“Elektron tijorat to‘g‘risida”gi O‘zbekiston Respublikasi Qonunini amalga oshirish, shuningdek zamonaviy axborot texnologiyalaridan foydalangan holda savdoni rivojlantirishni rag‘batlantirish maqsadida Vazirlar Mahkamasi qaror qiladi:

1. O‘zbekiston Respublikasi Tashqi iqtisodiy aloqalar, investitsiyalar va savdo vazirligi:

O‘zbekiston Respublikasi Adliya vazirligi, Moliya vazirligi, Iqtisodiyot vazirligi, O‘zbekiston aloqa va axborotlashtirish agentligi bilan birgalikda 2007-yil 1-aprelgacha bo‘lgan muddatda Elektron davlat xaridlarini tashkil etish va ularni amalga oshirish tartibi to‘g‘risida Vaqtinchalik nizomni ishlab chiqsin va tasdiqlasin;

O‘zbekiston Respublikasi Adliya vazirligi, O‘zbekiston aloqa va axborotlashtirish agentligi, Davlat bojxona qo‘mitasi va Davlat soliq qo‘mitasi bilan birgalikda 2007-yil 1-iyulgacha bo‘lgan muddatda elektron shakldagi kontraktga talablarni va elektron tijoratda qo‘llaniladigan hujjatlarning boshqa namunaviy shakllarini belgilangan tartibda ishlab chiqsin va tasdiqlasin;

Moliya vazirligi, Iqtisodiyot vazirligi, Markaziy bank, O‘zbekiston aloqa va axborotlashtirish agentligi bilan birgalikda 2007-yil 1-oktabrgacha bo‘lgan muddatda vazirlik tizimiga kiradigan tashkilotlar va korxonalar tomonidan arzonbaho inventarlar sotib olish uchun elektron davlat xaridlari tizimini yaratish bo‘yicha kelishilgan loyihani Davlat budjeti ijrosining g‘aznachilik tizimi bilan avtomatlashtirilgan o‘zaro hamkorlik qilishni hisobga olgan holda tayyorlasin va amalga oshirsin;

2008-yil 1-aprelgacha bo‘lgan muddatda kelishilgan loyiha natijalariga ko‘ra to‘plangan tajribani tovarlar va xizmatlar boshqa turlarining davlat xaridlariga nisbatan tatbiq etish, shuningdek tizimni respublikaning barcha davlat muassasalari ehtiyojlari uchun rivojlantirish to‘g‘risida Vazirlar Mahkamasiga takliflar kiritsin.

2. Savdo-sanoat palatasi O‘zbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda tadbirkorlar hamda manfaatdor vazirliklar va idoralar mutaxassislari keng doirasini jalb etgan holda konferensiyalar, seminarlar, davra suhbatlari, treninglar o‘tkazish, shuningdek elektron tijoratning imkoniyatlari to‘g‘risidagi axborot materiallarini ishlab chiqish va ularni elektron tijoratning salohiyatli ishtirokchilari o‘rtasida ommalashtirish chora-tadbirlarini amalga oshirsin.

3. O‘zbekiston Respublikasi Tashqi iqtisodiy aloqalar, investitsiyalar va savdo vazirligi manfaatdor vazirliklar va idoralar bilan birgalikda tadbirlarni o‘tkazish davomida olingan takliflar va ilg‘or xalqaro tajribani o‘rganish asosida 2008-yil 1-fevralgacha bo‘lgan muddatda Vazirlar Mahkamasiga elektron tijoratni yanada rivojlantirish chora-tadbirlari dasturini kiritsin.

4. O‘zbekiston Respublikasi Moliya vazirligi, Markaziy banki, Davlat soliq qo‘mitasi, Davlat bojxona qo‘mitasi, Iqtisodiyot vazirligi, O‘zbekiston aloqa va axborotlashtirish agentligi, Savdo-sanoat palatasi manfaatdor xo‘jalik yurituvchi subyektlar bilan birgalikda uch oy muddatda Vazirlar Mahkamasiga ulgurji va chakana elektron savdoni amalga oshirishda to‘lovlarni qabul qilish va to‘lash tizimini takomillashtirish, shuningdek uni amalga oshirishda zamonaviy apparatlar va texnika vositalarini joriy etish bo‘yicha takliflar kiritsinlar.

5. O‘zbekiston Respublikasi Oliy va o‘rta maxsus ta’lim vazirligi Tashqi iqtisodiy aloqalar, investitsiyalar va savdo vazirligi hamda Savdo-sanoat palatasi bilan birgalikda elektron tijorat sohasida kadrlarni tayyorlash, qayta tayyorlash va ularning malakasini oshirish tizimini takomillashtirish bo‘yicha amaliy chora-tadbirlar ko‘rsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari R.S. Azimov va A.N. Aripov zimmasiga yuklansin.