Pillachilik sohasida iqtisodiy islohotlarni yanada chuqurlashtirish, respublika pillachilik tarmog‘iga uni modernizatsiyalash va yangi ishlab chiqarishlarni vujudga keltirish uchun xorijiy investitsiyalarni jalb etish bo‘yicha qulay shart-sharoitlar yaratish, jahon bozorida raqobatbardosh tayyor mahsulot hajmini ko‘paytirish va turlarini kengaytirish maqsadida:

1. Quyidagilarga:

“O‘zbek ipagi” uyushmasi ishtirokchilarining uni tugatish to‘g‘risidagi taklifiga;

O‘zbekiston Respublikasi Qishloq va suv xo‘jaligi vazirligining uning markaziy apparati tuzilmasida xodimlar cheklangan soni 5 kishidan iborat ipakchilikni rivojlantirish boshqarmasini tashkil etish to‘g‘risidagi taklifiga;

“O‘zbekyengilsanoat” Davlat-aksiyadorlik kompaniyasining uning ijro etuvchi apparati tuzilmasida xodimlar cheklangan soni 7 kishidan iborat pillachilik sanoatini rivojlantirish boshqarmasini tashkil etish to‘g‘risidagi taklifiga rozilik berilsin.

2. O‘zbekiston Respublikasi Iqtisodiyot vazirligi, Qishloq va suv xo‘jaligi vazirligi hamda “O‘zbekyengilsanoat” DAK tomonidan ishlab chiqilgan:

2006—2010-yillar davrida Qoraqalpog‘iston Respublikasi va viloyatlar bo‘yicha maxsus ajratiladigan yer maydonlarida yangi tutzorlar barpo etish parametrlari 3-ilovaga** muvofiq;

2006—2010-yillar davrida mahalliy ipak qurti urug‘ining serunum zotlari va duragaylarini yetishtirish hajmlari 4-ilovaga** muvofiq;

2006—2010-yillar davrida pillachilik sanoati korxonalarini tashkil etish va modernizatsiya qilishga investitsiyalarni, jumladan to‘g‘ridan to‘g‘ri xorijiy investitsiyalarni jalb qilish dasturi 5-ilovaga** muvofiq ma’qullansin.

3. Qoraqalpog‘iston Respublikasi Vazirlar Kengashi Raisi va viloyatlar hokimlari:

maxsus ajratiladigan yer maydonlarida tutzorlar barpo etish va ipak qurti urug‘idan tirik pilla yetishtirish bo‘yicha 3-ilovada nazarda tutilgan belgilangan topshiriqlarning bajarilishini;

tutzorlar saqlab qolinishi ustidan qattiq nazoratni, ixtisoslashtirilgan pillachilik fermer xo‘jaliklari tashkil etilishi va fermer xo‘jaliklarida namunaviy qurtxonalar qurilishini ta’minlasin.

4. “O‘zagrokimyohimoya” AJ bilan birgalikda qizil kapalak bilan zararlangan barcha tut daraxtlariga har yili uch marotaba ishlov berish hamda uning tarqalishiga yo‘l qo‘ymaslik va butunlay yo‘q qilish bo‘yicha profilaktika tadbirlari o‘tkazilishini ta’minlasin.

5. “O‘zbekyengilsanoat” DAK O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi bilan birgalikda 2006—2010-yillar davrida pillachilik sanoati korxonalarini tashkil etish va modernizatsiya qilish dasturiga kiritilgan loyihalarni amalga oshirish uchun xorijiy investorlarni tanlab olish va jalb etish, mahsulot umumiy hajmining kamida 70 foizi eksportga yetkazib berilishi sharti bilan ushbu korxonalarni raqobatbardosh mahsulot ishlab chiqarishni ta’minlaydigan zamonaviy uskunalar va texnologiyalar bilan jihozlash bo‘yicha ishlarni tashkil etsin.

6. Quyidagilar:

2006-yil hosilidan boshlab 2010-yilning 1-yanvarigacha ipak qurti urug‘i zavodlari o‘zi ishlab chiqargan urug‘larni pilla yetishtiruvchi xo‘jaliklarga to‘g‘ridan to‘g‘ri shartnomalar bo‘yicha va pilla tayyorlash tashkilotlari orqali sotishda, shuningdek pilla tayyorlash va birlamchi ishlov berish korxonalari — quruq pillani qayta ishlovchi respublika pillachilik tarmog‘i korxonalariga sotishda qo‘shilgan qiymat solig‘i to‘lashdan ozod etilsin;

“O‘zbekyengilsanoat” DAKning pillachilik tarmog‘i korxonalari tomonidan, 6-ilovaga muvofiq respublikada ishlab chiqarilmaydigan, shaxsiy ishlab chiqarish ehtiyojlari uchun olib kelinadigan xomashyo, bo‘yoqlar, kimyoviy vositalar va yordamchi materiallar 2008-yilning 1-yanvarigacha bojxona to‘lovlari (bojxona rasmiylashtiruvi yig‘imlaridan tashqari) to‘lashdan ozod etilsin.

O‘zbekiston Respublikasi Davlat soliq qo‘mitasi shaxsiy ishlab chiqarish ehtiyojlari uchun ipakchilik tarmog‘i korxonalari tomonidan import bo‘yicha olib kelinadigan xomashyo va materiallardan maqsadli foydalanish ustidan qattiq nazorat o‘rnatsin.

7. “O‘zbek ipagi” uyushmasi, “Pilla” hududiy birlashmalari va pillachilik tarmog‘i korxonalarining ayrim rahbarlari moliya intizomini, pillachilik mahsulotlari ishlab chiqarish va sotishda belgilangan tartibni qo‘pol ravishda buzgani uchun respublika Prokuraturasi idoralari tomonidan qattiq javobgarlikka, hatto jinoiy javobgarlikka tortilganligi va egallab turgan lavozimlaridan ozod etilganligi ma’lumot uchun qabul qilinsin.

8. O‘zbekiston Respublikasi Moliya vazirligi O‘zbekiston Respublikasining quyidagi majburiyatlar bo‘yicha kafolatini:

“O‘zbek ipagi” uyushmasining majburiyatlari bo‘yicha — “O‘zbekyengilsanoat” DAKning Koreya Eksport-import banki krediti yuzasidan Tashqi iqtisodiy faoliyat milliy banki oldidagi majburiyatlari etib;

Tashqi iqtisodiy faoliyat milliy bankining Koreya Eksport-import banki oldidagi majburiyatini belgilangan tartibda qayta rasmiylashtirsin.

O‘zbekiston Respublikasi Tashqi iqtisodiy faoliyat milliy banki “Atlas” AJ va “Buloqboshi ipagi” AJ pillakashlik korxonalarini texnikaviy qayta jihozlash to‘g‘risida 2001-yil 30-noyabrdagi qarz bitimi va kredit shartnomasiga “O‘zbek ipagi” uyushmasi majburiyatlarining “O‘zbekyengilsanoat” DAKga qayta rasmiylashtirilishini nazarda tutuvchi o‘zgartishlar kiritsin.

9. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

10. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.