilan birgalikda ishlab chiqilgan 2007-yil Pudrat qurilish ishlari dasturining asosiy parametrlari 1-ilovaga* muvofiq maʼqullansin.

2. 2007-yil pudrat ishlarining obyektlar boʻyicha dasturlari:

akademik litseylar va kasb-hunar kollejlari boʻyicha 2-ilovaga* muvofiq;

umumtaʼlim maktablari boʻyicha 3-ilovaga* muvofiq;

vazirliklar va idoralar boʻyicha 2007-yil Investitsiya dasturiga kiritilgan yirik ishlab chiqarish obyektlari boʻyicha 4-ilovaga* muvofiq tasdiqlansin.

3. Oʻtkazilgan tanlov savdolari natijalariga koʻra hamda pudrat ishlarini bajarish yuzasidan buyurtmachilar bilan tuzilgan shartnomalarga muvofiq akademik litseylar, kasb-hunar kollejlari va umumtaʼlim maktablari qurishni amalga oshiruvchi pudrat tashkilotlariga kreditlar berish uchun 2007-yilgi qurilishlarning belgilangan tartibda tasdiqlangan manzilli roʻyxatlari asosida Oʻzbekiston Respublikasi Moliya vazirligi va Maktab taʼlimi jamgʻarmasi tomonidan 2006-yil dekabrda respublika tijorat banklarida 33,7 mlrd. soʻm miqdorida maqsadli depozitlar joylashtirilganligi maʼlumot uchun qabul qilinsin.

4. 2007-yil Investitsiya dasturiga kiritilgan obyektlar buyurtmachilari — vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda Oʻzbekiston Respublikasi “Davarxitektqurilish” qoʻmitasi bilan birgalikda, obyektlarning belgilangan muddatlarga qatʼiy muvofiq ravishda foydalanishga topshirilishini taʼminlaydigan ishlarni olib borishning alohida bosqichlarini boʻlib chiqqan va bogʻlagan holda har bir obyekt qurilishining kalendar jadvallarini ishlab chiqsinlar va tasdiqlasinlar;

har oyning 5-kunida Oʻzbekiston Respublikasi “Davarxitektqurilish” qoʻmitasiga Pudrat ishlari dasturining amalga oshirilishi toʻgʻrisida axborot taqdim etsinlar.

5. Oʻzbekiston Respublikasi “Davarxitektqurilish” qoʻmitasi:

taqdim etiladigan axborot asosida buyurtmachilar va pudratchilar tomonidan tanlov savdolari hamda tuzilgan shartnomalar shartlari bajarilishining muntazam monitoringini taʼminlasin, bunda qurilayotgan obyektlarning zarur qurilish materiallari bilan taʼminlanganligiga, ularning texnologik asbob-uskunalar bilan oʻz vaqtida butlanganligiga alohida eʼtibor bersin;

har oyning 10-kunida Oʻzbekiston Respublikasi Vazirlar Mahkamasiga Pudrat ishlari dasturining amalga oshirilishi monitoringi natijalari, bajarilgan loyiha va qurilish ishlarining sifati, buyurtmachilar va pudratchilar tomonidan oʻz zimmasiga olingan shartnoma majburiyatlarining bajarilishi toʻgʻrisida axborot taqdim etsin.

6. Oʻzbekiston Respublikasi Iqtisodiyot vazirligiga Moliya vazirligi bilan kelishgan holda, alohida obyektlar boʻyicha oʻtkazilgan tanlov savdolari natijalarini va mablagʻlarning amalda oʻzlashtirilishini hisobga olgan holda Pudrat ishlari dasturining ayrim koʻrsatkichlariga tasdiqlangan limitlar doirasida tuzatishlar kiritish huquqi berilsin.

7. Oʻzbekiston Respublikasi Iqtisodiyot vazirligi Moliya vazirligi, “Davarxitektqurilish” qoʻmitasi, Adliya vazirligi, boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.