Oʻzbekiston Respublikasi Prezidentining 2006-yil 31-maydagi “Chigit yetkazib berish mexanizmini hamda oʻsimlik yogʻi va yogʻ-moy mahsulotlari sotishni tartibga solish toʻgʻrisida”gi PQ-360-sonli qarori va Oʻzbekiston Respublikasi Vazirlar Mahkamasining 2004-yil 5-fevraldagi “Mahsulotlar, xom ashyo va materiallarning yuqori likvidli turlarini sotishning bozor mexanizmlarini joriy etishni davom ettirish toʻgʻrisida”gi 57-sonli qaroriga asosan qaror qilamiz:

1. Ilova* qilinayotgan Oʻsimlik yogʻini sotish tartibi toʻgʻrisidagi nizom tasdiqlansin.

2. Mazkur qaror kuchga kirgan kundan boshlab Oʻzbekiston Respublikasi Iqtisodiyot vazirligi, Oʻzbekiston Respublikasi davlat mulkini boshqarish va tadbirkorlikni qoʻllab-quvvatlash Davlat qoʻmitasi, Moliya vazirligi, Yogʻ-moy va oziq-ovqat sanoat uyushmasi, Oʻzbekiston respublika tovar xom-ashyo birjasining 2004-yil 5-apreldagi “Birja savdolarida oʻsimlik moyini sotish tartibi toʻgʻrisida Vaqtinchalik nizomni tasdiqlash toʻgʻrisida”gi 25, 01/24-18, 46, 01/1-10, 42-01/156-sonli qarori oʻz kuchini yoʻqotgan deb hisoblansin.

3. Ushbu qaror Oʻzbekiston Respublikasi Adliya vazirligida davlat roʻyxatidan oʻtgan kundan boshlab oʻn kundan soʻng kuchga kiradi.