“Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Oʻzbekiston Respublikasining Qurolli Kuchlari saflaridan:

muddatli harbiy xizmatning belgilangan muddatlarini oʻtab boʻlgan fuqarolar — rezervga;

muqobil xizmatning belgilangan muddatlarini oʻtab boʻlgan fuqarolar — zaxiraga boʻshatilsin.

2. 1977—1986-yillarda tugʻilgan, chaqirilish muddatini uzaytirish huquqiga ega boʻlmagan Oʻzbekiston Respublikasi fuqarolari 2004-yilning aprel-may oylarida muddatli harbiy va muqobil xizmatga chaqirilsin.

Muddatli harbiy xizmatni oʻtashga yaroqli hamda chaqirilish muddatini kechiktirish va chaqirilishdan ozod etilish huquqiga ega boʻlmagan, biroq ushbu chaqiruv mobaynida Qurolli Kuchlar safiga chaqirilmaydigan fuqarolar safarbarlik chaqiruvi rezerviga olinsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Mudofaa vazirligi bilan birgalikda, Qurolli Kuchlarning chaqiriluvchilar bilan sifatli butlanishini taʼminlash maqsadida, joylardagi chaqiruv komissiyalarining samarali ishlashini, shuningdek Qurolli Kuchlarga muddatli harbiy xizmatga chaqirilgan fuqarolarni qoʻshinlarga tantanali kuzatib qoʻyishni tashkil etsinlar.

5. Oʻzbekiston Respublikasi Sogʻliqni saqlash vazirligi (F.Gʻ. Nazirov) Mudofaa vazirligi (Q.Gʻ. Gʻulomov) bilan birgalikda chaqiruv uchastkalarini zarur tibbiyot asbob-anjomlari va buyumlari bilan taʼminlasin, chaqiriluvchilarning zarur laboratoriya tekshiruvlari oʻtkazilishini, ularning turli ixtisoslikdagi yuqori malakali vrachlar tomonidan sifatli va har tomonlama tibbiy tekshirib koʻrilishini tashkil etsin. Chaqiriluvchilarni tibbiy tekshirishning xolisligi muqobil tibbiy komissiyalarning samarali ishlashini tashkil etish orqali taʼminlansin.

6. Oʻzbekiston Respublikasi Mudofaa vazirligi (Q.Gʻ. Gʻulomov), Ichki ishlar vazirligi (Z.A. Almatov), Milliy xavfsizlik xizmati (R.R. Inoyatov), harbiy okruglar qoʻshinlari qoʻmondonlari:

muddatli harbiy xizmatga yangidan chaqirilgan harbiy xizmatchilarni qoʻshilmalarga va qismlarga qabul qilishda yuksak uyushqoqlikni, harbiy intizomni, qoʻshinlarning jangovar tayyorgarligini, muddatli harbiy xizmatga yangidan chaqirilgan harbiy xizmatchilarni harbiy mutaxassisliklarga oʻqitish jarayonida xavfsizlik chora-tadbirlariga rioya etilishini, harbiy xizmatchilarni milliy-maʼnaviy qadriyatlar va zamonaviy harbiy anʼanalar asosida maʼnaviy-axloqiy va vatanparvarlik ruhida tarbiyalashni;

yangidan chaqirilgan shaxsiy tarkib uchun zarur uy-joy-maishiy shart-sharoitlar yaratilishi va jihozlanishini, ularning belgilangan talablarga va taʼminot normalariga muvofiq oʻz vaqtida va sifatli moddiy taʼminlanishini;

mahalliy davlat hokimiyati organlari, mahalla qoʻmitalari, jamoat tashkilotlari bilan birgalikda muddatli harbiy xizmatning belgilangan muddatini oʻtagan fuqarolarni tantanali kutib olish tashkil etilishini taʼminlasinlar.

7. Oʻzbekiston Respublikasi Mehnat va aholini ijtimoiy muhofaza qilish vazirligi (O.O. Obidov) mahalliy davlat hokimiyati organlari bilan birgalikda Qurolli Kuchlardan boʻshatilgan fuqarolarni ularning egallagan harbiy va fuqarolik mutaxassisliklarini hisobga olgan holda qonun hujjatlarida belgilangan tartibda ishga joylashtirish chora-tadbirlarini koʻrsin.

Belgilab qoʻyilsinki, Oʻzbekiston Respublikasi Qurolli Kuchlarida muddatli harbiy xizmatni oʻtagan fuqarolar davlat muassasalari, tashkilotlari va korxonalariga ishga qabul qilishda mardlik va vatanparvarlik tarbiyasining armiya maktabini oʻtagan, harbiy tayyorgarlik koʻrgan va hayotiy tajriba orttirgan, mamlakatning eng faol va tayyorgarlik koʻrgan kadrlar zaxirasi hisoblangan shaxslar sifatida boshqa teng sharoitlarda (taʼlim, kasb malakasi va boshqalar) ustunlik huquqidan foydalanadilar.

8. Oʻzbekiston Respublikasi Oliy va oʻrta maxsus taʼlim vazirligi (S.S. Gʻulomov) Vazirlar Mahkamasi huzuridagi Davlat test markazi (B.M. Ismoilov), aloqador vazirliklar, idoralar bilan birgalikda:

muddatli harbiy xizmatni oʻtagan fuqarolardan boʻlgan shaxslarni oliy oʻquv yurtlariga oʻqishga kirish uchun sifatli tayyorlash maqsadida zarur shart-sharoitlar yaratsin;

mamlakatning oliy oʻquv yurtlariga oʻqishga kirish uchun test sinovlari oʻtkazishda muddatli harbiy xizmat davomida jangovar va ijtimoiy-siyosiy tayyorgarlikda yuqori koʻrsatkichlarga erishgan hamda harbiy qismlar qoʻmondonligining tegishli tavsiyanomalarini olgan fuqarolar uchun eng yuqori toʻplanadigan ballning 20 foizi miqdorida qoʻshimcha ballar tarzidagi qonun hujjatlarida belgilangan imtiyozlarni hisobga olsin.