Respublika chorvachiligi va parrandachiligini balanslangan yuqori sifatli omixta yem bilan ta’minlashni yaxshilash hamda ularni ishlab chiqarishni ko‘paytirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Tashqi iqtisodiy aloqalar, investitsiyalar va savdo vazirligi, “O‘zdonmahsulot” aksiyadorlik kompaniyasi, Qishloq va suv xo‘jaligi vazirligi, Tashqi iqtisodiy faoliyat milliy bankining korxonalarning o‘z mablag‘lari va tijorat banklarining kreditlari hisobiga “Wynveen International” Niderlandiya kompaniyasining 2 komplekt omixta yem ishlab chiqarish uskunalarini xarid qilish va keyinchalik ularni “Toshkentdonmahsulotlari” (Toshkent shahri) aksiyadorlik jamiyatida hamda “Dunyo M” (Qashqadaryo viloyati) aksiyadorlik jamiyatida o‘rnatish;

“O‘zdonmahsulot” aksiyadorlik kompaniyasining 1-ilovaga* muvofiq Qoraqalpog‘iston Respublikasi, Buxoro, Jizzax, Qashqadaryo, Navoiy, Namangan, Samarqand, Farg‘ona, Toshkent viloyatlari va Toshkent shahridagi korxonalarning ishlab turgan omixta yem sexlarini 2007 — 2010-yillar davrida modernizatsiya qilish va texnik jihatdan qayta jihozlash to‘g‘risidagi takliflari ma’qullansin.

2. “O‘zdonmahsulot” aksiyadorlik kompaniyasi (Qudratov):

ikki hafta muddatda — “O‘zsanoatmashimpeks” davlat-aksiyadorlik kompaniyasi bilan birgalikda 2 komplekt omixta yem ishlab chiqarish uskunalarini yetkazib berish yuzasidan belgilangan tartibda tegishli shartnomalar tuzilishini hamda ularning O‘zbekiston Respublikasi Tashqi iqtisodiy aloqalar, investitsiyalar va savdo vazirligida ekspertizadan o‘tkazilishini ta’minlasin;

bir oy muddatda — 2 komplekt omixta yem ishlab chiqarish uskunalarini o‘rnatish bo‘yicha loyiha-smeta hujjatlari ishlab chiqilishini hamda joriy yilning 1-iyuligacha ularni montaj qilish va sozlash ishlari tugallanishini ta’minlasin;

O‘zbekiston Respublikasi Qishloq va suv xo‘jaligi vazirligi bilan birgalikda joriy yilning 10-martigacha 160 tonna hajmida makkajo‘xori hamda 2007-yil 1-iyulgacha 940 tonna hajmida arpa navli urug‘ligi olib kelinishini tashkil etsin.

3. Qashqadaryo va Toshkent viloyatlari hokimliklari:

O‘zbekiston Respublikasi “Yergeodezkadastr” davlat qo‘mitasi, Qishloq va suv xo‘jaligi vazirligi bilan birgalikda modernizatsiya qilinadigan ikkita zavodni zarur xomashyo bilan kafolatli ta’minlashni nazarda tutgan holda asosiy ekin maydonlarida arpa va makkajo‘xori yetishtirish uchun bir oy muddatda 2-ilovaga* muvofiq sug‘oriladigan yerlar ajratsinlar;

“O‘zdonmahsulot” aksiyadorlik kompaniyasi hamda O‘zbekiston Respublikasi Qishloq va suv xo‘jaligi vazirligi bilan birgalikda don mahsulotlari korxonalari bilan fermer xo‘jaliklari o‘rtasida makkajo‘xori va arpa doni xarid qilish yuzasidan joriy yilning 15-apreligacha fyuchers shartnomalari tuzilishini ta’minlasinlar.

4. “O‘zdonmahsulot” aksiyadorlik kompaniyasi korxonalari:

Niderlandiyaning “Wynveen International” kompaniyasi bilan tuziladigan shartnoma doirasida olib kelinadigan omixta yem ishlab chiqarish uskunalariga;

2011-yil 1-yanvargacha — makkajo‘xori va arpa urug‘ligi uchun, shuningdek “O‘zdonmahsulot” aksiyadorlik kompaniyasining 3-ilovaga* muvofiq ro‘yxat bo‘yicha omixta yem sexlarini modernizatsiya qilish hamda texnik jihatdan qayta jihozlash uchun texnologiya asbob-uskunalari va ehtiyot qismlarga bojxona to‘lovlari (bojxonada rasmiylashtirish uchun yig‘imlar bundan mustasno) to‘lashdan ozod qilinsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.