To‘qimachilik sanoatini jadal va barqaror rivojlantirish, tayyor, sifatli va raqobatbardosh mahsulot ishlab chiqarish quvvatlari oshirilishini rag‘batlantirish, uni eksportga yetkazib berishni ko‘paytirish, shuningdek tarmoq korxonalarini modernizatsiya qilish hamda texnikaviy qayta jihozlash hisobiga yangi ish o‘rinlari barpo etishni ta’minlash maqsadida:

1. “O‘zbekyengilsanoat” DAK tomonidan O‘zbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ishlab chiqilgan, 2006—2008-yillarda to‘qimachilik sanoati korxonalarini modernizatsiya qilish va texnikaviy qayta jihozlash Dasturi (keyingi o‘rinlarda — modernizatsiya Dasturi) ma’qullansin, Dastur:

“O‘zbekyengilsanoat” DAKning 1-ilovaga* muvofiq 2006—2008-yillarda to‘qimachilik sanoati korxonalarini modernizatsiya qilish va texnikaviy qayta jihozlash loyihalari ro‘yxatini;

2-ilovaga* muvofiq 2006—2008-yillarda hududiy boshqaruv tasarrufidagi to‘qimachilik sanoati korxonalarini modernizatsiya qilish va texnikaviy qayta jihozlash loyihalari ro‘yxatini o‘z ichiga olgan.

O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi va “O‘zbekyengilsanoat” DAK modernizatsiya Dasturiga kiritilgan loyihalarni amalga oshirish uchun to‘g‘ridan to‘g‘ri xorijiy investitsiyalarni jalb qilish bo‘yicha ishlarni faollashtirsin.

2. Shunday tartib o‘rnatilsinki, unga muvofiq, mulkchilik shaklidan qat’iy nazar, yengil sanoat korxonalarini modernizatsiya qilish va texnikaviy qayta jihozlashga oid barcha loyihalar O‘zbekiston Respublikasi Tashqi iqtisodiy aloqalar, investitsiyalar va savdo vazirligida ekspertizadan o‘tishi shart.

Ekspertiza qilishda asosiy e’tibor ishlab chiqarishning texnikaviy darajasini oshirishga, birinchi navbatda, ishlab chiqarilayotgan mahsulot umumiy hajmining kamida 70—80 foizini eksportga yetkazib berish sharti bilan, korxonalarni yuqori sifatli raqobatbardosh mahsulot chiqarishni ta’minlaydigan zamonaviy uskunalar bilan jihozlashga qaratilsin.

Loyihalarning mazkur shartlarga muvofiq bo‘lishi uchun shaxsiy javobgarlik “O‘zbekyengilsanoat” DAK hamda O‘zbekiston Respublikasi Tashqi iqtisodiy aloqalar, investitsiyalar va savdo vazirligi rahbarlari zimmasiga yuklatilsin.

4. Belgilansinki, “O‘zbekyengilsanoat” DAK, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari korxonalarning muassislari bilan birgalikda 1 va 2-ilovalarda ko‘rsatilgan loyihalarning TIAlari o‘z vaqtida va sifatli tayyorlanishi hamda ular belgilangan tartibda O‘zbekiston Respublikasi Tashqi iqtisodiy aloqalar, investitsiyalar va savdo vazirligiga ekspertizaga taqdim etilishi uchun qat’iy javobgardirlar.

5. Ushbu qarorning 1 va 2-ilovalariga kiritilgan korxonalar mazkur qarorda nazarda tutilgan loyihalar bo‘yicha shaxsiy ehtiyojlar uchun olib kelinadigan texnologik va yordamchi uskunalar, texnologik jihozlar va ehtiyot qismlarga bojxona to‘lovlari (bojxona rasmiylashtiruvi yig‘imlaridan tashqari) to‘lashdan ozod etilsin.

Shaxsiy ehtiyojlar uchun olib kelinadigan texnologik va yordamchi uskunalar, texnologik jihozlar va ehtiyot qismlar ro‘yxati Idoralararo ekspertlar kengashi xulosasi asosida Vazirlar Mahkamasining qarori bilan aniqlanishi belgilab qo‘yilsin.

6. O‘zbekiston Respublikasi Prezidentining “Xorijiy sarmoya ishtirokidagi korxonalar tomonidan tayyor iste’mol mollari ishlab chiqarishni ko‘paytirishni rag‘batlantirishga oid qo‘shimcha chora-tadbirlar to‘g‘risida” 2003-yil 20-iyundagi PF-3267-sonli Farmoni hamda Vazirlar Mahkamasining “O‘zbekyengilsanoat” davlat-aksiyadorlik kompaniyasi boshqaruv tuzilmasini takomillashtirish va respublika yengil sanoatini yanada rivojlantirishni rag‘batlantirish chora-tadbirlari to‘g‘risida” 2004-yil 25-martdagi 141-sonli qarorida nazarda tutilgan imtiyozlar 2009-yilning 1-yanvarigacha bo‘lgan muddatda mazkur qarorning 1 va 2-ilovalariga kiritilgan korxonalarga tatbiq etilsin.

7. Belgilansinki, mazkur qarorda berilgan imtiyozlarga muvofiq bo‘shaydigan mablag‘lar ishlab chiqarishni texnikaviy qayta jihozlash va modernizatsiya qilish, tayyor mahsulotlar yangi turlarini o‘zlashtirish, shaxsiy aylanma mablag‘larni to‘ldirishga maqsadli yo‘naltiriladi.

O‘zbekiston Respublikasi Moliya vazirligi, Davlat soliq qo‘mitasi bo‘shaydigan mablag‘lardan maqsadli va samarali foydalanish ustidan qat’iy nazorat o‘rnatsin. Ulardan maqsadli foydalanilmagan taqdirda, ushbu mablag‘lar qonun hujjatlarida nazarda tutilgan jarima sanksiyalari qo‘llangan holda davlat budjetiga to‘la undirib olinadi.

8. Ma’qullangan modernizatsiya Dasturiga kiritilgan loyihalarning amalga oshirilishini ta’minlash uchun “O‘zbekyengilsanoat” DAK Boshqaruvi raisi, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari zimmasiga shaxsiy javobgarlik yuklansin.

“O‘zbekyengilsanoat” DAK O‘zbekiston Respublikasi Iqtisodiyot vazirligi bilan birgalikda modernizatsiya Dasturining bajarilishi to‘g‘risida har oyda Vazirlar Mahkamasiga axborot berib borsin.

9. Vazirlar Mahkamasining “Respublika to‘qimachilik tarmog‘iga investitsiyalar jalb etish chora-tadbirlari to‘g‘risida” 2005-yil 27-yanvardagi 38-sonli qarorining 1—4-bandlari hamda qarorning 1, 2-ilovalari o‘z kuchini yo‘qotgan deb hisoblansin.

10. O‘zbekiston Respublikasi Adliya vazirligi “O‘zbekyengilsanoat” DAK hamda manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartishlar to‘g‘risida Vazirlar Mahkamasiga takliflar kiritsin.

11. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.